Македонија
Шаќири: Тетово добива државен студентски дом, објектот е изграден и во моментот се опремува

Новиот студентски дом, кој се гради за потребите на Универзитетот во Тетово, се очекува да биде подготвен за прием на студенти идната академска година. Градежните работи се целосно завршени, а во моментот етапно се опремуваат собите и сите други простории, кои ќе им бидат на располагање на студентите што студираат или во иднина ќе одлучат да студираат на овој државен универзитет и ќе имаат потреба од сместување.
Увид во активностите изврши министерот за образование и наука, Јетон Шаќири, заедно со заменик-министерот Агим Нухиу, ректорот на универзитетот, проф. д-р Куштрим Ахмети, и претседателот на универзитетскиот Сенат, проф. д-р Вулнет Амети. Шаќири информира дека се работи за крупна инвестиција што ја реализира Министерството за образование и наука и таа е во последна фаза на реализација. Ќе следува партерно уредување и приклучување на студентскиот дом на водоводната и електричната инфраструктура во градот.
„Тетово ќе добие комплетен универзитетски кампус. Освен објектите во кои се изведува наставно-научната дејност, со изградбата и пуштањето во употреба на студентскиот дом, државниот универзитет ќе може да понуди комплетна услуга за идните академски граѓани и очекувањата се дека ќе привлече значително зголемен број студенти во следниот период. Тука недостигаше сместувачки капацитет и со заложба на Владата тој се гради во согласност со сите современи стандарди за квалитет“, изјави Шаќири додавајќи дека новиот студентски дом ќе може да прими околу 300 студенти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ивановска: Претседателката на ДКСК мора под итно да си поднесе оставка, на потег е Собранието

Претседателката на Државната комисија за спречување на корупцијата (ДКСК), Татјана Димитровска, мора итно да си поднесе оставка, затоа што на овој начин сè уште ја инфицира институцијата, порача поранешната претседателка на ДКСК Билјана Ивановска.
Според Ивановска несомнено е нанесен тежок удар врз општеството, граѓаните и институцијата, нагласувајќи дека не е момент да се седи со скрстени раце. На потег, вели, сега е законодавниот дом пред кого одговараат и претседателката и членовите на Антикорупциската комисија.
Димитровска минатата недела се најде на листата осомничени во случајот „Адитив“ поради оддавање службени тајни на друг обвинет во случајот.
Македонија
Богојески ја менува постапката за избор на надворешни експерти за оценување на проектите и апликациите за Еразмус+

Националната агенција за европски образовни програми и мобилност го објави почетокот на клучна постапка, а во рамки на заложбите за транспарентност и борба против корупцијата.
Денес, директорот на Националната агенција, Петар Богојески, донесе нова процедура за постапката за избор на надворешни експерти/евалватори за оценување на предлог-проекти и/или периодични и конечни извештаи од одобрени проекти, како и за апликации во рамките на програмите Еразмус+ (2021–2027) и Европски солидарен корпус (2021–2027).
Во таа насока, како што посочуваат од Националната агенција, ќе следува целосна реевалуација на постојните евалватори, согласно највисоките професионални стандарди и етички норми. Потоа, ќе биде објавен нов јавен повик за избор на професионални и департизирани евалватори, експерти од различни области, кои со својата стручност и интегритет ќе придонесат кон натамошно зајакнување на кредибилитетот на Агенцијата.
Со оваа постапка, од Националната агенција велат дека се испраќа јасна порака дека борбата против корупцијата е приоритет и дека се стреми да биде пример за интегритет и професионализам, не само во нашата земја, туку и во земјите членки на Европската унија.
Македонија
Филков : Сите закони, кои се дел од реформската рамка, се подготвени или се во финална фаза на усвојување

Министерот за правда Игор Филков на денешната прес конференција се осврна и на Реформската агенда и законите кои се подготвени или се во финална фаза на усвојување во изминатите 10 месеци.
Подготвени се:
-Предлог Закон за судски совет
-Предлог Закон за јавно обвинителство
– Предлог Закон за платите на јавните обвинители
-Кривичен законик
-Предлог Закон за кривична постапка
-Предлог Законот за судска служба
Во план и подготовка се и:
Предлог Законот за судски буџет
Предлог Законот за Советот на јавни обвинители
Предлог Законот за јавнообвинителска служба
Измени на Изборниот законик, со поддршка на ОДИХР.
Закони со кои се регулираат платите на судиите, јавните обвинители, и јавно обвинителската служба
Закон за слободен пристап до информации од јавен карактер
Закон за помилување
Закон за вештачење
Закон за нотаријат
Закон за извршување
Закон за пробација
Закон за извршување на санкции
Закон за конфискација на имот во граѓанска постапка
Закон за заштита на лични податоци
,,Реформската агенда има рокови до кои законот треба да биде донесен од Собранието. Од друга страна, Годишната програма на Владата опфаќа поранешна фаза — кога законот треба да биде доставен до ЕНЕР или до Владата.
Во просек, собраниската постапка трае два месеца. Кај одредени закони, постојат надворешни фактори.
Изборниот законик, на пример, бара широк политички консензус,”рече министерот за правда Игор Филков.
Министерот порача дека се оди на квалитетни измени и законски решенија во интерес на граѓаните, не како што досега била праксата да се носат во интерес на поединци или какви било интересни групи кои што во минатото ги носеле измените на штета на граѓаните ,на начини на кои што сите ги знаеме.
,,Законите се тука, подготвени, доставени, транспарентно објавени. Ние нема да дозволиме реформите да бидат жртва на дневна политика или бирократска инертност. Затоа ќе повторам: реформите не се желба, туку одговорност. И Министерството за правда таа одговорност ја носи до крај”,потенцира министерот за правда Игор Филков.