Македонија
Шекеринска до амбасадорите: Целиме кон мала, модерна и флексибилна армија
Министерката за одбрана, Радмила Шекеринска, ги запозна амбасадорите на земјите членки на НАТО во Македонија со напредокот во изработката на клучниот стратешки документ во одбраната – Стратегискиот одбранбен преглед.
„Нашата цел е да имаме мала, модерна и флексибилна Армија, која ќе го има своето место во НАТО. Ги проценивме новите безбедносни ризици и предложивме реформи во Армијата и во Министерството. Со зголемувањето на буџетот за одбраната отворивме можност за почнување на реформите. Процесот на изработката на Стратегискиот одбранбен преглед за кој имавме кусо време е успешен поради квалитетниот тим кој на него работеше поради поддршката од НАТО и сојузниците и инклузивноста во процесот. Благодарни сме за поддршката од владите на САД и Велика Британија, кои испратија советници што помогнаа во изработката на Стратегискиот одбранбен преглед, како и на НАТО-канцеларијата во Скопје и на другите земји членки што го дадоа својот придонес. Инклузивниот процес во изработката на СОП е од огромно значење за да имаме ефикасна имплементација на реформите“, рече министерката.
Шекеринска додаде дека се очекува Владата да го усвои Стратегискиот одбранбен преглед пред самитот на НАТО и ги повика амбасадорите на земјите членки на НАТО да придонесат со своите совети во имплементацијата на СОП, кој ќе постави основа за долгорочен план за развој и модернизација на Армијата на Република Македонија.
Министерката го изрази очекувањето на Владата за поддршка за Македонија на претстојниот самит на НАТО.
Американскиот амбасадор Џес Бејли рече дека може да посведочи за вредната работа на компетентни лица од Министерството и Армијата, во соработка со американските и британските експерти. Британскиот амбасадор Чарлс Гарет се обрати до своите колеги повикувајќи ги дека доколку сакаат, да имаат конструктивна соработка со Македонија, која ќе има резултат – ова е можноста. Тој рече дека реформите во одбраната се важни не само за Македонија и регионот туку и за колективната безбедност.
Последниот Стратегиски одбранбен преглед беше донесен пред 14 години. Министерството за одбрана се обврза новиот документ да биде донесен до крајот на јуни, а неговата изработка навлезе во завршна фаза.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Дневницата на странските експерти на Кардиохирургија не е 700 евра, како што вели Демири, туку не повеќе од 150 до 200 евра, уверува Шокаровски
Странските експерти ангажирани за помош и надгледување на работата на Клиниката за кардиохирургија државата не ги плаќа 700 евра дневно, како што во понеделникот рече министерот за здравство, Илир Демири, туку не повеќе од 200 евра. Разрешениот директор на Клиниката за кардиохирургија, Марјан Шокаровски, вели дека нема вистина ниту во сомнежот на министерот дека странските експерти немаат лиценци за работа.
„Таа програма е во склоп на Владата. Јас немам конкретни информации за колкави дневници се работи, но не се повеќе од 150 до 200 евра. Ние сме во секојдневни контакти не само со колеги од Србија туку и од Хрватска. Сите оние што доаѓаат кај нас апсолутно имаат лиценци, тоа е лесно проверливо во Лекарската комора“, рече разрешениот директор Шокаровски.
Во понеделникот министерот за здравство го разреши Шокаровски од функцијата директор во пакет со Александра Ефтимова, која раководи со проектот за превенција на кардиоваскуларни заболувања, како и целата комисија, оти не му дале извештај на кои странски експерти и за што им се плаќани дневници од 700 евра за учество во работата на клиниката. Министерот Демири рече дека не треба да се дозволи да има зголемена смртност во услови кога клиниката плаќа толку многу експерти.
Сите податоци што во понеделникот ги изнесе министерот, Шокаровски, заедно го многумина вработени на клиниката, денес ги демантира. Ја организирале прес-конференцијата денес оти до вчера Шокаровски бил на боледување.
„Јас вчера бев на боледување. Имам лумбоишијалгија, денес сум овде под терапија. И ние докторите имаме право некогаш да се разболиме и да не ни биде добро“, рече Шокаровски.
За него и за многумина од вработените на клиниката, обвинувањата за зголемена смртност не се точни оти не само што смртноста не е зголемена туку бележи и тренд на намалување во последните месеци. Разрешувањата ги сметаат за незаконски оти ги направил министер во техничка Влада, без мандат за разрешувања. Обвинувањето за фантомски 170 пациенти за кои нема умреници ниту, пак, отпусни писма, според разрешениот директор и многумина вработени, се реални пациенти, уредно внесени во нивниот интерен систем, со уредна документација, но поради техничка грешка, која се провлекува со години на клиниката, некои не се внесени во системот „Мој термин“, кој не го сметаат за задолжителен.
Шокаровски и вработените сметаат дека обвинувањата се обид за оркестриран напад и хајка против клиниката, во кои учествува и министерот, а имаат цел да ја уништат.
