Во текот на вчерашниот ден противпожарните тимови интервенирале на вкупно 10 пожари на отворен простор и сите ги изгаснале, според извештаите во Секторот за операции и координација во Центарот за управување со кризи (ЦУК). Денеска, временските услови се повлажни и се надеваме дека нема да има многу пожари, велат од ЦУК.

При вчерашните десет пожари гореле сува трева, ниска вегетација, деградирана, а и мешана и борова шума, лозја, овоштарници, капини, депонии, отпадоци и слично.

Регионалниот ЦУК Скопје информира дека пожарникарите од БППЗ на Град Скопје во изминатото деноноќие ги бележат следните интервенции: во периодот од 10.30 до 13.35 часот гаснеле запалено ѓубриште кај спортската сала „Борис Трајковски“. Во гаснењето на пожарот интервенирале со две противпожарни возила и пет пожарникари. Зафатена била површина од 1.500 м2 во општина Карпош. Во периодот од 13.50 до 15: часот гаснеле запален сува трева покрај улицата Бел камен, при што во гаснењето на пожарот интервенирале со едно противпожарно возило и 4 пожарникари. Зафатена била површина од 4.000 м2 во општина Бутел. Во периодот од 21.22 до 22.55 часот, на улицата Иван Манолев во општина Бутел, гаснеле запален двор – запалена барака и шупа, а во гаснењето на пожарот интервенирале со 4 противпожарни возила и 12 пожарникари.

Регионалниот ЦУК Битола информира дека пожарникарите од ТППЕ Битола во периодот од 16.45 до 18 часот со едно противпожарно возило и 3 пожарникари интервенирале на запалена ниска вегетација кај селото Долно Српци во општина Битола; ТППЕ Демир Хисар во периодот од 14.30 до 15.35 часот со едно противпожарно возило и двајца пожарникари интервенирала на ниска вегетација во атарот на селото Обединик во општина Демир Хисар; ТППЕ Прилеп од 16.25 до 17.10 часот со едно противпожарно возило и тројца пожарникари интервенирала на запалена ниска вегетација меѓу касарните и „Дата центар“, кај депонијата во Прилеп, во општина Прилеп.

Регионалниот ЦУК Штип ја пренесува информацијата од ТППЕ Берово во која се наведува дека во периодот од 15.15 до 17.15 часот интервенирале на запалена ниска вегетација во близина на викенд-населбата Суви Лаки. Во гасењето на пожарот интервенирале со едно противпожарно возило и двајца пожарникари и се вклучило и месно население, како и две лица од граничната полиција. Имале и мала интервенција во близина на истата локација (општина Берово).

Регионалниот ЦУК Куманово ја пренесува информацијата од ТППЕ Куманово во која се наведува дека во периодот од 13.10 до 16.05 часот со едно противпожарно возило и тројца пожарникари интервенирале на запалена ниска вегетација и појаси од багреми во населбата Долно Којнари во општина Куманово; и ТППЕ Крива Паланка бележи една помала интервенција во општина Крива Паланка.