Засега не е регистриран пораст на заболувања што може да бидат предизвикани од натрупаното ѓубре на улиците во Скопје, велат лекарите од Институтот за јавно здравје (ИЈЗ), кој во реално време добива податоци за сите пријавени заболувања во земјата. Институтот денес препорача мерки за заштита на населението додека не се исчисти градот од ѓубрето.

„Често миење раце, дезинфекција на раце по одлагање на отпадот, носете и ракавици доколку е можно при одлагањето на отпадот. Се препорачува одлагањето на отпадот граѓаните да го прават на места што се обележани, контејнери, да не одлагаат надвор од овие места за да не се создаваат депонии, кои дополнително ја контаминираат средината. Исто така, да внимаваат со домашните миленици кога доѓаат во контакт со отпад. Вработените што го собираат отпадот треба да имаат лична заштитна опрема и секако да бидат заштитени од оние блести што може да се спречат со вакцинација, односно редовно да бидат вакцинирани во согласност со нивната професија“, рече Драган Кочински, раководител на секторот Епидемиологија во ИЈЗ.

За трајно надминување на состојбите, тој препорача дека е неопходно да се почне со селекција на отпадот уште дома, процес што на почетокот би бил волонтерски и би предвидувал некаква награда за оние што ќе селектираат сѐ додека не се воведе законски.

Кочински уверува дека и покрај исклучително големата нехигиена во Скопје изминативе неколку недели, засега не е забележан пораст на заболувања што може да бидат предизвикани од расфрланото ѓубре.

„Тука се цревните заразни заболувања, салмонелози, гастроентероколити, кои може да се јават. Ние ја следиме состојбата и засега нема пораст на бројот на заболени од овие заболувања, а во однос на заболувањата што ги пренесуваат глодачите, кои се карактеристични за нашата земја, тука спаѓаат туларемија, хеморагична треска со бубрежен синдром и лептоспирозата, кои веќе сме ги регистрирале, а можно е да се појават сега со зголемениот број глодачи. Сѐ додека постојат поволни услови за нивно размножување, со присуството на отпадот сѐ повеќе и повеќе се зголемува популацијата на глодачите, а тоа претставува ризик за населението, односно ширење на болестите“, рече Кочински од ИЈЗ.

Мирајана Димоска, раководителка на одделението за безбедност на вода и санитација на животната средина во ИЈЗ, препорача дека е добро училиштата да постават дезинфекциски бариери на праговите и фотографии за правилно миење раце според возраста, а оваа препорака за дезинфекциски бариери рече дека е добро да ја послушаат и сите граѓани за становите за да спречат внесување нечистотија во домовите.

Директорката на Институтот, Марија Андоновска, рече дека на сите општини, како и на Град Скопје, им е препорачано да направат вонредна дезинфекција, дезинсекција и дератизација.