Македонија
Јакимовски: Повторно угинати животни во скопската Зоолошка градина, итно затворање и одговорност од надлежните

Градската организација на Либерално-демократската партија, бара одговорност за последното угинување на животни во зоолошката градина во Скопје, и како директни виновници ги посочува раководството на Зоолошката градина во Скопје и градоначалничката Данела Арсовска.
„Во вторникот на 11 февруари, при утринска контрола во Зоолошката градина затекнати се угинати животни, берберски овци, кои се последните жртви од лошото менаџирање како со Зоолошката градина, така и со градот од страна на градоначалничката Арсовска. За неполн мандат сведоци бевме на кланица на коњи за храна во градината и крвта на Илинденска, угинаа жирафите, слоницата, Царскиот орел, лавот Жика, потоа угинаа ретките и заштитени Пржевалски коњи и имаше епидемија на птичји грип, за еве денес да слушнеме дека минатата недела угинал уште еден вид на ретки животни“, изјави претседателот на Градската организација на ЛДП, Филип Јакимовски.
Посочува дека ова е уште еден во низата скандали кои ја тресат градската администрација и јавните претпријатија.
„Некадарноста на директорите и слабото менаџирање од страна на градоначалничката на Град Скопје, Данела Арсовска, ние граѓаните го плаќаме секој ден. Зоолошката градина е претворена во Градина на стравот и измачувањето, каде што секојдневно животни умираат под мистериозни околности кои никогаш не се до крај разјаснети. Затоа, бараме надлежните институции веднаш да постапат и да истражат како дошло до угинување на животните и конечно, некој за своите дела да понесе одговорност“.
ЛДП во континуитет бара одговорност од Арсовска и нејзините кадри, истовремено иницирајќи ја идејата за враќање на можноста за разрешување на градоначалници, кои согласно постоечкиот закон, се заштитени и не можат да бидат сменети без одржување на избори.
„Упатуваме апел по овој грозоморен чин, додека не е предоцна и додека не угине уште некое животно, веднаш да се затвори и да се пломбира Зоолошката, додека не се утврди дека е безбедна како за животните, така и за вработените и посетителите. Ги повикуваме надлежните институции да постапат, да истражат како е можно толку многу животни да угинат во Зоолошката градина за толку кратко време и да има најстроги казни за оние кои го дозволиле тоа“, додава Јакимовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Притвор за уште едно лице од групата која е под истрага за злосторничко здружување, даночно затајување и перење пари

Управата за финансиска полиција информира дека во текот на вчерашниот ден, 28.08.2025 година, на граничниот премин „Долно Блаце“, при обид за влез во РСМ, е лишен од слобода С.А., државјанин на Р.Косово, за кој постои основано сомнение дека сторил кривично дело „Злосторничко здружување“ (чл.394 ст.2) и кривично дело „Даночно затајување“ (чл.279 ст.3).
Од страна на овластени службени лица од Управата за финансиска полиција, лицето веднаш било превземено и изведено пред судија на претходна постапка од каде му била определена мерка притвор во времетраење од 30 дена, по што истиот е спроведен во КПУ Куманово.
Притворањето, појаснуваат надлежните, е продолжение на акцијата од 25 август, кога беа притворени седум лица, како резултат на сложена предистражна постапка спроведена од страна на Управата за финансиска полиција, под раководство и во координација со надлежен јавен обвинител од ОЈО ГОКК, во рамки на која беа превземени низа мерки и активности и беше обезбеден обемен доказен материјал, што резултираше со поднесување на кривична пријава против 13 физички лица и 10 правни лица, за сторени кривични дела: злосторничко здружување, даночно затајување, даночна измама и перење пари и други приноси од казниво дело, со што е предизвикана огромна штета на државниот буџет во висина од над 430 милиони денари.
Македонија
Обвинение за насилство за таткото кој повреди 15-годишни деца на фудбалскиот натпревар во Штип

