Жаклина Шопова, советник во Советот на Град Скопје, на денешната седница потенцираше дека со амандманот којшто го предлага советничката група на ВМРО-ДПМНЕ ќе се обезбедуваат средства за реконструкција на улицата Христо Татарчев каде што ќе се опфати коловоз, пешачки патеки и фекална канализација, бидејќи и во самата програма за Модерно Скопје е предвидена реконструкција на истата.

„Ние советниците во разговор со граѓаните коишто живеат на улица Христо Татарчев, истовремено консултирајќи се со стручните служби, а со оглед дека градот Скопје има своја програма, во која  е наведено дека улица Христо Татарчев ќе биде реконструирана комплетно, и тоа од Мечкаров до улица Драчевска, од Маркова Река до бензинската на Макпетрол, и тоа ќе има реконструкција на атмосферската канализација, велосипедска и пешачка патека, го предложивме овој амандман.

Во однос на укажувањата дека советничката група на ВМРО-ДПМНЕ предлага амандмани пред истек на фискалната година, Шопова посочи дека во буџетот на градот има 50 милиони денари неискористени средства за зеленило па праша дали истите би се искористиле со оглед дека во декември месец не може да се прават дополнителни зелени површини.

„За временската рамка  би дала едно образложение,  во буџетот има неискористени 50 милиони денари за зеленило па би сакала да знам дали овие средства до крајот на годината ќе се искористат бидејќи не знам какво зеленило  би можеле да им овозможиме  на граѓаните на Скопје во декември. Затоа ние и го предложивме овој амандман, ќе гласаме за овој амандман и сметам дека треба и останатите советници да гласаат за истиот“, вели таа.

Но, градоначалничката на Град Скопје, Данела Арсовска, и советничката група на СДСМ и коалицијата го одбија амандманот за итна реконстуркција на улицата Христо Татарчев.