Македонија
Шпанија продолжува со заложбите за проширување на ЕУ
Националниот совет за евроинтеграции и Комисијата за европски прашања одржаа заедничка седница, на која беше извршена презентација на програмата и приоритетите за работата на Шпанското претседателство со Советот на Европската Унија за периодот јули – декември 2023 година, од страна на амбасадорот на Кралството Шпанија во Република Северна Македонија, Хозе Луис Лозано Гарсија.
Успешна работа на шпанското претседателство му посакаа претседателите на Националниот совет за евроинтеграции и на Комисијата за европски прашања, Александар Николовски и Арбер Адеми.
Шпанскиот амбасадор Гарсија информира дека неговата земја го презеде шестмесечното ротационо претседавање од Шведска и по петти пат ќе ја извршува оваа улога на претседавач. Тоа е последното целосно оперативно претседавање од законодавниот циклус, пред изборите за Европскиот парламент, кои ќе се одржат во јуни следната година.
Во продолжение амбасадорот Гарсија ги презентираше четирите приоритети на Шпанското претседателство со ЕУ, и тоа:
· реиндустријализација на ЕУ и стратешка економија;
· унапредување на зелената агенда и животната средина;
· промовирање на поголема социјална и економска правда;
· зајакнувањето на европското единство.
Овие приоритети подразбираат дека Шпанското претседателство ќе работи на намалување на прекумерната зависност на ЕУ од трети земји во областите како што се енергијата, здравството, дигиталните технологии и храната, и ќе го промовира развојот на стратешките индустрии и технологии во Европа и со заедничка стратегија да се гарантира економската безбедност на ЕУ.
Шпанија ќе се ориентира на реформа на пазарот на електрична енергија и повеќе обновливи извори. Во таа насока да се намали зависноста од енергија и суровини, да се намалат сметките за енергија, да се зголеми конкурентноста и да се отворат работни места.
На Европската Унија ѝ треба поконкурентна, но и поправедна и погрижлива економија, според визијата на Шпанското претседателство. Така, ќе се насочат на соодветна ревизија на финансиската рамка, реформа на фискалните правила за надминување на штедењето, зголемување на транспарентноста и комбинирање на финансиската одржливост, со правилно финансирање на зелената и дигиталната транзиција.
Во текот на својот шестмесечен мандат, шпанското претседателство ќе се залага за зајакнување на европското единство, со координирана поддршка за Украина под принципите на обединетост и солидарност.
Свое обраќање имаше и амбасадорот Дејвид Гир, шеф на Делегацијата на Европската Унија во Република Северна Македонија. Тој стави акцент на важноста од заедничка соработка во остварувањето на заедничките цели. Зборуваше за реформите кои треба да бидат реализирани, осврнувајќи се на владеењето на правото, борбата со корупцијата, судството, потоа на улогата на Собранието и соработката со граѓанскиот сектор. Нацрт-уставните измени, кои наскоро треба да пристигнат во Собранието, се важен чекор кон ЕУ, рече евроамбасадорот Гир. Во тој контекст повика на отворена дебата за ова прашање, на политичка одговорност, а националните интереси да бидат ставени на прво место.
Претседателот на Комисијата за европски прашања, Арбер Адеми, истакна дека за земјава е особено важно да се одржи втората Меѓувладина конференција за време на Шпанското претседателство, за што услов се уставните измени. Во таа насока, Адеми рече дека веќе се направени големи компромиси, дека преостанува овој услов, дека ова е наша држава и заеднички треба да се мисли на идните генерации и да не се става во опасност европската перспектива.
Можност да се обратат и да ги искажат своите ставови пред присутните имаа и пратеници од Собранието на Република Северна Македонија.
Учесниците на денешната седница едногласно изразија благодарност за досегашното претседавање на Шведска и ѝ посакаа успешна работа на Шпанија во остатокот од годинава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче: ВМРО-ДПМНЕ сака да ја врати Македонија во времето на страв и уцени
ВМРО-ДПМНЕ сака повторно да ја врати Македонија во времето на страв, на уцени и притисоци, но граѓаните нема да потклекнат, рече претседателот на СДСМ, Венко Филипче, на вечерашниот собир во Конче во поддршка на кандидатот за градоначалник од СДСМ, Благој Илиев.