Основното јавно обвинителство Штип поднесе Обвинителен предлог против едно лице за кривично дело – Насилство од член 386 став 4 во врска со став 3 и став 1 од Кривичниот законик.
На 24 август, на фудбалскиот стадион “Бело Брдо“ во Штип, за време на фудбалскиот натпревар помеѓу пионерските екипи на фудбалските клубови “Брегалница“ од Штип и “Шкупи“ од Скопје, обвинетиот со грубо насилство ја загрозил сигурноста на оштетените две 15-годишни деца, кои биле играчи во тимот на ФК “Брегалница“.
На децата им нанел телесни повреди, а кај оштетените, останатата присутна публика и во јавноста предизвикал чувство на несигурност, загрозување и страв.
Настанот се случил во 89-тата минута од натпреварот, која судијата поради прекршок (фаул) доделил втор жолт картон со што го исклучил од игра синот на обвинетиот, кој играл за „Шкупи“. Незадоволен од одлуката, најпрво синот се однесувал неспортски и со тупаници и со удар со нога се обидел да се пресмета со еден од фудбалерите на „Брегалница“. Тогаш на теренот влегол таткото и со тупаници и клоци започнал да ги удира двете деца, нанесувајќи им телесни повреди. На игралиштето влегле и други лица од публиката, кои спречиле натамошна ескалација на настанот.
Јавниот обвинител до Основниот суд во Штип достави и предлог за продолжување на претходно определената мерка притвор за обвинетиот.
Македонија
Тројца повредни во пожарот во дискотеката „Пулс“ сè уште се во болница: еден во Истанбул, двајца во „Систина“

Тројца повредени во пожарот во дискотеката „Пулс“, при што загинаа 62 лица, веќе шести месец се на болничко лекување. Директорот на Фондот за здравствено осигурување, Сашо Клековски, рече дека еден од нив е во Истанбул, а двајца се во скопската болница „Аџибадем Систина“.
„Ме радува да спомнам дека за неколку дена бројот на повредени што се хоспитализирани се намали на тројца. Двајца пациенти се пуштени на домашно лекување, еден пациент од Истанбул се врати на 27 август и тој е на домашно лекување и еден пациент од Клиниката за пластична хирургија исто така е пуштен на домашно лекување. Во моментот на лекување во болнички услови останува еден повреден во Истанбул и двајца повредени во ‘Аџибадем Систина’. За жал, двајца сè уште се во тешка, но не критична состојба. Се надевам дека и таму борбата ќе биде успешна и ќе излезат закрепнати“, рече директорот Клековски денес при посетата на болницата во Кочани.
Освен тројцата, кои се на болничко лекување, двајца пациенти сè уште имаат потреба од повремени интервенции оти имаат отворени рани и тие се третираат во Кочани, а Фондот ги покрива контролите за шестмина повредени во болницата „Пирогов“ во Софија, Бугарија, настрана од физикалните терапии, кои редовно се вршат во кочанската болница.
Клековски извести дека пластичен хирург од Белгија направил процена на повредите кај пациентите со изгореници на лицето, вратот и на дланките.
„Имавме чест, дојде познат пластичен хирург од Белгија, кој правеше процена на повредените со изгореници на лицето, на вратот и на дланките. Тоа се осумнаесеттемина повредени со најсензитивни повреди за кои ќе треба подолготраен третман понатаму. Ние сме тука, ќе ја продолжиме поддршката и ќе направиме сè што е потребно повредените да излезат живи, здрави и убави“, рече директорот Клековски и уште еднаш потенцира дека закрепнувањето на повредените е борба на долги патеки.
Директорката на кочанската болница, Катерина Паниќ-Мирчовска, рече дека сè уште е рано за естетски зафати кај повредените, но доколку се неопходни зафати на функционалните делови, како што прстите и вратот, можни се корекции доколку има такви предлози. Паниќ-Мирчовска вели дека силиконските маски направени со 3Д-скениранње и печатење веќе се изработени и во наредниот период ќе ги добијат повредените со лузни на лицето и вратот, а за шест месеци повторно ќе прават набавка на нова компресивна облека.