Министерката за животна средина и просторно планирање, Каја Шукова, на денешниот брифинг ги информира претставниците на медиумите за реализираните и за планираните активности во заштитата на животната средина и одговораше на прашања за актуелните теми.

Шукова информира за најголемите инфраструктурни проекти, пред сѐ, за напредокот во воспоставувањето на регионалните системи за управување со отпад, при што Источниот и Североисточниот Регион се во најнапредна фаза и се очекува најбргу што може објавување тендер.

Во делот на водите се осврна на управувањето со речните сливови и реализацијата на 50-те милиони евра заем обезбеден од Европската инвестициска банка распределени во сите општини во државата. Средствата се наменети за подобрување на инфраструктурата за води за собирање и третман на отпадни води, водоснабдување, изградба на филтер-станици, намалување загуби на вода во зависност од приоритетите на општините.

Министерката Шукова информира дека тендерот за изградба на пречистителна станица во Тетово е веќе објавен во декември 2023 година, а во фаза на подготовка е тендерот за изградба на пречистителна станица во Битола. Во однос на изградбата на пречистителната станица во Скопје, Шукова нагласи дека веќе е направена авансна исплата, со што изведувачот може да почне со работа.

Во делот на заштита на природата, како што информира министерката, почната е нова иницијатива за заштита на Јабланица, во тек е процесот на ревалоризација на природните вредности на Маврово, а МЖСПП првпат годинава ќе пристапи кон директно финасирање на сите четири национални парка за да се унапреди нивната работата и да се обезбеди потребната инфраструктура, што ќе им овозможи да работат со екосистемски услуги и сечата на дрва да не биде главен извор на приходи.

Новитет се и размислувањата за прогласување геопаркови во државата и реализирање иницијатива за прогласување геопарк во близина на Демир Капија.

Во делот на заштита на воздухот, Шукова зборуваше да поголемите проекти што продолжуваат со реализација. Особено се осврна на проектот финансиран од ЕУ-фондовите наменет за справување со аерозагадувањето на четири града, Скопје, Битола, Куманово и Тетово, во рамките на кој е планирана замена на системите за затоплување со еколошки системми во 70-ина јавни објекти, набавка на еколошки автобуси за Скопје и зголемување на зелените површини.

Во однос на справување со историските еколошки жешки точки, таа најави дека продолжува работата за отстранување на линданот од ОХИС, а за другите се размислува за преземање заштитни мерки.