Македонија
Шекеринска во Вашингтон: Добивме силна поддршка, партнерството со САД продолжува
Заменичката на претседателот на Владата и министерка за одбрана, Радмила Шекеринска ја завршува посетата на Вашингтон. Последниот ден од посетата таа имаше средби со конгресмените Мајк Тарнер и Адам Смит, на кои беа повторени пораките на поддршка за членството на Македонија во НАТО и честитките за одлучноста во решавањето на спорот кој стоеше на нашиот пат кон Алијансата. Беше потврдена одличната билатерална соработка во одбраната меѓу двете земји, која, со новата позиција на Северна Македонија во НАТО, ќе биде интензивирана.
И со конгресмените, Шекеринска зборуваше за потребата од забрзување на ратификацијата на Протоколот за членство, за што поскоро успешно заокружување на процесот на пристапување на земјата како 30.земја членка на НАТО.
„Тоа е важно не само за нашата земја туку за безбедноста на целиот регион и ќе ја прошири пораката низ целиот Балкан, дека со соработка и решенија на проблемите, просперитетот е загарантиран“, рече министерката.
Истата порака за поддршка Шекеринска ја пренесе и на состанокот со Хедер Конли и влијателни американски професори и екперти во Центарот за стратегиски и меѓународни студии (CSIS), на средбата во Меѓународниот републикански институт (IRI) со претседателот Даниел Твининг и на средбата со претседателот на Националниот демократски институт (NDI), Дерек Мичел.
„Ја завршуваме посетата на Вашингтон. По средбата со американскиот секретар за одбрана Шанахен, средбите во Пентагон, во Стејт Департментот, во Белата куќа, имавме и повеќе средби во Сенатот и американскиот Конгрес. На сите средби ја испративме истата порака – час поскоро да се ратификува протоколот за пристапување на Северна Македонија во НАТО. Добивме силни пораки на поддршка и честитки, за лидерството, за храброста, за одлучноста, во решавањето на проблемите и вртење кон иднината. Нашето партнерство со САД продолжува и тоа ќе биде плус за нашата стабилност, за нашите стратешки цели но и за нашата економија“, рече министерката.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Истрага за недозволено држење оружје во Скопје, предложен притвор
Јавен обвинител од Основното јавно обвинителство Скопје донесе Наредба за спроведување истражна постапка против 47-годишен скопјанец за кривично дело – Неовластено изработување, држење, посредување и тргување со оружје и експлозивни материи.
На 18 јануари полициски службеници извршиле претрес во дом и други простории на лицето, на улица “Македонско-косовска ударна бригада” во Скопје, при што пронашле една пушка марка “Црвена застава”, една ловна пушка, муниција – куршуми и патрони, како и делови и компоненти од огнено оружје.
Ценејќи дека лицето нема да може да биде обезбедено во текот на постапката со друга поблага мерка, јавниот обвинител до судијата на претходна постапка од Основниот кривичен суд Скопје достави предлог за определување мерка притвор.
Македонија
Православните верници го слават Богојавление – Водици, над 220 граѓани ќе се обидат да го фатат крстот во Вардар
Православните верници денеска го слават празникот Богојавление, а централните манифестации, традиоционално ќе се одржат во Скопје и Охрид со осветување на водите на реката Вардар и Охридското езеро со положување на крстот во нив.
Празникот се одбележува од вториот век, а уште се нарекува и Водици поради големиот водосвет што го врши црквата на овој ден.
Според христијанското предание, на овој ден се одбележува крштевањето на Исус Христос од страна на Свети Јован Кристител во реката Јордан.
Скопската православна епархија при МПЦ-ОА ќе го организира традиционалното осветување на водите на реката Вардар и чинот на положување на Чесниот крст. Над 220 граѓани денес ќе се обидат да го фатат крстот што ќе биде положен во реката Вардар во Скопје. Според верувањата, оној кој ќе го фати крстот, ќе го следи среќа и благослов цела година. Фаќањето на крстот значи соединување на човекот со Христа, а се верува дека со положувањето на крстот, водите стануваат лековити.
Посебен режим на сообраќај
Одделението за безбедност на патниот сообраќај при СВР Скопје денеска по повод празникот Водици ќе воведе посебен режим на сообраќај за одредени сообраќајници во централното градско подрачје на Скопје, како и во општините Ѓорче Петров, Кисела Вода и Аеродром.
Така, во центарот на град Скопје за сообраќај ќе биде затворена улицата „Филип Втори Македонски“ на потег од крстосница со булеварот „Гоце Делчев“ до крстосница со улицата „11-ти Октомври“ во двете насоки.
Во општина Кисела Вода за сообраќај ќе бидат затворени улиците „14-ти Декември“ и дел од улицата „Христо Татарчев“ до салата „Расадник“.
Во општина Ѓорче Петров за сообраќај ќе бидат затворени сообраќајницата од црквата „Свети Петар и Павле“, булеварот „Партизански Одреди“ до улицата „Ѓорче Петров“, потоа улицата „Ѓорче Петров“ до улицата „Васил Чакаларов“, како и од црквата „Свети Пантелејмон“, улицата „Козле“, дел од улицата „Васил Чакаларов“ до Железничкиот мост на реката Вардар.
Македонија
Сончево време со температура до 12 степени
Времето утрово е студено, насекаде со негативни утрински температури. По одделни котлини ќе има појава на магла. Преку денот времето ќе биде сончево и претежно тивко со мала до умерена локална облачност. Минималната температура ќе биде во интервал од -10 до -1, а максималната ќе достигне од 2 до 12 степени.
Во Скопје претпладне студено со појава на магла, преку денот сончево и тивко со мала до умерена облачност. Минималната температура ќе се спушти до -6, а максималната ќе достигне до 3 степени, јавува УХМР.
Во следните денови ќе преовладува променливо облачно време. Во понеделник по одделни котлини ќе има појава на магла, а локални врнежи од дожд, на планините од снег се очекуваат во вторник.