Традиционалниот шведски празник Санта Луција во Шведска се одбележува во чест на светлината во темните и долги зимски ноќи, а Амбасадата на Шведска вчера го прослави во Скопје со богат концерт на празнични песни и шведски кулинарски специјалитети.

Новата зграда на Македонската филхармонија беше местото каде повеќе од шестотини гости беа пречекани со мирис на глог – варено вино со бадеми и суво грозје и колачиња со шафран и ѓумбир на прославата на оваа уникатно шведска традиција – своевиден фестивал на светлината и топлината кога скандинавските ноќи се најтемни, а зимата најладна.

Музичката програма на свечениот концерт беше исполнета со божиќни песни, традиционални шведски песни за Луција, како и класични композиции. Настапија женскиот хор „Св. Злата Мегленска“ под диригентската палка на Летка Димовска – Полизова. На сцената им се придружија Билјана Стафансон и Лилјана Јовановиќ Миловановиќ, колоратурни сопрани кои се оперски солисти, придружени од Иван Еминовиќ на пијано и камерниот состав „Пламенка Трајковска“. Свечено звучеа музичките изведби на Ave Marija , Soli Deo Gloria, како и празничната O Helga Natt.

Амбасадорот на Шведска, Матс Стафансон, ја поздрави публиката и го потенцираше значењето на еден од најголемите празници во Шведска, кој се прославува насекаде низ земјата, во домови, училишта и на работни места. Речиси  не постои шведска амбасада низ светот која не организира прослава за Санта Луција. Прикажани беа и кратки филмови кои ја појаснија оваа традиција и ги прикажаа нејзините прослави околу светот.

Денешниот начин на прославување има традиција од речиси еден век, каде главниот лик е Луција – светлоносец кој внесува топлина, светлина и надеж во домовите и срцата на луѓето. Облечена во бела одежда и со круна од свеќи на нејзината глава, Луција се појави и на сцената на Македонската филхармонија, придружувана од нејзините помошнички, од ѕвездени момчиња, мали дедомразовци и ‘колачиња ѓумбирчиња’, кои носејќи свеќи во рацете и во вид на Луција процесија отпеаја песни за Луција и традиционални божиќни песни.

По концертот, гостите беа поканети да ги вкусат подготвените шведски специјалитети. Кулинарската традиција на една земја е многу повеќе од само една книга на рецепти – тоа најавтентично ја отсликува самата природа, обичаите и луѓето на една земја, па така беше и оваа вечер. Мастер-шефот Магнус Албректсон од Шведска, кој меѓу другото е еден од готвачите кои ја имаат подготвувано храната за свечената вечера по повод доделувањата на Нобеловата награда која секоја година ја организира шведското кралско семејство, веќе неколку години по ред е одговорен за менито на најголемите шведски прослави во Скопје. Оваа година тој подготви рецепти кои овозможија да се искуси шведската кулинарска традиција од овој период на годината.