Филипче е континуитет во начинот на практикување на политиката на Заев, а екс вицепремиерот Фатмир Битиќи олицетворение на таа пракса.

Дали во СДС е пракса или насока и стил на функционирање изнесувањето на класифицирани документи од институциите и дали подоцна истите тие документи им служат за уцени и злоупотреби, прашуваат од ВМРО-ДПМНЕ.

Самиот Фатмир Битиќи, во изјава за медиуми, како што истакнуваат, во врска со грабежот во неговиот дом кажа дека му е одземена папка со класифицирани документи.

Битиќи, бараат од владејачката партија, да одговори на јавноста за какви класифицирани документи станува збор, како се нашле во неговиот домашен сеф, поради кои причини ги поседува и за што би му послужиле истите.

„Дали поседува сертификат, бидејќи класифицирани документи добиени од кој и да е орган не можат да поседуваат лица без безбедносен сертификат.

Битиќи да одговори дали станува збор за содржина од највисока државна тајна? Дали евентуалното изнесување на тие информации би ја загрозиле безбедноста на државата и институциите на системот?“

Со оглед на тоа дека државните функционери немаат право да ги изнесуваат државните тајни и класифицирани документи од институциите во кои тие се наоѓаат и каде се заштитени, од ВМРО-ДПМНЕ, ги повикуваат СДС и Битиќи веднаш да ги известат органите за каков вид на информации станува збор.

Битиќи, потенцираат од партијата на Мицкоски, не смеел такви документи да поседува во својот домашен сеф.

„Колку закони прекршил Битиќи? Го повикуваме ЈО да поведе постапка и да го истражи случајот со украдените документи. Одговорност мора да има“.

Формирана е заедничка работна група меѓу Северна Македонија и Косово за стратешкиот проект за изградба на патот Тетово-Призрен, информираат од „Вреди“.

Ова, како што велат е проект кој со години, според нив, бил сон за граѓаните, а сега со конкретни чекори го претвораат во реалност.

„Со формирањето на оваа група започнуваме нова фаза на дејствување и посветеност. Преку овој проект ќе поврземе два историски града и ќе го олесниме движењето на граѓаните. Дел од оваа работна група од коалицијата „Вреди“ е и заменик-министерката за Транспорт, Калтрина Зеколи Шаќири, која ќе ги надгледува сите потребни процедури, со цел овој проект да започне што поскоро и да оди напред со незапирливо темпо. Ние сме за промени, не за ветувања, туку за конкретни резултати. Затоа што граѓаните заслужуваат проекти кои директно влијаат на нивните животи, а овој пат е еден од најважните“.

Имињата на членовите на групата, според соопштеното, се веќе избрани од двете страни. Во иднина се очекуваат блиска координација и брзи чекори кон фазата на дизајнирање и потоа имплементација на терен.

Буџетот, соопшти „Вреди“ за фазата на проектирање на тунелот е веќе распределен во годишниот буџет на нашата држава, што, како што оценуваат, гарантира финансиска стабилност и волја овој проект да се заврши до крај.

Патот Тетово-Призрен ќе стане реалност, прецизираат од коалицијата.

Премиерот Мицкоски, со своето однесување, изјави и постапки, постапува на начин кој ги поткопува стандардите и одговорноста што се очекуваат од еден државен лидер, реагираат од ДУИ.

„Однесување што можеби би му се толерирало на претседател на партиска општинска организација, но никако на премиер на мултиетничка држава.

Тој урива сè што е градено со труд и посветеност со години – меѓуетничките односи, довербата меѓу граѓаните, лојалноста и чувството на заедништво во оваа држава.

Со напаѓање на клучните столбови на Охридскиот мировен договор – јазикот, балансерот, правичната застапеност, легитимитетот и Инспекторатот за употреба на јазиците – тој го доведува во прашање унитарниот и интегративен карактер на државата“, велат од ДУИ.

Прашуваат, ако целта е уривање на Охридскиот договор – која е алтернативата?

„Зашто во политиката нема вакуум. Ако толку жестоко се спротивставувате на договорот што донесе мир, интеграција, децентрализација и зачувување на унитарноста, тогаш мора отворено да кажете што нудите на негово место“.

Граѓаните, додаваат од ДУИ прашуваат, и сè повеќе се загрижени.

„Ако има намерна промена на државниот курс, тогаш време е за отворена и искрена дебата за тоа која е алтернативата на Охридскиот договор.

Бидејќи ние не можеме бесконечно да ја носиме одговорноста за неговата неодговорност“, посочуваат во реакцијата од партијата на Ахмети.