Македонија
Шилегов: Гасоводниот прстен околу Скопје е завршен
Градоначалникот Шилегов денеска учествуваше на панел-дискусијата „Обновливи извори на енергија и енергетска ефикасност за подобра животна средина“ што се одржуваше во хотелот „Холидеј ин“, во организација на Институтот за комуникациски студии, а во рамките на кампањата од јавен интерес за подобра животна средина „Не игнорирај! Реагирај!“.
„Во текот на минатата година ја завршивме секундарната мрежа, односно гасоводниот прстен околу Скопје. Со цевката го преминавме дури и Вардар, од Карпош 4 кон Влае. Ова за мене е еден од поголемите потфати, зашто зборуваме за енергетска стратегија за нашиот град, нешто што со години наназад го немавме и сега живееме со последиците. Кога зборуваме за енергенсите, особено кога зборуваме за природниот гас, најчесто зборуваме само за затоплување на домовите, иако тој енергенс може да се користи за сите енергетски потреби. Основните карактеристики на овој енергенс е дека во најмалку 20% е помала емисијата на штетните гасови во однос на другите горива, речиси воопшто го нема сулфурот како нус продукт и е енергетски ефикасен. За нас како град сега е многу битно да влеземе во процесот на терцијална гасификација, односно, достапност на гасот до домаќинствата“ рече Шилегов.
Тој додаде дека треба да имаме предвид дека дел од производствените и индустриските капацитети се префрлени на природен гас, а префрлени се и сите топлани во нашиот град.
„Секогаш кога зборуваме за топловодната мрежа и затоплувањето на домовите преку централниот систем зборуваме за евтино и еколошки најприфатливо затоплување на домовите кое во овој момент може да им биде понудено на граѓаните. Да не заборавиме дека употребата на огревно дрво што е најраспространето во нашата држава, ако биде заменето со други енергенси, ќе ја спречи сечата на дрвјата во шумите и ќе се спречат елементарните непогоди како во Стајковци од пред три години. Што значи примената на гасот? За домаќинствата ќе значи поекономично греење, зашто се намалуваат трошоците за затоплување на домовите, а тоа на краток рок значи подобрување на економската состојба на граѓаните. За индустриските капацитети тоа значи намалување на трошоците и можност за инвестирање во нови технологии токму заради заштедите кои се прават поради воведувањето на гасот. Во таа насока, во текот на утрешниот ден ги очекуваме претставниците на МАН и го потпишуваме договорот за набавка на нови 33 градски автобуси кои што ќе бидат на гас. Заштедата што ќе ја направиме со овие 33 автобуси е 700.000 евра годишно“, нагласи Шилегов.
Градот Скопје е сериозно посветен на енергетската политика. Токму затоа го основа и „Градски енергетски системи“, правен субјект кој претендира да биде носител на енергетската политика на градот, и тоа во двата сегмента – во развојот на топловодната мрежа и нејзиното проширување и во развојот на гасификациската мрежа.
„Во градот има три топловодни мрежи кои опфаќаат делови од Центар, Аеродром, Карпош, Кисела Вода, Чаир, Гази Баба и Бутел, но се неспоени. Тоа е предизвик кој допрва ни претстои. Има и делови од општините Карпош, Чаир, Бутел, Гази Баба и Кисела Вода, како и општините Ѓорче Петров, Шуто Оризари и Сарај каде што е економски неисплатливо да ја прошируваме топловодната мрежа и токму во тие делови треба да навлеземе со терцијалната гасификација. Станува збор за густо населени подрачја каде што има индивидуално домување. Со централната власт не секогаш имаме синхронизирани ставови. Градот Скопје е на став дека терцијалната гасификација мора да ја води градот и за нас јавно-приватно партнерство не е прифатливо. Искуствата кои ги имаме на Балканот зборуваат дека при јавно-приватно партнерство се бара поврат на инвестицијата во првите десет години, а првите десет години не се инвестициски циклус. Ако Градот Скопје или единиците на локална самоуправа не се креатори на енергетските политики може да ни се случи развојот на гасификацијата да се одвива во делови каде што веќе имаме топловодна мрежа. Тоа би бил поевтиниот начин за развој на гасификацијата, но погрешен начин, ако се има предвид дека како држава би требало да ни биде приоритет намалувањето на аерозагадувањето и доведувањето на евтин енергенс до што е можно поголем број корисници“, нагласи градоначалникот Шилегов на денешната трибина.
Со почит,
Град Скопје
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Граѓаните да овозможат пристап до топлинските потстаници во зградите, порачуваат од ЕСМ
Соработката со потрошувачите е од суштинско значење за навремено и квалитетно снабдување со топлинска енергија, велат од од АД ЕСМ. Во пресрет на новата грејна сезона ги повикуваат граѓаните да ги завршат сите потребни проверки и поправки на внатрешните грејни инсталации пред 15 октомври, потсетувајќи ги дека редовното одржување на внатрешните грејни инсталации е нивна обврска.