Тој остро ги осуди притисоците врз граѓаните во текот на кампањата, потенцирајќи дека власта на ВМРО-ДПМНЕ се обидува да ги заплаши луѓето преку институциите.
„Со полиција, финансиска полиција, шумска полиција, преку социјалните служби, прават притисок врз граѓаните. Сакаат да потсетат на времето кога сите живеевме во страв и уцени. Но тоа време заврши. Луѓето сакаат нормален живот, без притисоци, без закани, без поткуп,“ рече тој.
Филипче повика на масовна излезност во недела и поддршка за кандидатот на СДСМ, Благој Илиев.
„Да излеземе во огромен број во недела и да го заокружиме бројот 5 за Благој Илиев, човекот кој работи за вас, не за себе. За Конче да продолжи да се развива“, рече Филипче.
Тој кажа дека градоначалниците од СДСМ реализирале 90 до 100 проценти од ветеното.
„Нема општина во која СДСМ има градоначалник, а да ветената програма не е завршена 90 или 100 проценти“, рече Филипче.
Тој истакна дека граѓаните најдобро ја чувствуваат разликата кога општините ги водат луѓе кои работат чесно и посветено во интерес на сите.
„Многу добро знаете како Благојче работеше во минатиот мандат, како се однесуваше додека беше градоначалник, дека вратата му беше секогаш отворена и дека работеше за доброто на општината и на вас, граѓаните“, порача Филипче.
Претседателот на СДСМ во своето обраќање нагласи дека токму оваа разлика меѓу одговорно и неодговорно владеење се гледа насекаде низ државата.
„Нема општина во држава во која што има градоначалник од ВМРО-ДПМНЕ, а да програмата е завршена повеќе од 20 проценти. Како да се натпреваруваат кој помалку ќе работи за граѓаните“, рече Филипче.
Македонија
Претседателката на ЛДП, Моника Зајкова, со поддршка на Горан Герасимовски за втор градоначалнички мандат
Претседателката на ЛДП Моника Зајкова, денеска даде поддршка за втор градоначалнички мандат на Горан Герасимовски, којшто воедно е и актуелен градоначалник на Општина Центар.
Таа, потенцира дека сега е моментот да се изберат резултати, одговорност и отчетност, а не празни ветувања, токму затоа ја дава поддршката на Горан Герасимовски, кој, според Зајкова, ја препознава граѓанската визија, има искуство и е подготвен да работи посветено за доброто на заедницата.
„Одејќи накај Собрание (бидејќи работиме на новиот Предлог- закон за комунална полиција), наидов на предизборните активности на кандидатот за градоначалник на општината во која живеам. Водејќи се од визијата дека на граѓаните им се потребни искусни луѓе кои испорачуваат резултати, а не изговори, упатувам особен повик до сите граѓани кои во првиот круг гласаа за кандидати кои не влегоа во вториот круг: Поддржете кандидат кој ги разбира вашите потреби, кој со своето искуство и посветеност ќе испорача повеќе резултати и веднаш ќе започне со работа – со завршување на започнатите проекти и реализација на нови решенија во интерес на сите нас. Затоа давам поддршка за луѓе како Горан – кои ја препознаваат граѓанската визија, имаат искуство и се подготвени да работат посветено за доброто на заедницата. Сега е моментот да избереме резултати, одговорност и отчетност, а не празни ветувања“, напиша Зајкова, на својата објава на Фејсбук.
Македонија
Утре сончево време со температура до 21 степен
Времето утре наутро ќе биде постудено со услови за појава на магла по одделни котлини и речни долини. Преку денот времето ќе биде сончево со мала до умерена локална облачност. Ќе дува слаб ветер од јужен правец, информира УХМР.
Минималната температура ќе биде во интервал од -3 до 4, а максималната ќе достигне од 16 до 21 степен.
Во Скопје, утрото постудено, во делови од котлината магливо. Преку денот времето ќе биде сончево со мала до умерена облачност. Ќе дува слаб југоисточен ветер. Минималната температура ќе се спушти до 2, а максималната ќе достигне до 18 степени.
Под влијание на висок воздушен притисок следува период на стабилно и суво време со постудени утра, а дневната температура ќе биде во пораст, особено во деновите од викендот. Претпладне по одделни котлини и речни долини ќе има услови за појава на магла

