Македонија
Чулев во посета на полицијата во Кичево и Гостивар: Приоритет е да се организираат демократски и безбедни избори

Министерот за внатрешни работи, Наќе Чулев во рамки на денешните работни обврски ги посети одделенијата за внатрешни работи во Кичево и Гостивар. Во рамки на посетата оствари работни средби со раководството на двете организациски единици. Во фокусот на двете средби беше организација на парламентарните избори и мерките и активности кои се преземаат за справување со криминалот и активностите кои се преземаат за спречување на понатамошно ширење на коронавирусот.
На територијата на ОВР Кичево во првото полугодие не се евидентирани посериозни кривични настани, а како факт кој беше потенциран е успехот на оваа организациска единица во делот на санкционирање на сторителите на недозволена сеча на шуми што е дел од оперативната акција „Гора“, за што говори и фактот дека во изминатиот период е поднесена кривична пријава против раководителот на подрачната единица на Македонски Шуми во Гостивар.
На територијата на ОВР Гостивар во однос на пандемијата од Ковид-19, во овој момент има 8 кластери и истите се под контрола, полициските службеници секојдневно преземаат мерки за контрола на лицата во изолација и самоизолација со цел спречување на понатамошно ширење на вирусот. Од страна на раководството на двете одделенија за внатрешни работи беше нагласена подговеноста за спроведување на парламентарните избори за кои се очекува да поминат во најдобар ред. Министерот Чулев потенцираше дека професионалното постапување на полициските службеници не треба да биде предмет на компромис кога е во прашање политиката, затоа што крајна цел на Министерството за внатрешни работи е организирање на фер, демократски и безбедни избори и оваа цел може да се постигне само со професионално и одговорно постапување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Повеќе разводи од кога било во Македонија, а бракот станува реткост

Сѐ повеќе бракови завршуваат со развод, иако некогаш тие се сметаа за вечни, сепак статистиката го потврдува овој тренд.
Според податоците на Државниот завод за статистика, во последниот квартал од 2024 година биле регистрирани 601 развод, што е зголемување од 23,9% во споредба со истиот период претходната година. Истовремено, бројот на склучени бракови се намалил за 14,7%, односно биле регистрирани 2.430 бракови.
Според социолошките анализи, една од главните причини за зголемениот број разводи е избрзаното стапување во брак, без доволно запознавање меѓу партнерите. Недостатокот на комуникација, различните животни вредности, како и финансиските проблеми, исто така, играат значајна улога во распадот на брачните заедници. Дополнително, социолошките фактори, како што се мешањето на семејствата во брачниот живот или неможноста на младите парови да живеат самостојно, често предизвикуваат тензии што водат кон разделба.
Освен кај браковите, статистиката покажува и пад на бројот на раѓања. Во последниот квартал од 2024 година се родени 3.968 деца, што претставува намалување од 4,2% во однос на истиот период лани. Бројот на починати изнесува 5.174 лица, од кои 10 доенчиња, што е пад од 1,0% во однос на истиот квартал во 2023 година. Природниот прираст останува негативен, со разлика од -1.206 меѓу бројот на новородени и починати.
Овие податоци укажуваат на континуирани демографски промени, кои во иднина може да имаат сериозни социоекономски последици.
Македонија
Мицкоски: Нема договор за паркингот на Клинички, јавноста ќе одлучи

Премиерот Христијан Мицкоски изјави дека Владата сè уште нема донесено одлука и дека договорот со албанската компанија за стопанисување со паркингот на Клиничкиот центар во Скопје не е потпишан.
„Ако јавноста вели ‘не сакаме’, тогаш нема да го потпишеме“, нагласи тој, демантирајќи дека веќе е донесена конечна одлука.
Според Мицкоски, процесот се води врз основа на физибилити-студија направена од претходната влада, а на огласот се пријавила само една компанија – албанскиот оператор „Ѓока Констракшн“. Тој нагласи дека иако сè е според закон, конечната одлука зависи од реакцијата на јавноста.
„Паркингот моментално го стопанисува ‘Градски паркинг – Скопје’. Ако тие можат да направат ред, немаме ништо против, важно е граѓаните да имаат нормални услови“, додаде премиерот.
Медиумите претходно објавија дека, доколку приватниот оператор го добие договорот, ќе мора да инвестира во катни гаражи, но ќе може да наплаќа паркинг по цена од 50 наместо 30 денари од час, додека државата би добивала само 1% од приходите.
Скопје
Марш за женски права во Скопје, жените бараат крај на дискриминацијата

Денеска во Скопје се одржа марш организиран од Платформата за родова еднаквост, со слоганот „Нека јадат ружи!“. Поводот беше Меѓународниот ден на жената, кога се истакнаа важни барања за подобрување на правата на жените во општеството.
Организаторите потсетија дека 8 Март не е само ден за симболични гестови, туку и за феминистичка борба за слобода и правда.
„Жените не се безбедни ниту во својот дом, ниту на улица“, беа дел од изјавите на организаторите, кои истакнаа и важноста на борбата за еднакви права во работниот простор, каде што жените се соочуваат со сексуално вознемирување, мобинг и дискриминација.
Тие ја нагласија потребата од значајна промена на политиките за родово базирано насилство и повикаа на зголемена вклученост на жените во урбанистичкото планирање, како и на борба против работната дискриминација. „Не ќе молиме полиција и обвинителство да постапуваат навремено, туку ќе продолжиме да се бориме за вистинска заштита на жртвите на насилство“, нагласија тие.
Овој ден беше потсетник за сите жени ширум светот, дека родовата еднаквост е прашање на општествено унапредување, а не само симболички празник.