Македонија
Шилегов: Младите имаат визија за развој на младински политики

Градоначалникот Петре Шилегов се сретна со претставници на младински организации со кои разговараше за приоритетите и потребите на младите од Скопје. Тој изрази задоволство од досегашната соработка со некои од овие здруженија и најави зголемена поддршка за младинските активности во иднина. Средбата се одржа во „Млади хаб“, во канцеларијата на претседателот на државата.
„Изминативе речиси 4 години променивме многу нешта во начинот на кој функционира градот и уште многу ќе менуваме, особено во делот на младинските политики. Во 2018 година кога првпат го распишавме јавниот повик за финансирање програми, проекти, активности и манифестации за младите од интерес на Град Скопје, беа доделени 1.000.000 денари за финансирање 16 здруженија, кои учествуваа на овој повик со квалитетни проекти. Затоа, во 2019 година ги зголемивме средствата за овој повик на 1.781.000 денари, кои беа распределени на 24 здруженија. Во 2020 година, која е позната како ковид-година, повторно ги зголемивме средствата, овој пат на 3.220.000 денари, кои минатата година беа распределени на вкупно 51 проект од интерес на младите од разни здруженија и поединци. И морам да ви признам дека секоја година проектите се сѐ поквалитетни, што ни говори само едно – нам не ни недостигаат млади со идеи и визија за развој на младински политики, младите се тука. Сѐ што треба да се направи е некој да го препознае тој квалитет и да го стимулира на вистински начин. И тука успехот е неминовен“, рече Шилегов.
Тој додаде дека Советот на Град Скопје изгласа одлука за промена на статутот на Градот за да се создаде правен основ за формирање локален младински совет, кој е од исклучително значење за градските младински политики. Неодамна е назначен и задолжен и службеник за млади – тоа е Димитар Мечкаровски од Одделението за спорт и млади во Секторот за јавни дејности во Град Скопје.
Градоначалникот Шилегов се осврна на неколку значајни активности и реализирани проекти на Град Скопје, што се особено атрактивни и популарни меѓу младите. Тоа се двата памптрак-полигона, нагорната патека на Водно за спортски велосипедизам (прва од трите планирани), тартан-патеката во Градскиот парк, одбојкарското игралиште на кејот во Аеродром, редизајнот на 5 зелени скверови и двата зелени покрива – на објектот на ГТЦ и на Домот на градежниците.
„Младинскиот културен центар нуди богата програма, а во делот на културата исклучително популарни беа концертите на Филхармонијата на отворено и кината на отворено во Градскиот парк, концертите на Градскиот дувачки оркестар во паркот ‘Ибни пајко’ и на други локации во градот. Преку проектите ‘Култура во време на корона’ и ‘Спорт во време на корона’, Град Скопје поддржа над 200 млади спортисти и уметници, кои добија симболични паушали во првиот налет на корона-кризата. Во делот на образованието, Град Скопје ги реконструира сите средни училишта, кои добија енергетски ефикасни фасади, прозорци и врати, а обезбедени се и прочистувачи за воздух во секоја училница“, истакна Шилегов.
Тој нагласи и дека е обезбеден бесплатен автобуски превоз за сите средношколци и за сите студенти независно од оддалеченоста на училиштата и факултетите. Воведени се стипендии за средношколци спортисти и средношколци со попреченост. Само во текот на минатата година Град Скопје додели стипендии за 120 средношколци спортисти во нето-годишен износ од 24.000 денари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Коњановски вети големи проекти, како реконструкција на улици, нов мост и инвестиции во спортот