Македонија
Петар Богојески избран за професор по јавен менаџмент и лидерство на Универзитетот за мир
Проф. д-р Петар Богојески, политички и граѓански активист и публицист, претседател на политичката партија Македонски концепт, е избран за професор по јавен менаџмент и лидерство на ECPD при Универзитетот за мир – UPEACE, основан од Генералното собрание на Обединетите нации, Њујорк, САД, во согласност со резолуцијата 35/55 од 1980 година. UPEACE ја извршува својата благородна задача со слоганот SI VIS PACEM – PARA PACEM („Ако сакате мир – подгответе се за мир“).
Универзитетот за мир е меѓународна институција за високо образование со цел промовирање мир и соработка меѓу сите човечки суштества на духот на разбирање, толеранција и мирен соживот, стимулира соработката меѓу луѓето и помага во намалувањето на заканите за светскиот мир и напредок.
ECPD е меѓународна и вонтериторијална организација, која ужива академска слобода потребна за исполнување на нејзините задолжителни задачи и цели, особено во однос на изборот на теми и методи на истражување, академски и друг кадар, како и образовни програми и форми на ширење на знаењето, со цел промовирање на мирот, развојот и меѓународната соработка, основан според меѓународен договор да работи на територијата на „Хелсинки Европа“, која ги опфаќа земјите од Европа и Северна Америка во рамките на Светскиот универзитет за мир, основан од организацијата на Обединетите нации, работејќи на свеста дека не може да се обезбеди траен мир доколку земјите и нациите со тешко минато не почнат да се развиваат на значително побрз и похармоничен начин од досега, како и од универзалната вистина дека нема мир без развој.
„Здружувањето значителен дел од интелектуалните потенцијали на Западот и Истокот, на Северот и Југот, особено создавање на интердисциплинарната и креативна атмосфера за вистинска тимска работа, без разлика дали истражувате во Скопје, Њујорк, Мадрид, Москва, Париз, Брисел, Милано, Даблин, Будимпешта, Атина или Лондон, е основен предуслов за создавање траен мир на планетата Земја. Знаењето, науката, образованието ќе нè донесат до траен и одржлив мир“, вели Богојески.
Проф. д-р Петар Богојески ќе работи на постдипломски степени и специјалистички обуки во повеќе научни дисциплини и области и на спроведување низа проекти посветени на промоција на мирот, развојот и меѓународната соработка, особено за територијата на Европа, но и други делови од светот, како САД, Канада, Јапонија, Кина, Индија и други земји, со учество на светски реномирани експерти од речиси сите континенти на многубројни меѓународни научни конференции, семинари, курсеви, тркалезни маси, академски и стручни работилници и слично, преку објавување стручни и научни трудови и учебници за постдипломски студии.
Богојески и досега беше ангажиран во речиси сите области на науката и истражувањето, особено со докторските и специјалистичките студии, вклучувајќи рационално користење и развој на човечките и природните ресурси и економскиот развој, јавното претприемаштво, културен и демократски развој и слично. Забележителни активности имаше во делот на јавните финансии, промоција на мали и средни претпријатија, транформација на јавниот сектор, управување со стопански и нестопански дејности и слично.
ПР текст
Македонија
Стоилковски: Покрај исклучени сали, на Хирургија изгаснати и компјутерите за томографија, а економскиот директор патува на Азурниот брег
Здравството е пред колапс, прекинот на операции на Хирургија предизвика хаос во другите болници, а министерот се уште нема поим зошто салите за операција на Хирургија не работат. Важно знае дека воздухот не бил компромитиран, ама смрдело, изјави портпаролот на ВМРО-ДПМНЕ, Наум Стоилковски.
Како што рече, хаосот со воздухот не е единствен проблем на Хирургија. Од вчера, додава тој, и апаратите за компјутерска томографија и РТГ не работат. Ова е известувањето со кое што се бара разбирање за пациентите да се упатуваат кон други здравствени установи во градот!
„Во овие моменти кога сета јавност е насочена кон состојбата во Хирургија, кога сите скопски болници се преоптоварени со пациенти заради Хирургија, сега се исклучени и компјутерите за томографија. Ова е се само не ред, здравство, грижа за пациентите и посветеност на министерот и сиот раководен тим на Хирургија. Патем, знае ли министерот Илир Демири, дека најмалку петмина од раководството и администрацијата на Хирургија, меѓу кои и Адмир Дајоски економскиот директор на Торакална, среде хаосот заминале на патување на Азурен Брег? Дали Илир Демири се уште смета дека поважно е да му измине времето како министер без да се замери со ДУИ и СДС или треба веднаш да побара одговорност? Накусо ќе ги сублимирам проблемите на Хирургија: 12 дена нема операции заради лош мирис иако министерот тврди дека воздухот не е компромитиран, не работат лифтовите, фирма моли за услови да се исполнат преземените обврски на тендер, сега и компјутерите за томографија и РТГ се исклучени, а раководството со економскиот директор заминале на францускиот Азурен брег!?“, рече Стоилковски.
Порача дека одговорност мора да има, вклучително и етичка и професионална.