Македонија
Шекеринска за „метлата“: Освен кадровски, ќе анализираме и системски промени

Утре, по инаугурацијата на новиот претседател Стево Пендаровски, ќе започнат анализите околу таканаречената „метла“ на премиерот Зоран Заев. Министерката за одбрана Радмила Шекеринска вели дека прашањето нема да се фокусира само на персонални промени, туку и на промени во системот на одлучување.
„Ние како сериозна коалиција и Влада ќе седнеме и ќе ги направиме сите анализи како да дадеме одговор на некои од очекувањата кои не сме успеале да ги исполниме. Тоа не е прашање само на персонални рокади и на промени, туку е прашање и на промени кои ни се неопходни и во системот на одлучување. Вие можевте да видите и во текот на целата кампања колку се силни критиките од страна на граѓаните, бизнисот и медиумите. На пример, за состојбите во одредени делови на нашата администрација каде што луѓето сметаат дека им е уставно право да земаат плата но не им е уставна обврска да работат. Персоналните промени не се единственото прашање за што ќе дискутираме“, вели таа.
Во врска со гласините за разрешувањето на министерот за екологија Садула Дураки, кога тој за ТВ21 изјави дека за тоа може да одлучи само неговиот партиски лидер Али Ахмети, Шекеринска вели:
„Ние имаме коалициска влада која во својата програма кажа дека тој тип на партиски феуди не се добри за државата. Тоа во програмата го кажаа и СДСМ и ДУИ и сите коалициски партнери. Нашата цел не е да ги поделиме ресорите и да кажеме секој нека работи што сака. Тоа не е Влада, тоа е партиски пазар. И партискиот пазар ја доведе Македонија во 2016 во калта од која две години се трудиме да ја извадиме“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Влен: Бујар Османи и во МНР спроведувал сомнителни и криминални тендери!?

Државниот завод за ревизија јавно потврди тоа што граѓаните одамна го знаат, дека Министерството за надворешни работи, во време кога министер беше Бујар Османи, спроведувало незаконски тендери поврзани со организацијата на самитот на ОБСЕ во 2023 година, велат од Влен преку соопштение.
„Според ревизорскиот извештај: Потрошени се над 120 милиони денари без јасна евиденција; Не постои документација што точно е испорачано, инсталирано или оставено како трајна опрема во СРЦ „Борис Трајковски“; Договорите и јавните набавки биле спроведувани без транспарентност и со сериозни законски пропусти.
Ова е уште една потврда дека Бујар Османи, каде и да оди, зад себе остава сомнителни и криминални тендери!
Ова не е изолиран случај, истиот Бујар Османи беше осомничен од СЈО за сомнителни набавки уште кога беше министер за здравство во владата на Никола Груевски.
Граѓаните на Чаир добро знаат две работи за Бујар Османи: Прво, никогаш ништо не направил за Чаир, ниту еден проект, ниту една инвестиција, ниту една иницијатива. Второ, секогаш кога бил на функција, се поврзувал со скандали, сомнителни тендери и злоупотреби на јавни пари!“, велат од „Влен“.
„Влен“ додава дека Чаир не заслужува човек чие име се повторува во секој извештај за криминал и злоупотреба.
Македонија
Надлежните со препораки до граѓаните поради најавата за температури до 39 степени во периодот до 13 август

Министерството за здравство информира дека според најновата прогноза од Управата за хидрометеоролошки работи (УХМР), од 8 до 13 август 2025 година се очекува значително зголемување на дневните температури, кои на некои места ќе достигнат и до 39 степени Целзиусови.
Поради тоа, Министерството апелира до граѓаните да ги почитуваат препораките за заштита од топлотен удар: престој во разладени простории, внесување на доволно течности, избегнување на алкохол и засладени пијалаци, носење лесна и светла облека, како и ограничување на физичката активност во најтоплите часови.
Особено внимание треба да се посвети на ризичните групи — деца, стари лица, лица со хронични заболувања и бремени жени.
Во случај на појава на симптоми како вртоглавица, главоболка, гадење или забрзан пулс, веднаш треба да се побара медицинска помош.
Министерството ја следи состојбата и ќе постапува според потребите.
Според најавата на УХМР, времето денес ќе биде сончево со мала до умерена локална облачност. Ќе дува слаб до умерен ветер од северероисточен правец. Максималната температура ќе биде во интервал од 30 до 37 степени.
Македонија
Четири различни цени за паркинг во Клинички, просторот ќе се прошири двојно

Министерот за здравство, Азир Алиу, информира дека во Клиничкиот центар ќе има четири различни влезови со различни ценовници за паркирање – бесплатен за онколошки пациенти, поевтин за пациенти со упат, поскап за вработените и најскап за граѓаните кои доаѓаат по други причини. Договорот за управување со паркингот ќе го потпише Министерството со ЈП Градски паркинг.
Се најавува и оптимизација на паркинг просторот, со дупло повеќе места и дополнителни влезови, вклучувајќи и еден кај Кардиологија. Ќе се воведе 24-часовен мониторинг со камери и нов систем за следење на плаќањето и активностите. Доколку оптимизацијата не биде доволна, ќе се размислува за изградба на катна гаража.