Македонија
Ѓорѓиевски: ГРЕКО потврди дека Владата е криминална

Владата е криминална, тоа го потврдува ГРЕКО, изјави Орце Ѓорѓиевски од ВМРО-ДПМНЕ на прес-конференција.
Полицијата во извештајот, рече Ѓорѓиевски, е карактеризирана како најкорумпирана институција во Македонија, а граѓаните, наместо заштитник, во полицијата гледаат криминал и рекетар.
„Зоран Заев и Оливер Спасовски придонесоа за разнишување на угледот на полицијата во очите на граѓаните и за нејзино претворање во заштитник на криминалот. Полицијата е корумпирана затоа што Заев и Спасовски, наместо да бркаат криминалци, преку МВР распишуваат тендерски постапки за делење милионски бизниси на луѓе блиски до власта. Преку МВР на најсомнителен можен начин им беа доделени неколку лиценци за возачки испитни центри на фирми формирани непосредно пред да биде распишан огласот, без никакво претходно искуство, а од игра беа исфрлени фирми со децениско искуство. МВР е корумпирано и затоа што набави возила во висина од 1 милион евра, вредност поголема од нивната малопродажна цена“, изјави Ѓорѓиевски.
Тој го обвини премиерот Заев дека поради него полицијата е нотирана како политизирана институција во извештајот на ГРЕКО.
„Две и пол години нема ниту една акција против функционери на власта, иако во целата држава наголемо се вели дека рекет бара секој партиски функционер од СДСМ, од маалски шериф до челниците на власта. Господине Заев, немојте да мислите дека ова ќе продолжи вака. Криминалот ќе биде санкциониран, а вие, како и сите други што ви помагаат во криминализирањето на Република Македонија, ќе одговарате кога ќе се врати правната држава во Република Македонија“, додаде Ѓорѓиевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без вода делови од Центар и Аеродром

Од ЈП Водовод и Канализација известуваат дека денеска поради уличен дефект на улицата Питу Гули бб, општина Центар (во близина на Тинекс), прекинато водоснабдување ќе имаат следниве улици: Питу Гули, дел од Загребска, Ганчо Хаџипанзов, Капештец, Димитар Пандилов, Караорман, висока зона Козле и Ловќенска-крак 1,3,5 и 7.
Водоснабдувањето ќе биде прекинато од 08:30 часот до завршување со санација на дефектот.
Денеска поради уличен дефект на 3-та Македонска Бригада бб, прекинато водоснабдување ќе имаат објектите на Вива, Метро, Центро, Спорт М и Форд, во општина Аеродром.
Водоснабдувањето ќе биде прекинато од 08:00 часот до завршување со санација на дефектот.
Македонија
Делови од Аеродром, Центар и Ѓорче Петров денеска без струја

Од ЕВН Македонија АД известуваат дека денеска без електрична енергија ќе останат:
· во периодот од 08.10 до 15.00 часот, корисниците на дел од село Долно Лисиче.(општина Аеродром)
· во периодот од 08.10 до 15.00 часот, корисниците на објектите спроти Ист Гејт населба Крњево.(општина Центар)
· во периодот од 08.10 до 12.00 часот, корисниците од улица Божидар Рајковиќ, дел од ул. Горноврановска и дел од улицата Горно Лисиче (општина Аеродром)
· во периодот од 08.10 до 16.00 часот, корисниците на улиците Ибе Паликуќа, Воин Драшкоци, Веле Марков (општина Ѓорче Петров)
Македонија
Претежно облачно со повремен дожд

Времето денеска ќе биде променливо облачно со повремени локални врнежи од дожд. Кон крајот на денот врнежите насекаде ќе престанат. Ќе дува умерен до засилен ветер од северен правец (локално над 60 km/h). Минималната температура ќе биде во интервал од 6 до 13, а максималната ќе достигне од 8 до 16 степени.
Во Скопје, претежно облачно со повремен дожд. Ќе дува умерен, во делови од котлината повремено засилен ветер од северен правец. Минималната температура ќе се спушти до 12, а максималната ќе достигне до 14 степени.
Времето во наредните денови
Од четврток времето ќе биде стабилно и суво со слаб до умерен северен ветер. Дневната температура ќе биде во пораст.