Директорот на Бирото за јавна безбедност, Александар Јанев заедно со својот тим, денеска, беше во работна посета на Единицата за интервентна полиција, ЕВР и ПС Ѓорче Петров и ЕВР и ПС Карпош при СВР Скопје, за да се информира за состојбата и функционирањето.

Како што соопштија од МВР, при посетите на одржаните работни состаноци со раководствата директорот Јанев се информирал за тековните активности на овие служби, нивните проблеми, потреби како и предизвиците со кои се соочуваат во текот на нивното секојдневно работење.

-На припадниците на Интервентната полиција им изрази посебна благодарност за нивните досегашни решителни и храбри интервенции во критични и ризични ситуации и ги охрабри силно да продолжат со нивната пожртвувана и посветена работа во превенирање на ризици, брзи, ефикасни и професионални акции со цел намалување на криминалот и осигурување на мирот и безбедноста на граѓаните во градот Скопје. Покрај ова на сите колеги со кои денес се сретна директорот Јанев им порача да работат со силен интегритет, почит и достоинство, се наведува во соопштението.

Воедно, се најавува дека во иднина ваквите посети ќе станат редовна пракса за увид во работењето и функционирање на сите служби кои се под надлежност на Бирото за јавна безбедност.

– Целта на овие посети и средби е подобрување на условите за работа и создавање на функционална полиција која ќе биде во служба на граѓаните и спроведување на законот кој еднакво важи за сите. Безбедноста на граѓаните е наш приоритет. Исклучиво важно е сите полициски службеници да се водат од правилото дека полицијата служи, а не владее, стои во соопштението од МВР.

Во Македонија има околку 130 илјади дијагностицирани пациенти со дијабет. Изминатата година дијабетичарите ја прогласија за најтешка бидејќи немаа терапија. Под мотото „Благостојбата кај лицата со Дијабетес – создаваме дијабетес култура“денеска Сојузот на здруженија на дијабетичари на Македонија го одбележи Светскиот ден на дијабетесот.

Како што беше посочено на настанот, дијабетесот во земјава е во подем и има околу 130 илјади пациенти со дијагностициран дијабетес, како и уште половина од оваа бројка лица кои што не се дијагностицирани. Под мотото „Благостојбата кај лицата со дијабетес“ беше испратена порака за превенирање на компликациите на пациентите, да се обрне внимание на примарната заштита, како и навремено да се поставуваат дијагнозите на пациентите за отпочнување со терапија.

Претседателот на СЗДСМ, Велев, посочи дека е потребна достапност на иновативната терамија, како и да се продолжи со инсулинската терапија како досега. Повика на промена на моделот на т.н. референтна цена за граѓаните да можат сами да ги набавуваат потребните лекови во аптека.

– Го одбележуваме Светскиот ден на дијабетесот – 14 Ноември, оваа година како финале на сите активности на 25-те здруженија од земјава, да ги слушнеме нивните гласови преку тие активности и да се решат нивните проблеми. Пред се достапност на иновативната терапија, да се продолжи со инсулинската терапија како што е, да се промени моделот на достапност на т.н. референтна цена, кај што граѓанинот, односно пациентот сам ќе си зема од аптека, систем за сите лица со дијабетес тип 1 во Македонија со цел да се намалат компликациите, да се намали нивното отсуство од работа и да се зголеми продуктивноста, со квалитетно менаџирање на тој систем за континуирано мерење на гликемија и секако ќе расте бројот на лица кои носат Т-1 пумпи, посочи Велев.

Нагласи дека кардиоваскуларните заболувања се процентуално најзастапени, потоа ретинопатијата, затоа, додаде, потребно е час поскоро да се стави терапијата за ретинопатијата на позитивната листа.

– Кардиоваскуларните заболувања се најбројни, потоа ретинопатијата. Сакаме час поскоро да ја имаме таа терапија, наместо да ја купуваме приватно, која е многу скапа, да биде ставена на позитивна листа и да има за сите пациенти, а не како сега со ограничен пристап, додаде Велев.

Заменик министерот за здравство Андовски, пак, истакна дека Министерството е во преговори со Светската здравствена организација за проширување на превентивните програми.

– Министерството за здравство е во длабоки преговори со Светската здравствена организација за проширување на превентивните програми, бидејќи сметам дека треба таму се фокусираме. До крајот на годината ќе излеземе со детали во однос на проширување на програмите, рече Андовски.

Министерството за здравство информира дека двајцата пациенти кај кои беше извршена трансплантација на органи од починат донор се во добра општа состојба. Како што посочуваат, интервенциите се успешни, со уреден постоперативен тек и пациентите се веќе пуштени на домашно лекување.

-Двајцата пациенти кај кои беше извршена трансплантација на органи од починат донор се во добра општа состојба. Овие денови за нив се грижеа медицинските тимови на Клиниките за нефрологија, урологија и КАРИЛ. Им посакуваме успешно закрепнување, изјави проф.д-р Билјана Кузмановска, национален координатор за транплантација.

Како што посочуваат од Министерството, благодарение на хуманиот чин, храброста и емпатијата на едно семејство кое одлучи да даде согласност за донирање на органите од свој близок, двајца пациенти со ретка крвна група добија бубрег и ќе продолжат да живеат нормален живот, без потреба од дијализа.

-Огромна благодарност за сите медицински тимови и болнички координатори вклучени во трансплантацијата, се вели во соопштението на Министерството за здравство.