Градоначалникот Шилегов денеска ја посети новоотворената куќа за отворено домување за жените жртви на семејно насилство, кои ја напуштиле насилната средина. Куќата беше отворена неодамна од страна на Град Скопје во соработка со Националната мрежа против насилство врз жените и семејното насилство.

Овој концепт-модел овозможува реинтеграција и рехабилитација на жените жртви на семејно насилство преку обезбедување безбедно домување во период од 6 месеци на оние жени што биле жртви на семејно насилство и ја напуштиле насилната средина, а притоа немаат свое живеалиште ниту, пак, може да го користат живеалиштето на своите блиски. Поконкретно, за најмалку 10 жени жртви на семејно насилство и за нивните деца, кои живеат на подрачјето на град Скопје, ќе биде обезбедено отворено или транзитно домување во времетраење од 6 месеци од моментот на напуштање на насилната средина сè додека жртвата не биде целосно интегрирана во општествениот живот, односно не стане економски независна, не обезбеди сопствено домување и стабилен финансиски приход. Дополнително, ќе бидат обезбедени психолошка поддршка, советување и помош при вработување преку економско јакнење и унапредување на образованието. Оваа куќа за отворено домување располага со 4 простории за спиење, тоалет, бања и заеднички простор за кујна и дневен престој.

„Град Скопје изминативе години ја препознава потребата за обезбедување услуги на жртвите на семејно насилство како посебна ранлива категорија, нивна реинтеграција и рехабилитација и развива програми и мерки за помош и поддршка во согласност со нивните потреби. Ова е видливо и преку воспоставувањето на Првиот семеен центар на Град Скопје, кој функционира во рамките на Здружението нa граѓаните ХЕРА и кој претставува прв и единствен специјализиран сервис, каде што услуги добиваат и сторителите на семејно насилство, при што се работи на превенција на насилството. Само да потсетам дека пред локалните избори, уште како кандидат за градоначалник, потпишавме јавна заложба со Националната мрежа за вложување во борбата со семејното насилство и ова е производ на континуитетот што го одржуваме при креирање и реализирање на градските политики во соработка со здруженијата. Грижата за квалитетен живот на нашите сограѓани е важна за сите нас и за општеството, особено кога жената е ставена пред предизвик да се сочува како здрава и исполнета личност. Тоа за нас како локална власт е исклучителна одговорност – да бидеме нејзина најголема поддршка. Град Скопје продолжува и понатаму да поддржува унапредување на сервисите од ваков тип, со цел ефективно и ефикасно справување со семејното насилство. Продолжуваме и со поддршката на сите заложби за заштита на основните човекови права и слободи и почитување на општо прифатените норми за елиминирање на сите форми на дискриминација врз жената вклучувајќи го и семејното насилство. Скопје е град за сите и затоа бескомпромисно ќе се бориме да го олесниме и подобриме секојдневието секому кому нашата помош му е неопходна“, рече Шилегов.