„Европските вредности не препознаваат дискриминација според родовата припадност, а ние неопходно е да ги следиме процесите и да учествуваме во креирањето рамноправно општество, кое нуди еднакви можности за сите и кое ги вклучува жените како идентичен фактор во креирањето иднина на државата. Ми претставува задоволство тоа што ОБСЕ има спроведено истражување токму во судството со фокус на прашањето за родова еднаквост и функционалноста на судскиот систем во ситуација во која ние имаме жени на високи позиции, но и голем број жени судијки. Но, оваа студија на ОБСЕ исто така преку препораките илустрира еден посовршен систем во кој е изолирана дискриминацијата не само по родова припадност туку и по етничка, со потенцирање на човековите права на помалите заедници, односно женските припаднички, кои се соочуваат со нееднаков третман при упис на Академијата за судии и јавни обвинители или при огласите за вработување“, истакна претседателката на Судскиот совет, Павлина Црвенковска, при промоцијата на публикацијата на ОБСЕ посветена на родовата еднаквост и разноликост во судството.

Студијата на ОБСЕ наведува поголем број категории граѓани, на кои им се скратуваат некои права при водење судски постапки, со што им се загрозува правото на правда. Со постоењето вакви случаи се нарушува легитимитетот на судството, а државата е во фаза во која е неопходно да покаже високо ниво на правичност, еднаквост и почитување на човековите права како важен предуслов за судство без дискриминација, она што од нас го бараат и европските вредности.

„Сите препораки укажуваат на недостатоци на судскиот систем, кои ја поттикнуваат дискриминацијата, а потоа тоа влијае на оценките за судството и создава граѓани што ја губат довербата. Затоа мислам дека колку и да имаме направено за родовата еднаквост или за недискриминацијата по етничка основа, ние и понатаму мораме да развиваме механизми за заштита на сите граѓани, и тоа и на оние што се дел од судството или конкурираат да бидат дел и на оние кои се од другата страна – странките во судските постапки“, дополни Црвенковска.