Македонија
Шаќири: Ако децата уште од најрана возраст научат да ги почитуваат поинаквите од себе по религија и култура, нема да има конфликти

Според министерот за образование Јетон Шаќири, најголемо влијание на меѓусебното разбирање и почитување, вклучително и почитувањето на верските разлики, има токму образованието.
„Ако децата уште од најрана возраст научат дека не сите луѓе се исти, научат да ги почитуваат поинаквите од себе по религија, култура, државата ќе биде ослободена од грижите дека некогаш ќе се појават внатрешни конфликти меѓу граѓаните, а причина ќе биде токму религијата“, истакна Шаќири на отворањето на „Првата светска конференција за религиски дијалог и соработка“, на која Македонија е домаќин, а се одржува во Струга во организација на Министерството за култура.
„Ние што ги креираме образовните политики, посветуваме особено внимание на овој аспект. Денес, нашите деца имаат предмети посветени исклучиво на запознавањето на религиите. Ги продлабочуваат знаењата за сопствената, но и за другите религии. Учествуваат во воннаставни активности и проекти, кои го развиваат мултикултурализмот и создаваат силни врски помеѓу различните етнички и верски заедници“, рече Шаќири.
„Промените во образовниот систем се стратешки потег, со кој, покрај другите ефекти што ќе се постигнат од аспект на создавање уште поквалитетни генерации, ценам дека ќе се даде голем придонес во зачувувањето на општествениот мир и хармонија, токму поради подигнувањето на свеста за почитување на различностите“, нагласи министерот.
Посакувајќи успешна конференција, Шаќири ги повика сите учесници да се вклучат во дискусиите во следните денови бидејќи, како што рече, така ќе придонесеме за унапредување на религиската соработка и со тоа кон градењето на светот како подобро место за живеење.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јанев на заокружување на обуката „Истрага на местото на настанот“, насочена кон унапредување на истражните капацитети на полициските сили

Директорот на Бирото за јавна безбедност Александар Јанев присуствуваше на свеченоста за доделување на дипломите, што се одржа во Центарот за обука на полицијата во Идризово, заедно со помошник министерот за внатрешни работи и началник на Центарот за обука, Влатко Митковски, како и со амбасадорот на Италија во нашата земја, Н.Е. Паоло Палминтери.
Обуката беше реализирана од Вишиот институт за истражни техники на карабинерите на Италија, со организациска поддршка од Италијанската амбасада во Скопје.
Учесниците на курсот имаа можност да стекнат напредни знаења и практични вештини за истражување на место на настан, притоа следејќи современи европски и меѓународни стандарди.
“Посебна благодарност упатувам до италијанските експерти за нивниот професионален ангажман и пренесеното знаење и сакам да истакнам дека како институција, особено ја цениме оваа соработка што претставува значаен чекор кон унапредување на капацитетите на нашата полиција и поддршка на владеењето на правото”, истакна директорот Јанев, додавајќи дека ова е уште еден показател за успешната и стратешки ориентирана билатерална соработка со Италија во областа на безбедноста и претставува дел од заедничките напори за градење побезбедно и посилно општество.
Македонија
Николоски учествува на висок министерски форум во Истанбул

Вицепремиерот и министер за транспорт Александар Николоски денеска и утре учествува на Форум за министри за транспорт што се одржува во Истанбул.
Во планираната агенда е предвидено обраќање на вицепремиерот Николоски на панелот насловен ,, Иновативни можности и решенија за финансирање на транспортни коридори” .
На Форумот ,,Глобална Транспортна Поврзаност” предвидено е да се обрати претседателот на Турција, Реџеп Таип Ердоган, министерот за транспорт на Турција, Абдулкадир Уралоглу како и други министри од Европа и светот.
На настанот ќе земат учество и бројни министри како што се министерот за транспорт на Шпанија, на Албанија, на Саудиска Арабија, Сингапур, Црна Гора, Обединетите Арапски Емирати, како и многу други високи претставници од институции од областа на транспортот.
Македонија
Сиљановска-Давкова прими припаднички на Армијата кои успешно завршија обука во САД

Претседателката Гордана Сиљановска-Давкова ги прими капетанката Неда Волчева и поручничката Сара Тасевска кои успешно го завршија седуммесечниот курс „Maneuver Captain’s Career Course“во Џорџија, САД, организиран од американскиот тренинг центар „Fort Moore”.
На средбата на којашто присуствуваа началникот на Генералштабот на Армијата, генерал-мајор Сашко Лафчиски и американската амбасадорка Анџела Агелер, двете припаднички на Армијата ја запознаа претседателката со фазите, содржините и квалитетот на воено-образовната обука и ги споделија нивните натамошни планови, заложби и амбиции за кариерен напредок.
Препознавајќи во нив потенцијал за идни генерали, Сиљановска-Давкова им честиташе на Волчева и Тасевска за успешно завршената обука и изрази уверување дека стекнатите знаења, вештини и експертиза ќе ги применат во интерес на македонската армија.
Според неа, реализацијата на оваа програма претставува влог во македонско-американското партнерство и е посебно значајна за промоција на земјава како лојален и кредибилен сојузник во НАТО.
Признавајќи ги одличните резултати што ги постигнуваат жените, соговорниците се согласија дека нивното партиципирање во меѓународните обуки треба да биде редовна пракса.
Сиљановска-Давкова на средбата ја реафирмираше својата заложба за формирање на Регионален центар за извонредност за жени, мир и безбедност со седиште во Скопје, заради промоција на жените во безбедноста и одбраната во регионот.