Министерката за труд и социјална политика, Мила Царовска, и градоначалникот на општина Кавадарци, Митко Јанчев, денеска го пуштија во употреба проширениот дел од градинката „Снежана“. Со доградбата на овој објект, но и со доградбата на градинката „Детелинка“, Кавадарци добива дополнителен простор за згрижување вкупно 125 деца.

„Нашата цел како Влада е што поголем број деца до 6-годишна возраст да се опфатат во предучилишното образование бидејќи раниот детски развој е најважен за понатамошниот развој на децата. Продолжуваме да инвестираме во детската заштита, особено во другите градови во Северна Македонија и во руралните места бидејќи инвестицијата во квалитетно предучилишно образование значи инвестиција во човечки капитал и води до напредок на државата“, изјави министерката Царовска во Кавадарци.

Градоначалникот Митко Јанчев истакна дека со последните проширувања бројот на деца на листата на чекање е нула.

„Новиот дел на ‘Снежана’ е со површина од 187 квадратни метри и градинката, наместо претходните 9 занимални, сега има 11, со тоа вкупниот капацитет се зголемува на 178 деца“, рече Јанчев. Покрај доградбата на „Снежана“, доградба е направена и на градинката „Детелинка“, каде што има дополнителен простор за згрижување 87 деца во 5 воспитно згрижувачки групи. Со доградбата на објектот „Детелинка“ вкупниот капацитет ќе биде за 225 деца до 6-годишна возраст, кои ќе бидат опфатени во 14 воспитно-згрижувачки групи.

Министертвото за труд и социјална политика продолжува да инвестира во детската заштита со тоа што ги подобрува условите за престој и воспитување на децата, но ги јакнеме и професионалните компетенции на воспитувачите. Со последното зголемување на платите кај вработените во градинките платите се зголемија 21 отсто. За две и пол години, МТСП има инвестирано во изградба, опремување и реконструкција и опремување вкупно 31 објект за детска заштита. Во тек е изградба и опремување уште 12 објекти.