Македонија
ЦУК: Осум активни пожари, еден под контрола, 12 се изгаснати

Центарот за управување со кризи (ЦУК) информираше дека до 18:30 часот евидентирани се вкупно 21 пожар, од кои осум се уште се активни, дванаесет се изгаснати, а еден е ставен под контрола.
Од активните пожари, во Дојранско и натаму гори во атарот на селото Николич, каде ситуацијата е сериозна и бара постојана интервенција. Во Велешко, активни се пожарите кај селата Џидимирци и Крушје, а во Виничко, пожар има во атарот на село Ласки.
Во општина Македонски Брод, активен е пожарот кај село Локвица, додека во Гостиварско, огнот зафаќа подрачје во близина на селото Чегране. Активен е и пожарот во општина Куманово – Липково, на потегот над село Умин Дол кон село Никуштак.
Во Скопскиот регион, активни се два пожара – едниот во општина Чучер-Сандево, на потегот од село Горњани кон село Блаце, во близина на магистралниот пат, а вториот во општина Шуто Оризари, на улицата „Индира Ганди“.
Под контрола е ставен пожарот во општина Македонски Брод, на подрачјето меѓу селата Црешнево, Крапа, Слатина и Девич.
Изгаснати се 12 пожари, меѓу кои пожарот во близина на село Горњани – општина Чучер Сандево, во близина на стадионот на Гостивар, во ресенското село Перово, во општина Куманово, во кругот на фабриката на ФЗЦ и во месноста викана Пармакови ниви. Изгаснати се и пожарите во општина Старо Нагоричане, кај селата Пелинце и Милутинци, општина Крива Паланка, кај село Градец, во месноста викана Ѓошинска мала.
Два пожара се изгаснати во Охрид, кај селото Оровник и кај населбата Далјан. Во Прилепско се изгаснати пожарот покрај патот од хотел „Салида“ кон Битола и пожарот меѓу селата Лажани и Ропотово.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Свежо утро, а преку ден до 33 степени

Времето денеска ќе биде сончево со мала до умерена локална облачност. Ќе дува слаб до умерен, а вдолж Повардарието повремено засилен северен ветер.
Минималната температура ќе биде во интервал од 9 до 19, а максималната ќе достигне од 25 до 33 степени.
Во Скопје, сончево со умерена облачност. Ќе дува слаб до умерен северен ветер. Минималната температура ќе се спушти до 16, а максималната ќе достигне до 30 степени.
До средината на следната седмица ќе преовладува претежно стабилно време со дневни температури малку под просекот за овој период од годината. Потоа времето ќе биде сончево и потопло со пораст на дневната температура.
Македонија
(Видео) Елитната полициска единица ЕБР прослави 24 години постоење

Со свечена церемонија вечерва на градскиот плоштад во Кавадарци беше одбележан 23 август – Денот на Единицата за брзо распоредување (ЕБР) и 24 години од формирањето на оваа елитна полициска единица при Министерството за внатрешни работи. Настанот се одржа во присуство на премиерот Христијан Мицкоски, раководството на МВР, министри, пратеници, претставници на институциите и локалната самоуправа, полициските синдикати, како и семејства на загинати и починати припадници на ЕБР.
Граѓаните на Кавадарци имаа можност да се запознаат со опремата на единицата преку концептот „До вас, за вас“ и да се дружат со припадниците на полицијата.
Министерот за внатрешни работи, Панче Тошковски, во своето обраќање истакна дека ЕБР е симбол на сигурност и доверба, формирана врз темелите на професионализам, пожртвуваност и верност кон државата.
„Во изминатите две и пол децении, ЕБР се втемели како симбол на сигурност и брза реакција, вистински штит на државата и граѓаните. Ниту еден припадник не се двоуми да преземе одговорност и да дејствува во најризични ситуации, каде што секунда одлука може да значи спас на човечки животи“, порача министерот Тошковски.
Тој додаде дека токму оваа единица има незаменлива улога во борбата против криминалот и корупцијата.
„Разбиени се опасни криминални групи, расветлени стотици дела, запленета е дрога која ќе завршеше кај младите, спречени се илјадници обиди за нелегален влез во државата. Дојде време да покажеме дека државата е посилна од криминалот и дека институциите ја враќаат довербата кај граѓаните“, истакна Тошковски.
На свеченоста зборуваа и досегашниот командант на ЕБР, Зоран Јанаќијев, кој даде свое видување за иднината на единицата, како и градоначалникот на Кавадарци, Митко Јанчев, кој ја поздрави иницијативата „До вас, за вас“.
Беа доделени плакети на најистакнатите припадници на ЕБР, а претходно во текот на денот беше положено свежо цвеќе пред спомен-обележјето во чест на загинатите херои на единицата.
Македонија
„Корумпираната држава ни ги украде децата“, потресни сцени на маршот во Кочани

Родителите, семејствата и пријателите на младите кои трагично ги загубија животите во пожарот во дискотеката „Пулс“ повторно одржаа марш во Кочани. Повторно се гледаа солзи, тишина и болка, а поворката ја следеа фотографии на загинатите кои нивните родители ги носеа во рацете.
„Корумпираната држава ни ги украде децата. Корупцијата ни го одреди местото каде да ги славиме нивните родендени – на гробиштата. Ни го украдоа сонот, ни ја скратија иднината, а болката ја претворија во наша секојдневна реалност. Бараме правда за нашите деца, бараме крај на корупцијата“, пишуваше на еден од транспарентите.
Слична порака се појави и на друг транспарент: „Моето дете умре, беше убиено од систем кој не штити, туку убива.“
Особено емотивен момент предизвика Мита Тасева, мајката на загинатиот диџеј Стефан Тасевски, чиј роденден се совпадна со маршот.
„Денес небото одекнува од твојата музика, синко наш. Слави го роденденот со ангелите“, порача таа, оставајќи длабока тишина меѓу присутните.
„Ние, родителите, скапо го плативме данокот на корупцијата“, стоеше напишано до фотографиите на младите кои повеќе не се меѓу живите.
Овој марш уште еднаш ја отвори болната тема за безбедноста, одговорноста на институциите и вечната битка на родителите – правдата за своите деца.