Македонија
(Видео) Шилегов: Набавени над 130 комунални возила и автобуси за четири години

Градот Скопје денеска ги презентираше комуналните возила и автобуси кои беа набавени во изминативе четири години за потребите на јавните градски претпријатија. На паркингот пред спортскиот центар „Борис Трајковски“ можеа да се видат возила за јавен транспорт, како и различна механизација за одржување на јавното зеленило, за подигање на комуналниот отпад, за одржување на водоводната и канализациската мрежа, за одржување на сообраќајните површини и механизација за потребите на Бригадата за противпожарна заштита на Град Скопје.
„ Јавните претпријатија ЈСП, „Водовод и канализација“, „Комунална хигиена“, „Паркови и зеленило“, „Улици и патишта“, „Дрисла“ и „Градски паркинг“ заедно, за изминативе 4 години имаат набавено над 130 нови возила. Имајќи предвид дека завршува набавката за нови комбиња во ЈСП и во ЈП „Лајка“ можеме да кажеме дека за еден мандат купивме над 150 нови комунални возила. ЈСП Скопје е побогато за 33 нови МАН автобуси, од кои единечни се 21, а зглобни се 12. Ова се едни од најквалитетните светски автобуси, односно кога ја купуваме механизацијата мислиме на тоа да го одбереме тоа што е најдобро за скопјани“ изјави градоначалникот Петре Шилегов.
Тој нагласи дека јавните градски претпријатија ЈСП, „Водовод и канализација“, „Комунална хигиена,“ „Паркови и зеленило“, „Улици и патишта“, „Дрисла“ и „Градски паркинг“ заедно со Противпожарната бригада за изминативе речиси 4 години се побогати за вкупно 134 нови возила и механизација, согласно со специфичните потреби за секоја дејност.
„ Така, „Комунална хигиена“ во изминатиот четиригодишен период има набавено вкупно 51 ново возило. Тука влегуваат 29 камиони за собирање отпад од садови со различен капацитет и вид на отпад, 5 автоцистерни, 5 самоподигнувачи, 10 метларки за чистење на јавни површини и 2 киперa. Кога дојдов јас за градоначалник јавното претпријатие „Комунална хигиена“ имаше 7 прскалки и една дефектна. Во овој момент располагаме со 20-на возила за миење на улиците. За „Водовод и канализација“ за истиот период набавени се вкупно 21 возило од кои 2 цистерни под притисок, 2 цистерни на вакуум, 2 теренски возила, 11 товарни возила, 2 градежни машини – комбинирани и 2 пумпи за канализација. „Улици и патишта“ за 4 години е побогато за 14 возила, од кои 7 товарни возила, 1 товарно возило со корпа, 5 валјаци и 1 нисконосечка приколка. „Паркови и зеленило“ за истиот период има набавено 7 нови возила од кои 1 камион за собирање отпад, 1 кипер, 1 товарно возило, 1 мал утоварувач, 1 ровокопач и 2 четирицикли. „Градски паркинг“ е побогат за 5 возила – пајак и 1 машина за чистење снег.
„Дрисла“ ја вративме во Скопје. Во изминатиот период „Дрисла“ финансиски ја консолидиравме, но успеавме да набавиме и нови 2 теренски возила. И, за крај, она што е најдобро меѓу комуналните возила, тоа е противпожарната скала – прва ваква опрема на територијата на нашата држава, но и прво вакво возило кое што Градот го има купено со свои средства“ нагласи Шилегов.
На новинарско прашање дали во својот мандат набавил ново службено возило за лични потреби, Шилегов рече дека не е приритет на Градот ниту на градоначалникот да купува службено возило за свои потреби. Тој рече дека се вози во „пасат“ стар 10 годиниа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Тошковски за тендерот за униформите: Се фокусиравме на квалитетот и цената, нема неправилности

