Министерката за животна средина и просторно планирање Каја Шукова оствари средба со вработените на пречистителната станица за намалување на загадувањето со шествалентен хром во „Југохром Алзар“ ДООЕЛ Јегуновце – во стечај.

Состанокот беше инициран од страна на вработените во „Југохром“ – во стечај поради проблеми со исплатата на месечните приходи, побарување дополнителни средства за дежурства во неработните денови, како и обезбедување дополнителна заштитна опрема.

„Пречистителната станица е објект под сопственост на ‘Југохром Алзар’ ДООЕЛ Јегуновце, а луѓето што се грижат за нејзиното функционирање се вработени во компанијата. Од причина што оваа инсталација моментно е под стечај и не работи, а прочистувањето на водите што се излеваат од депонијата е од витално значење за заштитата на животната средина и подземните води од шествалентниот хром, Министерството за животна средина и просторно планирање ја презема обврската да ги плаќа надоместоците за месечните плати на луѓето што оперираат со пречистителната станица, како и за хемикалиите што треба да се набавуваат, односно трошоците за одржување на пречистителната станица“, вели таа.

На состанокот министерката информира дека за барањата на вработените веќе е разговарано со стечајниот управител и тие ќе бидат исполнети со новиот договор што ќе го потпише МЖСПП со стечајниот управител, односно ќе се обезбеди редовно исплаќање на платите, решен е проблемот со здравственото осигурување, а Министерството ќе направен напор да ја обезбеди заштитната опрема за вработените. Според Шукова, свесни за важноста на работата на пречистителната станица, останува да се следи состојбата со стечајната постапка, од која ќе зависи иднината на вработените.