Македонија
Шилегов најавува нови автобуски рути и унапреден јавен превоз за помалку од две години

Град Скопје денеска потпиша договор за изработка на Студија за оптимизација на мрежите на линиите на автобускиот превоз.
Како што информираат градските власти, потребата од ваква студија се наметнала заради фактот што актуелната мрежа на линии, според која е организиран автобускиот превоз во Скопје, е направена врз основа на студија која датира од пред точно 40 години – од 1981 година.
Скопскиот градоначалник Петре Шилегов посочи дека изработката на оваа нова студија е и повеќе од неопходна, имајќи предвид колку градот е променет за овие 40 години и во однос на популацијата, и во однос на урбаниот развој.
Студијата е наречена BRS (Bus Restructuring Study), а со нејзина помош ќе се изврши целосна реорганизација на мрежата на автобуски линии.
„Од оваа студија очекувам да понуди нови решенија за системот на јавниот превоз кои ќе ја зголемат неговата популарност што недвосмислено води до пораст на бројот на патници кои го користат јавниот превоз, правејќи го индивидуалниот автомобилски превоз помалку атрактивен, а градскиот – одржлив“, нагласи Шилегов.
Оваа студија, објасни градоначалникот, ќе понуди нови автобуски рути, унапреден систем за наплата и унапреден возен ред што ќе биде во целосна согласност со потребите за мобилност на граѓаните во различни периоди од годината, викендите, празниците, но и дневните периоди усогласени со временските пикови.
„Дополнително, студијата ќе ги вклучи и двете рути на брзиот автобуски транспорт БРТ, со алтернативни сценарија со една рута и без овие рути за периодот пред неговото пуштање во употреба. Временската рамка што е предвидена за реализација на овој проект е 12 месеци, односно Студијата треба да биде завршена до јуни 2022 година. Оттука, убеден сум дека за помалку од 2 години нашите сограѓани ќе можат во целост да ги почувствуваат придобивките од новата организација на јавниот превоз во Скопје“, порача градоначалникот.
За изработувач на студијата е избран конзорциумот меѓу израелската компанија РОМ Транспортејшн и англиската ГСТЦ ЛТД со понуда во висина од 322.530 евра.
„Понудата е избрана како најдобра од вкупно 17 понуди од светски реномирани консултантски организации од сферата на транспортот. Станува збор за исклучително искусни и реномирани компании кои изработувале вакви студии за потребите на јавниот превоз на градови од Израел, Велика Британија, Романија, Литванија, Хрватска и други земји членки на ЕУ, градови од соседните Србија и Албанија, како и градови од поранешните советски републики, од Јужна Америка и други“, рече градоначалникот по потпишувањето на договорот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Партијата за движење на Турците: Неопходно е континуирано усовршување на Охридскиот рамковен договор

Денес одбележуваме значајна годишнина од потпишувањето на Охридскиот рамковен договор, документ кој претставува темел за градење на соживот, еднаквост и меѓуетничка хармонија во нашата држава. Овој договор е исклучително важен за унапредување на меѓуетничките односи и останува еден од клучните столбови на демократијата во Република Северна Македонија, велат од Партијата за движење на Турците – ТХП.
Од таму велат дека го поздравуваат, како што велат, историското значење на Охридскиот рамковен договор, кој поставил основа за инклузивно општество и за зајакнување на правата на сите заедници.
„Сепак, сметаме дека е неопходно континуирано усовршување на неговата имплементација, со цел целосно остварување на неговите принципи. Посебно внимание треба да се посвети на помалку бројните заедници, кои мора да бидат рамноправно вклучени во сите општествени процеси и да ги почувствуваат конкретните придобивки од овој договор.
Понатаму, нагласуваме дека за целосно остварување на демократските принципи на Охридскиот рамковен договор, постои потреба од воведување на подемократски изборен модел. Ваков модел би овозможил посилна и поправична застапеност на сите заедници, особено на помалку бројните, во демократските процеси, зајакнувајќи ја довербата во институциите и промовирајќи вистинска еднаквост.
Веруваме дека само преку заеднички напори, дијалог и посветеност на сите чинители во општеството можеме да изградиме држава во која секој граѓанин, без оглед на етничката припадност, ќе се чувствува рамноправен и вреднуван. ТХП останува посветена на промовирање на овие вредности и на поддршка на политиките што водат кон целосна реализација на духот на Охридскиот рамковен договор. Нека оваа годишнина биде потсетник за важноста на единството, солидарноста и заедничката работа за подобра иднина за сите“, велат од ТХП.
Македонија
Бесплатни униформи за сите основци и ранци со училишен прибор за сите првачиња во Општина Центар

Учениците во сите општински основни училишта на територија на Центар, учебната 2025-2026 година ќе ја почнат во училишни униформи коишто за првпат се воведуваат, а сите запишани првачиња ќе добијат и ранчиња со училишен прибор.
„Приближно 4.700 ученици, од прво до деветто одделение од центарските училишта годинава ја почнуваат со униформи кои ќе бидат бесплатни за децата. Со овој чекор ги подобруваме условите во училиштата и вложуваме во поквалитетно образование. Покрај воведувањето на униформи, но и бесплатни ранчиња со училишен прибор за првачињата, исто така ги подобруваме условите и преку реконструкција на училиштата. Во тек е реновирање на трите општински основни училишта „11 Октомври“, „Гоце Делчев“ и „Димитар Миладинов“ за да им овозможиме на учениците подобра настава“, вели градоначалникот на општина Центар, Горан Герасимовски.
Македонија
ДУИ: Чаир не смее да се врати во рацете на човекот кој за 20 години ја претвори општината во приватна фирма за лично богатење

Чаир не смее да се врати во рацете на човекот кој за 20 години ја претвори општината во приватна фирма за лично богатење. Граѓаните на Чаир добро знаат кој е Изет Меџити и неговиот послушник Висар Ганиу. Знаат дека за време на нивните мандати, општината стана синоним за криминал, корупција и целосен хаос, обвинија од ДУИ.
„Знаат дека наместо да живее меѓу луѓето за кои наводно се грижи, тој удобно живее во Бутел, а Чаир го гледа само како поле за лични бизниси и брзи пари.
Меџити треба да одговори колку милиони евра влегле во нивните џебови од оваа корупција со градењето на диво?
И дали со тие пари Меџити планира да се обиде да прави поткуп за изборите што секако нема да го спаси.
Меџити на овие избори не се бори за чаир и граѓаните туку за својот сопствен бизнис интерес.
Ако имаше интерес за граѓаните во изминатите 20 години ќе направеше нешто.
За време на неговото владеење, од дивоградби и сомнителни легализации криминално беа украдени 225 милиони евра.
Ниту еден голем инфраструктурен проект, ниту едно трајно решение за проблемите на граѓаните – само згради, бизниси и договори за неговата мрежа на луѓе.
Затоа Меџитит знае дека нема поддршка од Албанците и мора понижено да ја бара раката на Христијан Мицкоски и ВМРО-ДПМНЕ.
Седнат во скут на Мицкоски, се надева дека со платената пропаганда на вмровските портали ќе го спасат од пораз.
Но Чаир не заборава, а чаирчани нема да дозоволат со парите стекнати преку криминал Изет да го поништи нивниот глас. Ни со украдените милиони нема да ја избрише вистината за неговите 20 години уништување на општината.
Граѓаните на Чаир заслужуваат да живеат во општина без хаос, без корупција и без луѓе кои ја гледаат општината само како банкомат за лични интереси. На 19 октомври, време е за крај на ерата на дивоградби, криминал и уцени“, се наведува во соопштението.