Македонија
(Видео) Ѓорчев ја праша Ангеловска дали е точно дека во нејзината фирма ИТ-инжинери земаат 200 евра плата

Дали е точно дека Нина Ангеловска во нејзината фирма исплаќа 200 евра плата за ИТ-инжинери и дека плаќа на рака, праша пратеникот од ВМРО-ДПМНЕ Влатко Ѓорчев, кој побара одговори од Ангеловска, која сè уште не е избрана за министерка за финансии. Тој го критикуваше предлогот на Зоран Заев за назначување на Ангеловска и порача дека таа ќе биде дел од најлошата влада во историјата на Македонија.
Премиерот Заев негираше дека Ангеловска го правела тоа во нејзината фирма, а спикерот Талат Џафери го искара Ѓорчев дека не го почитува кодексот за пратеници и дека сè уште не е избрана за министерка, па му порача да почека прашањата да ги постави на седница за пратенички прашања.
Единствената пратеничка од опозициската ВМРО- ДПМНЕ која го поздрави предлогот за новата министерка беше Даниела Рангелова. Таа го пофали премиерот Заев што одлучил да предложи жена на местото министерка за финансии, а Ангеловска дека има добра биографија.
„Ми остави впечаток една реченица која ѝ ја кажала нејзината мајка – Нина треба да си ачик и да забележуваш сè околу себе. Се надевам дека сте ачик и дека забележавте дека економската состојба не е добра“, рече Рангелова.
На седницата за избор на новите министри за реплика се пријавија речиси сите пратеници од ВМРО-ДПМНЕ и побараа оставка од Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Утре еден час помалку спиење – во два по полноќ почнува летното сметање на времето

Вечерва, сабота кон недела, почнува летното сметање на времето.
Тоа значи дека стрелките на часовникот во два часот наутро на 30 март ќе се поместат еден час нанапред и ќе биде три часот.
Летното сметање на времето завршува во последната недела во октомври, со поместување еден час наназад, кога три часот наутро ќе се брои како два часот по полноќ.
Летното сметање на времето е договореното правило за поместување на часовниците напролет, во последната недела од март. Овој систем во светот е стар повеќе од еден век. Предложен е 1905 од британскиот претприемач и градежник Вилијам Вилет, но бил прифатен во 1916 година со цел заштеда на јаглен.
Во Македонија летното сметање на времето е воведено во 1983 година, кога таква одлука била донесена на ниво на тогашната Сојузна федеративна република Југославија.
Македонија
Променливо облачно и нестабилно со повремени врнежи од дожд, особено попладне

Времето денеска, променливо облачно и нестабилно со повремени врнежи од дожд, особено попладне. Локално ќе има услови за појава на краткотрајно невреме со пообилен пороен дожд (за кратко време над 15 л/м2), појава на грмежи и засилен ветер. Минималната температура ќе биде во интервал од 3 до 9, а максималната ќе достигне од 12 до 18 степени.
Во Скопје ќе биде променливо облачно со повремен дожд. Попладне во делови од котлината ќе биде нестабилно со пороен дожд и грмежи. Минималната температура ќе се спушти до 8, а максималната ќе достигне до 17 степени.
И во наредните денови продолжува периодот на променливо облачно и нестабилно време со повремени врнежи од дожд, особено во попладневните часови.
Локално ќе има услови за појава на краткотрајно невреме со пообилен пороен дожд (за кратко време над 15 л/м2), појава на грмежи и засилен ветер.
Македонија
Големо невреме на автопатот Штип-Миладиновци, зголемен број на одрони

Големо невреме вечерва има на автопатот Штип-Миладиновци. Кај наплатната станица Кадрифаково покрај поројниот дожд имало и град.
Подружницата на „Македонија пат“, информира дека поради зголемен број одрони на патот Делчево-Пехчево-Берово, екипи на претпријатието работат на нивно чистење.
„Апелираме на претпазливо возење и почитување на сообраќајната сигнализација. Екипите остануваат на терен до целосно отстранување на одроните“, информираа од „Македонија пат“.