Македонија
Шведската амбасадорка во Белица: Овие краеви даваат можност да се привлечат туристите кои не бараат плажи и хотели со пет ѕвезди
Територијата на Македонија е преполна со скриени „скапоцени камења“, заклучија екоактивистите на завршниот настан на проектот „Зелена комуна Белица“. Жителите на ова кичевско село во изминатата година, ја обновија старата училишна зграда и одржаа низа работилници на тема енергетска самоодржливост, биодиверзитет и климатски промени. Шведската амбасадорка, Ами Ларсон Јаим, која беше дел од завршниот настан во Белица, се воодушеви од иницијативата за самоодржливост на руралните заедници.
„Богатството на овие краеви и на културата даваат многу можности за привлекување на посетители кои бараат различно искуство од масовниот туризам на плажите и на хотелите со пет ѕвездички. За жал населението на многу рурални заедници се намалува и тие се соочуваат со зголемена невработеност, и ограничена инфраструктура. Затоа ме усреќува фактот што можам да привлечам внимание кон иницијативи како оваа каде што локалното население се здружува со граѓанското општество за да вдахне нов живот во заедницата, создавајќи концепт кој ги спојува едукацијата, климатската отпорност и еко-туризмот“, изјави шведската амбасадорка Ами Ларсон Јаим.
Извршната директорка на Македонското еколошко друштво (МЕД), Робертина Брајаноска, во поздравниот говор ја објасни идејата за зелена комуна во Белица.
„МЕД во соработка со Здружението за развој на Белица имаше за цел да почнеме да работиме на воспоставување на зелена комуна, едно етно село кое ќе биде самоодржливо, кое ќе ги користи на одржлив начин природните ресурси и ќе користи обновливи извори на енергија. Иницијатива која ќе поттикне развој на еко-туризам и ќе ги привлече луѓето да се враќаат на своите огништа и да овозможат отворање на можности за дополнителни приходи“, рече директорката Брајаноска.
На завршниот настан презентации имаа Светлана Пејовиќ, координатор на програма во Македонското еколошко друштво и Горазд Смилевски, кои објаснија кои се биолошките и социјалните посебности на ова село, и од кои причини е погодно за реализација на ваков проект.
„Зелена комуна Белица“ е дел од грантовата шема „Граѓанските организации во акција за климатските промени” предводена од Центарот за истражување и информирање за животната средина „Еко свест“, во соработка со Македонско здружение на млади правници и Организацијата за поврзување на природните вредности и луѓето CNVP, а финансиски поддржан од Владата на Шведска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче: ВМРО-ДПМНЕ сака да ја врати Македонија во времето на страв и уцени
ВМРО-ДПМНЕ сака повторно да ја врати Македонија во времето на страв, на уцени и притисоци, но граѓаните нема да потклекнат, рече претседателот на СДСМ, Венко Филипче, на вечерашниот собир во Конче во поддршка на кандидатот за градоначалник од СДСМ, Благој Илиев.
Тој остро ги осуди притисоците врз граѓаните во текот на кампањата, потенцирајќи дека власта на ВМРО-ДПМНЕ се обидува да ги заплаши луѓето преку институциите.
„Со полиција, финансиска полиција, шумска полиција, преку социјалните служби, прават притисок врз граѓаните. Сакаат да потсетат на времето кога сите живеевме во страв и уцени. Но тоа време заврши. Луѓето сакаат нормален живот, без притисоци, без закани, без поткуп,“ рече тој.
Филипче повика на масовна излезност во недела и поддршка за кандидатот на СДСМ, Благој Илиев.
„Да излеземе во огромен број во недела и да го заокружиме бројот 5 за Благој Илиев, човекот кој работи за вас, не за себе. За Конче да продолжи да се развива“, рече Филипче.
Тој кажа дека градоначалниците од СДСМ реализирале 90 до 100 проценти од ветеното.
„Нема општина во која СДСМ има градоначалник, а да ветената програма не е завршена 90 или 100 проценти“, рече Филипче.
Тој истакна дека граѓаните најдобро ја чувствуваат разликата кога општините ги водат луѓе кои работат чесно и посветено во интерес на сите.
„Многу добро знаете како Благојче работеше во минатиот мандат, како се однесуваше додека беше градоначалник, дека вратата му беше секогаш отворена и дека работеше за доброто на општината и на вас, граѓаните“, порача Филипче.
Претседателот на СДСМ во своето обраќање нагласи дека токму оваа разлика меѓу одговорно и неодговорно владеење се гледа насекаде низ државата.
„Нема општина во држава во која што има градоначалник од ВМРО-ДПМНЕ, а да програмата е завршена повеќе од 20 проценти. Како да се натпреваруваат кој помалку ќе работи за граѓаните“, рече Филипче.
Македонија
Претседателката на ЛДП, Моника Зајкова, со поддршка на Горан Герасимовски за втор градоначалнички мандат
Претседателката на ЛДП Моника Зајкова, денеска даде поддршка за втор градоначалнички мандат на Горан Герасимовски, којшто воедно е и актуелен градоначалник на Општина Центар.
Таа, потенцира дека сега е моментот да се изберат резултати, одговорност и отчетност, а не празни ветувања, токму затоа ја дава поддршката на Горан Герасимовски, кој, според Зајкова, ја препознава граѓанската визија, има искуство и е подготвен да работи посветено за доброто на заедницата.
„Одејќи накај Собрание (бидејќи работиме на новиот Предлог- закон за комунална полиција), наидов на предизборните активности на кандидатот за градоначалник на општината во која живеам. Водејќи се од визијата дека на граѓаните им се потребни искусни луѓе кои испорачуваат резултати, а не изговори, упатувам особен повик до сите граѓани кои во првиот круг гласаа за кандидати кои не влегоа во вториот круг: Поддржете кандидат кој ги разбира вашите потреби, кој со своето искуство и посветеност ќе испорача повеќе резултати и веднаш ќе започне со работа – со завршување на започнатите проекти и реализација на нови решенија во интерес на сите нас. Затоа давам поддршка за луѓе како Горан – кои ја препознаваат граѓанската визија, имаат искуство и се подготвени да работат посветено за доброто на заедницата. Сега е моментот да избереме резултати, одговорност и отчетност, а не празни ветувања“, напиша Зајкова, на својата објава на Фејсбук.
Македонија
Утре сончево време со температура до 21 степен
Времето утре наутро ќе биде постудено со услови за појава на магла по одделни котлини и речни долини. Преку денот времето ќе биде сончево со мала до умерена локална облачност. Ќе дува слаб ветер од јужен правец, информира УХМР.
Минималната температура ќе биде во интервал од -3 до 4, а максималната ќе достигне од 16 до 21 степен.
Во Скопје, утрото постудено, во делови од котлината магливо. Преку денот времето ќе биде сончево со мала до умерена облачност. Ќе дува слаб југоисточен ветер. Минималната температура ќе се спушти до 2, а максималната ќе достигне до 18 степени.
Под влијание на висок воздушен притисок следува период на стабилно и суво време со постудени утра, а дневната температура ќе биде во пораст, особено во деновите од викендот. Претпладне по одделни котлини и речни долини ќе има услови за појава на магла