Затоа е препорачливо навремено да се извршат проверки и да се завршат започнатите интервенции во најкус можен рок, и тоа да го пријават во Центарот за грижа за потрошувачи. На тој начин придонесуваат испораката на топлинска енергија од системот за централно греење да се одвива непречено и навремено. Исто така, важно е заедниците на сопственици да овозможат пристап на службените лица до топлинските потстаници во објектите и да обезбедат непречено електрично напојување во топлинската станица (платени сметки за електрична енергија за топлинската станица и функционална електрична инсталација) – соопштуваат од компанијата.
Оттаму посочуваат дека за информации или пријави на дефекти и завршени интервенции, потрошувачите може да се јават во Центарот за грижа за потрошувачи.
Македонија
Мицкоски за корупцијата: Имаме партиски октруирано обвинителство и судство, нема да дозволам од тоа да правам естрада, но тие што сториле криминал треба да одговараат
Борбата против корупцијата е можеби една од најголемите забелешки која ја слушаме изминативе денови а критиката се однесува на тоа зошто не апсиме. Нема да дозволам од тоа да правам естрада. Ниту имам намера како човек преку својата позиција и злоупотребите на иснтитуциите кои се дел од македонската влада да манифестирам сила, моќ и реваншизам. Тоа нема да се случи. Човечки е да се простува но исто така потребно е криминалот и корупцијата да бидат казнети. Но има институции каде се водат тие процеси, има закон, има Устав пред кои тие што сториле криминал треба да одговараат, порача премиерот Христијан Мицкоски по повод 100 дена Влада.
Мицкоски побара трпение од граѓаните, оти како што рече процесот е тежок.
„Имаме партиски октруирано обвинителство и судство. Зборувам за една мала група на обвинители и судии кои се партиски послушници кои го контаминираат правосудниот систем. И затоа тргнавме уште на почетокот во делот на реформи во правосудството и дадовме рок дека до крајот на септември чекаме предлози од оние што излегоа со критика. Вчера измина тој рок, ниту еден официјален предлог не стигна до нас. Сите оние што критикуваа дека сакаме да правиме чистка во правосудството и повторна партизација ги нема. Е затоа од денеска започнуваат реформите во правосудниот систем, граѓаните немаат повеќе простор за чекање и сум разочаран што не добивме ниту еден предлог како да се одвива реформата“, порача Мицкоски.
Додаде дека во наредниот период владата започнува со реформи во правосудството.
„Жалам што толкави огромни плати поединци добиваат на грбот на граѓаните а работата што ја испорачуваат е мала или мизерна. Затоа започнуваме со реформите и во периодот кој следи нема запирање во делот на правосудството. Борбата со криминалот и корупцијата продолжува голем дел од случаите се веќе разоткриени и се на виделина на јавноста“, додаде Мицкоски.
Македонија
Минималната плата не стана 450 евра; Трендафилов: Утре ќе биде 101 ден од новата Влада и ништо нема да биде сменето
Владата на Христијан Мицкоски не го исполни барањето на Сојузот на синдикати на Македонија (ССМ) од мај годинава, покачувањето на минималната плата на 450 евра да им биде приоритет и да се случи во првите сто дена. Претседателот на ССМ, Слободан Трендафилов се уште чека седница на Економско – социјалниот совет на која ќе се разговара за покачувањето на минималната плата.
„Не би коментирал што се случи во првите 100 дена. Утре ќе биде 101 ден од новата Влада и повторно нема да биде ништо сменето. Очекуваме да седнеме на седница на Економско-социјалниот совет и да ни кажат што направиле“, рече претседателот на ССМ, Трендафилов денес пред почетокот на конференцијата „Социјален дијалог – состојба, перспективи и предизвици” организирана од ССМ и Фондацијата Фридрих Еберт.
Сојузот на синдикати на Македонија веќе донел одлуки и заклучоци дека ќе даде поддршка на сите синдикати во борбата за раст на платите, вклучително и на минималната плата, нешто кое според претседателот Трендафилов, требало да се случи вчера, оти денес е доцна.
Трендафилов очекувал, но во првите сто дена од новата Влада не бил повикан на состанок за да ги пренесе барањата на работниците, па најави дека тоа ќе го стои на првата седница на Економско-социјалниот совет.
„Сметаме дека аргументите се токму на страната на работниците. Сметаме дека 25.000 работници во државата кои примаат плата од 22.567 денари е нечовечки и некоректно да ја примаат таква. Сметаме дека 10.000 работници кои примат плата од 1 денар до 22.567 денари е кривично дело што го прават работодавачите. За да се покрие една синдикална минимална кошничка се потребни веќе три минимални плати, затоа сметаме дека нашите аргументи се издржани. Делот за храна и пијалаци е веќе 23.000 денари, значи една минимална плата не покрива ниту леб и вода. Овие наши аргументи како и другите кои треба да ги изнесеме на седница на Економско – социјалниот совет, ќе бидат првиот чекор да им покажеме со што се соочуваме како претставници на работниците и сметаме дека ако очекуваат да ги разбереме, треба прво тие да не разберат нас“, вели претседателот Трендафилов.
Денес на иницијатива на ССМ првпат на едно место се собираат претставници на синдикатите, Организацијата на работодавачи, претставници од Министерството за економија и труд како и претставници на Министерството за јавна администрација да дискутираат за социјалниот дијалог.