Македонија
Шахпаска: Унапредувањето на родовата еднаквост е наша обврска

Родовата еднаквост претставува заедничка обврска и приоритет на Владата и како таква таа е дел од програмата на Владата 2020-2024 година и агендата за одржлив развој во 2030 година како на национално така и на локално ниво, истакна министерката за труд, Јагода Шахпаска.
Таа учествуваше на работата на Комисијата за статусот на жените на Обединетите нации, која се одржува од 15 до 26 март 2021 година на тема „Целосно и ефективно учество на жените во донесување одлуки во јавниот живот и зајакнување на жените“.
Шахпаска потенцира дека Владата преку своите механизми во претходниот период постигнала значајни резултати во постигнувањето на родовата еднаквост.
„Донесени се Законот за спречување и заштита од дискриминацијата, кој е целосно усогласен со меѓународните стандарди, и Законот за спречување и заштита од насилство врз жените и семејното насилство, целосно усогласен со Истанбулската конвенција. Министерството за труд и социјална политика почна процес на изготвување на новата стратегија за родова еднаквост 2021-2026 година“, рече Шахпаска.
Таа најави дека во наредниот период фокусот на работата ќе се насочи кон подготовка на новиот закон за родова еднаквост, со кој се очекува да се подобрат механизмите за родова еднаквост на национално и на локално ниво, како и формирање центар за обука на родово одговорно буџетирање, што ќе биде континуирано образование за целата родова машинерија во земјата.
Шахпаска истакна дека Министерството ќе продолжи да работи на креирање политики и мерки за вработување, кои ќе ја намалат неактивноста на жените на пазарот на трудот, политики што го регулираат родителското отсуство, заштита на работното место, флексибилно работно време и работа со скратено работно време и работни места за мајки како дел од измените и дополнувањата на Законот за работните односи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Променливо облачно време повремено со пороен дожд и грмежи

Времето денес ќе биде променливо облачно и посвежо, претпладне со повремено пороен локален дожд, грмежи и услови за појава на краткотрајно невреме. Ќе дува слаб до умерен западен, а долж Повардарието северен ветер, кој попладне наместа ќе засилува. Максималната температура ќе биде во интервал од 27 до 35 степени.
Во Скопје, променливо облачно, во претпладневните часови со повремен пороен дожд и услови за појава на ретки грмежи. Ќе дува слаб до умерен, попладне во делови од котлината повремено засилен северен ветер.
Максималната температура ќе достигне до 33 степени.
Македонија
Комисијата утврди дискриминација врз професионалните војници – синдикатот бара итни законски измени

Комисијата за спречување и заштита од дискриминација утврди индиректна дискриминација врз професионалните војници од страна на Министерството за одбрана, информира Независниот синдикат на професионални војници СО Скопје.
Претставката до Комисијата ја поднел Александар Насковски, претседател на синдикатот и професионален војник, на 12 ноември 2024 година. Според него, Министерството со години не го трансформира работниот однос на професионалните војници од определено на неопределено време, спротивно на член 46 од Законот за работни односи.
„Професионалните војници се единствената категорија вработени во државата кои работат и по 25 години со договори на определено време, често продолжувани и по седум или осум пати, без можност да остварат право на пензија“, изјави Насковски.
По долготрајна институционална игнорација, синдикатот на 3 јуни 2025 година достави предлог-закон за изменување и дополнување на Законот за служба во Армијата до Собранието и сите пратенички групи. Со предложените измени се предвидува конечно уредување на статусот на професионалните војници и спроведување на препораките од Комисијата.
Синдикатот очекува Министерството за одбрана и пратениците да постапат по препораките и да ја исправат, како што велат, децениската неправда, со што ќе се постигне и буџетска заштеда за институцијата.
Македонија
Ангелов на состанок во Берово: Планирање на акција за справување со пожарот над Русиново

Раководителот на Главниот штаб за управување со кризи и директор на Дирекцијата за заштита и спасување (ДЗС), Стојанче Ангелов, синоќа присуствуваше на координативниот состанок на Општинскиот штаб за заштита и спасување во Берово, предводен од градоначалникот Звонко Пекевски.
На работниот состанок се анализираа извештаите за движењето и интензитетот на пожарот во планината над селото Русиново. Како главни предизвици беа посочени променливиот ветер, остатоците од стари пожари – шупливи дрвја кои при горење паѓаат по стрмнините – како и непристапниот терен, што значително го отежнува гаснењето.
Според соопштението од ДЗС, состанокот траел подолго поради разгледување на повеќе стратегии за утринска интервенција. Се планира комбинирана акција со теренски сили, механизација и ангажман на воздухоплови, чија активност ќе се координира од земја во согласност со конкретните дневни услови.
Ова е дел од континуираните напори за справување со активните пожари во источниот дел на земјата.