Македонија
Царовска: EУ да продолжи да ја продлабочува соработката во социјалната политика со регионот

Социо-економската перспектива на Северна Македонија и регионот беа тема на денешната национална конференција „Никој не е изоставен во процесот на ЕУ-интеграциите“, што се одржа во Владата. Настанот беше организиран од германската невладина организација „Арбитер Самаритер Бунд“, Југоисточна Европа, заедно со локалниот партнер „Отворена порта – Ла Страда“ и со Министерството за труд и социјална политика на Северна Македонија.
Министерката за труд и социјална политика, Мила Царовска, ги презентира состојбите во социјалната политика и вработувањето, како и реформите во овие системи во последните неколку години.
„Идејата на европското семејство се темели на принципите на солидарност и еднаквост на сите граѓани. Со социјалната реформа првпат како универзално право за сите домаќинства со ниски приходи се воведуваат детски и образовен додаток и гарантирана минимална помош и социјална сигурност за старите лица, со што директно влијаеме на намалување на сиромаштијата, особено детската сиромаштија. Крајната цел на целата реформа не е покачувањето на износите на правата, туку активација на корисниците на пазарот на трудот и нивно трајно излегување од сиромаштија за што ги јакнеме и социјалните тимови и институциите што непосредно ќе работат со семејствата. Ја повикам Европската Унија да ја продолжи и продлабочи соработката во областа на социјалната политика со регионот“, изјави Царовска.
На настанот присуствуваа повеќе од 100 учесници, вклучително и претставници на Владата на Република Северна Македонија, германска амбасада во Република Северна Македонија, претставници на локални и регионални невладини организации, претставници на меѓународната заедница и општините, како и членови на регионална ИРИС-мрежа, која брои повеќе од 200 членки, даватели на социјални услуги.
Конференцијата е организирана во рамките на Иницијативата за социјална димензија (СДИ), која почна во 2018 година како заеднички напор на АСБ и локалните организации на граѓанското општество од Западен Балкан, а поддржана од група истакнати членови на Европскиот парламент за да се зајакне дијалогот меѓу цивилниот сектор, граѓаните и политичките елити како во Европската Унија (ЕУ) така и во Западен Балкан за потребата од посилна социјална димензија на интеграцијата во ЕУ за земјите од Западен Балкан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Герасимовски: Одличен одзив на „Цел Центар на точак“, исцрпени средствата за велосипеди, повикот за дополнителна опрема сѐ уште е во тек

Општина Центар информира дека се исцрпени средствата за субвенционирање на велосипеди, електрични велосипеди и е-тротинети во рамки на јавниот повик „Цел Центар на точак“.
„Проектот „Цел Центар на точак“ е потврда дека центарци се подготвени да направат вистински избор за поеколошки и поодржлив начин на движење низ градот. И овојпат интересот беше толку голем што за кратко време се искористија средствата. Ова е доказ дека сме на вистинскиот пат,“ порача градоначалникот Горан Герасимовски.
Од вкупно предвидените 600.000 денари, субвенционирани се 197 жители на Општина Центар, додека јавниот повик за субвенционирање на дополнителна опрема останува активен.
Овој долгогодишен и популарен проект предвидува субвенции за купување велосипед, електричен велосипед или е-тротинет, во износ од 30% од цената, но најмногу до 3.000 денари, како и субвенции за набавка на дополнителна опрема,, во износ од 30% од цената, но не повеќе од 1.000 денари, велат од општината.
Под дополнителна опрема се подразбираат: детско седиште, заштитна кацига, светло, катадиоптри, ѕвонче, безбедносна сајла, катанец и други елементи што го зголемуваат нивото на безбедност при користење.
Македонија
Македонската дипломатија нема да биде ничија партиска сопственост, одговори МНР по прозивките од СДСМ