Министерот за внатрешни работи, Панче Тошковски, реагира на обвинувањата за тендерот за униформите за припадниците на полицијата, велејќи дека постапката била предмет на задолжителна управна контрола од Бирото за јавни набавки, при што не биле најдени никакви неправилности.
По обвинувањата од опозициската СДСМ дека тендерот го добиле две фирми, од кои едната со двајца вработени, а другата отворена 20 дена пред постапката, Тошковски образложи дека нивната логика е поттикнување на конкуренцијата и фер пристап.
Премногу строги критериуми, вели Тошковски, често ги елиминираат малите и средни претпријатија, кои во Македонија се најконкурентни и често можат да понудат најдобри цени. Наша цел, додава министерот, е да добиеме најдобар квалитет по најповолна цена, а тоа го постигнуваме со овозможување на поширок круг на понудувачи.
„Законот за јавни набавки не предвидува исклучување на фирма само поради тоа што е новорегистрирана или има помал број вработени и ние целосно постапуваме согласно неговите одредби“, дециден е Тошковски.
Министерот појасни и дека МВР нема склучено договор за директна, еднократна исплата на наведената сума одеднаш, туку склучена е рамковна спогодба која претставува максимална вредност за набавки во наредните три години. Самата рамковна спогодба, вели тој, не предизвикува директна финансиска обврска за Министерството, односно финансиски обврски се преземаат само кога ќе има реална потреба и се склучуваат посебни, поединечни договори за конкретни нарачки, со динамика на испорака според потребите.
„Наместо само на историјат на понудувачите, ние се фокусиравме на она што е најважно, реалниот квалитет на производот. Затоа, клучните услови беа задолжителна достава на мостри и лабораториски анализи. Секој понудувач мораше да достави примероци од униформите и делови од униформа, а мострите беа предмет на лабораториски анализи и испитувања од независни акредитирани лаборатории. Важно е да се нагласи и дека техничките спецификации за униформите и нивните делови се уредени со Правилник кој е јавно објавен во Службен весник. Тоа значи дека тие се стандардизирани и нема можност за какво било влијание врз нивната содржина, што обезбедува еднаков пристап за сите економски оператори“, се вели во реакцијата.
Покрај квалитетот, како што се додава, клучен фактор е и цената. Анализата покажала дека разликата помеѓу највисоката и најниската понудена цена во постапката е 14,4 отсто за дел 1 и 27,9 отсто за дел 2 од набавката, што ја потврдува конкурентноста на тендерот и добиените поволни цени.
Во врска со тоа дека обвинувањата доаѓаат од СДСМ, Тошковски рече дека токму тие што ги оставија полицајците без униформи, принудени сами да си крпат, шијат или позајмуваат делови од пензионирани колеги имаат образ да зборуваат за наводни криминални тендери.
Македонија
Таравари контра Фетаи: Неговата група брои помалку од 40 луѓе кои чувствуваат вознемиреност и вина

Претседателот на Алијансата за Албанците, Арбен Таравари ја коментираше прес-конференцијата на неговите поранешни партиски соборци кои јавно денес излегоа со став дека остануваат во Влен, и не се согласуваат со неговите политики.
Таравари вели дека тоа е група од помалку од 40 луѓе на Арбен Фетаи (претходно го разреши од партиската функција), а чувствуваат мешавина од вознемиреност и вина.
„Анксиозноста е најлошото чувство кое човек го доживува…особено кога е измешано со чувство на вина! Продолжуваме помирно и посигурно од кога било кон Октомвриската победа која е блиску…многу блиску!“, пишува Арбен Таравари, претседател на Алијансата за Албанците.
Ставот на неговите поранешни сопартијци е дека Албанците сакаат да продолжи промената, а не враќање на старото, по најавите на Таравари за соработка и со ДУИ на претстојните локални избори.
Македонија
Албанците сакаат продолжување на промената, а не враќање на старото, велат неистомислениците на Таравари од Алијансата

Го слушнавме нашето членство. Се сретнавме со нашите активисти во секој град – од Липково до Струга. И пораката е јасна: Албанците сакаат продолжување на промената, а не враќање на старото. Ова беше истакнато на денешната прес-конференција на некогашните соработници на Арбен Тараври од Алијансата за Албанците, кои не се согласија со одлуката да ја напушти Владата.
На прес-конференцијата зборуваше ексминистерот од Алијансата, Азир Алиу, а присутен беше и Арбен Фетаи, којшто Таравари вчера го разреши од партиските структури.
Тие не се согласуваат со поличкиот правец кој го зазема Таравари, најавувајќи соработка и со ДУИ за претстојните локални избори.
„Во овој турбулентен политички период, кога стариот режим ги прави последните обиди да ја затемни надежта за промени, ние избравме да не реагираме брзо. Слеговме на терен, ги слушавме нашите активисти, разговаравме со партнерите и размислувавме – со смиреност и одговорност“, рече Алиу.
Оваа група од веќе поделената Алијанса, смета дека земјата има потреба од стабилност, развој, одговорно владеење и од Алијанса која нема да ja предаде довербата добиена од граѓаните. Тврди дека се залага за одговорност, а не поради лични интереси и целта е да не ја напуштат битката на половина пат.
Велат дека Алијансата не е создадена да биде ничија алатка. Таа е создадена да биде глас на граѓаните, промените, и еднаквоста.
На пресот беше истакнато дека денешната влада е постабилна од кога било, посветена на реформите и решена за интеграција. Алијансата за Албанците, како што додадоа, има клучна улога во овој процес, и тие нема да се откажат од таа мисија.
„Во однос на половичните состаноци на ограноците што се нарекуваат „партиски конгреси“ и кои шират поделби и етикетирања – тие не го претставуваат духот, ниту пак статутот на Алијансата. Изразуваме разочарување за навредите упатени кон албанската младина и жената во име на Алијансата, но нашата одговорност е да не го изгубиме правецот дури и кога другите се деградираат“, беше истаканато.
Додаваат дека ќе продолжат како рамноправен партнер во коалицијата ВЛЕН, со иста професионалност и посветеност – служејќи им на граѓаните со чест и решителност.
Крилото на Арбен Таравари во Алијансата за Албанците, претходно го разреши Арбен Фетаи од функцијата претседател на партиското собрание. Таравари изјави дека се исклучени и некои членови на Претседателството кои јавно се изјаснуваат против Алијансата за Албанците. Се работи за 8 од 46 членови. За Мимоза Муса, Таравари рече дека не е донесена одлука оти не е јасно дефинирано дали останува со Алијансата за Албанците, или со Влен.