На денешниот Саем-Отчет под мотото „4 години работа за тебе“, свое обраќање имаше градоначалникот на општина Битола, Тони Коњановски, кој ги претстави проектите и инвестициите што се реализираат во градот.
Коњановски истакна дека општината вложува во инфраструктурата преку целосна реконструкција на улици со водоводна и канализациона мрежа. Според него, веќе е завршена првата третина од комплетната реконструкција на 800-метарскиот влез во Битола – долгогодишен проблем на градот.
„Направивме над 50 километри улици и во урбаните и во руралните средини. Улицата Бурса го решава густиот транспорт, влезот спрема Охрид е дооформен со нов мост, а реконструирани се и неколку поголеми улици како Крушевска Република и Стив Наумов“, изјави Коњановски.
Градоначалникот најави и големи инвестиции во спортот – реконструкција на стадионот „Петар Милошевски“, изградба на нова боксерска сала, велосипедски патеки и памп трака за рекреација.
„Стадионот го подготвуваме во полн сјај за претстојните натпревари, реконструкцијата на јужната трибина е огромен проект за градот. Во непосредна близина изградивме нова боксерска сала на местото на старата руина, а реконструиравме и спортска сала која по многу години повторно ги исполнува условите за Лигата на шампионите“, рече Коњановски.
Покрај тоа, општината веќе изгради два нови паркинга, а со проектите поддржани од Владата се очекуваат уште пет. Битола издвојува и значителни средства за спортските клубови – над 1,5 милиони евра годишно.
„Првите велосипедски патеки се завршени – повеќе од 5,5 километри со комплетно обележување, но тука не застануваме“, додаде градоначалникот.
Македонија
Тврдењата на д-р Кедев за операциите во приватните болници ќе ги „чешлаат“ експерти од Словенија, Италија и од Германија

Министерот за здравство, Азир Алиу, најави дека до понеделник ќе биде комплетирана листата со странски експерти кои ќе ја анализираат праксата на приватните болници и ќе утврдуваат дали се извршувале непотребни операции кај пациенти.
„Еден експерт ќе биде од Словенија, вториот е од Италија, а за третиот се разгледуваат кандидати од Австрија и Германија“, изјави Алиу за ТВ 24.
Министерот нагласи дека ангажирањето на странски експерти е направено за да се обезбеди поголема објективност и точна проценка на состојбата во приватните здравствени установи.
Во меѓувреме, Министерството за здравство ја подготвува и методологијата по која ќе се опфатат здравствените установи од приватниот и јавниот сектор. Од приватните болници ќе се бара до 15 септември да достават целосен список на интервенции до Министерството.
Овие мерки следат по изјавата на професор д-р Сашко Кедев дека во одредени приватни болници се извршувале операции за профит, иако тие интервенции не биле медицински неопходни.
Македонија
Изјавите на премиерот се опасни и провокативни, велат од ДУИ

Денешните изјави на премиерот Христијан Мицкоски, според ДУИ, не претставуваат само „чисти клевети“ и обид за сокривање на кризата на легитимитетот на неговата влада, туку се и опасни, бидејќи можат да поттикнат етнички судири.
„ДУИ отсекогаш била гаранција за слободни и демократски избори. Немаме никаква причина да се вклучуваме во ‘тајни планови’ или ‘хаос’, како што тврди Мицкоски“, велат од партијата.
Во соопштението се потенцира дека премиерот, наместо да измислува непријатели, треба да објасни зошто неговата влада го крши Уставот и дискриминира Албанците, зошто го намалува бројот на советници и ја инструментализира ДИК, Уставниот суд и другите институции во корист на партиските и моноетничките планови.
„Со секоја одлука ја враќа државата назад во времето пред 2001 година“, се наведува во реакцијата.
ДУИ предупредува и на штетната соработка помеѓу ВМРО и СДСМ, која, според партијата, го дискриминира претставувањето на дијаспората и го крши Охридскиот рамковен договор.
„Добро е ВМРО и СДСМ да ја прекинат нивната соработка на штета на Албанците и другите заедници, спротивно на Уставот и законите“, порачуваат од ДУИ.
Партијата истакнува дека октомвриските избори ќе бидат тест на граѓанската волја и референдум за политиката на страв, манипулации и демонтажа на мултиетничката држава.
„Демократијата не се плаши од невистинити изјави. Ниту Албанците, ниту Македонците не заслужуваат да бидат водени од клевети и лажни сценарија. А каде ќе биде ДУИ, тоа зависи единствено од народот“, заклучуваат од партијата.