Македонската дипломатија не е, и нема да биде ничија партиска сопственост. По години на политичка злоупотреба, ја враќаме дипломатијата на државата, институционално, професионално и во согласност со законот, реагираат од МНР по прозивките од страна на СДСМ кои на прес -конференција кажаа дека Муцунски и ВМРО-ДПММЕ ја узурпираат дипломатијата.
„Автентичното толкување на член 39 став 3 од Законот за надворешни работи е легитимна, уставно заснована постапка, донесена од Собранието – единствениот орган со надлежност за толкување на законите. Министерството нема ниту овластување, ниту влијание врз овој процес.
Членот на Комисијата за надворешни работи од СДСМ, Фатон Бејта, го упатуваме на предметот Уставно право на кој било правен факултет во државата, каде што ќе може да се потсети дека државата се темели врз начелото на поделба на власта – законодавна, извршна и судска.
Целта на ова толкување е да се воведе дополнителен демократски филтер и јавна отчетност при изборот на амбасадори – не да се одземе уставната надлежност на Претседателот, туку да се зајакне транспарентноста пред граѓаните.
Собраниската процедура, спроведена пред Комисијата за надворешни работи составена од пратеници од сите политички партии, е доказ за инклузивност и независност на процесот.
Наместо да одржуваат безпредметни прес-конференции, СДСМ треба да одговори зошто нивните амбасадори со години беа апатични, невидливи или отворено политизирани, а именувањето на дел од нив беше спроведено спротивно на Законот за надворешни работи“.
Нашата цел не е партизација, велат од МНР, туку системска професионализација.
„За првпат по долг период се воспоставуваат јасни критериуми, јавни постапки и механизми за унапредување на кариерните дипломати. Најсилна потврда за ова се измените на Законот за надворешни работи, кои неодамна беа усвоени во Собранието, а чија главна цел е токму професионализацијата на дипломатијата.
Амбасадорите што чесно и професионално ја извршувале својата функција немаат од што да се грижат. Но оние што амбасадите ги третираа како партиски трофеи, нивниот мандат завршува“.
Оваа влада, се нагласува во реакцијата од МНР, гради модерна, отчетна и компетентна дипломатија, со амбасадори што ја претставуваат државата, а не партијата.
Македонија
(Видео) Дали СВР Велес фалсификува службени документи за да ги заштити УМС на ВМРО-ДПМНЕ, прашува Цветаноски

Денеска поставуваме сериозно и алармантно прашање: Дали СВР Велес фалсификува службени документи за да ги заштити УМС на ВМРО-ДПМНЕ од одговорност, прашуваат од СДММ.
„Откако УМС на ВМРО-ДПМНЕ славеа со пиротехника во момент кога цела Македонија тагува по трагедијата во Кочани скандалот стана уште поголем. УМС објави демек „доказ“ дека го пријавиле настанот и пиротехниката, но дали е валидно и дали станува збор за фалсификат? Нема повратница од Министерството за внатрешни работи – со што би се потврдило дека оваа пријава навистина е доставена и примена во законскиот рок“.
Не е наведена количината на пиротехнички средства што ќе се користат, што е обврска според член 39 од Законот за употреба на пиротехнички средства, вели Бојан Цветаноски, претседател на ЛК СДММ Прилеп.
„Но што е клучно. На документот стои ознака со број 23.23.5.5188/2.
Според нашите информации ова е интерна ознака, која не ја става известителот, туку ја додава началникот на СВР по приемот на актот. Тоа значи, оваа ознака не може да биде дел од документот што го објавува УМС туку е службена ознака по прием. Со други зборови, оваа хартија што се обидоа да ја протнат како легален документ постои голема веројатно дека не е релана“.
Очекува, како што нагласи, одговори од МВР и Панче Тошковски и праша дали е ова фалсификат.
Според него, нема правда ако институциите фалсификуваат документи за да ги штитат партиските членови на ВМРО-ДПМНЕ.
Ако ова се потврди, ќе бараме, потенцира Цветаноски, кривична одговорност за сите инволвирани, од извршителите до политичките наредбодавци.