Македонија
Јакимовски: Советниците на ГРОМ ќе продолжат да ги поддржуваат градоначалниците на ВМРО-ДПМНЕ

Градоначалникот на општина Карпош Стевчо Јакимовски му порача на претседателот на ВМРО-ДПМНЕ Христијан Мицкоски дека советниците од неговата партија во сите општини ќе продолжат да ги поддржуваат и ќе гласаат за ветените проекти и програми на градоначалниците на ВМРО-ДПМНЕ, за разлика од советниците на ВМРО-ДПМНЕ во Карпош, кои упорно ја опструираат работата на општината.
Јакимовски го прашува Мицкоски дали чувствува одговорност за опструкцијата што ја прави во општините во кои што тој нема градоначалник, вклучувајќи го и градоначалникот на Скопје, којшто очигледно веќе не го чувствува за свој.
„Сакам да му порачам на мојот колега Муцунски од општина Аеродром дека нема потреба и натаму да прави обиди за купување советник од ГРОМ, под изговор за наводна грижа за негово работно ангажирање. И ова е порака не само до него туку до сите градоначалници, не само од ВМРО-ДПМНЕ туку од која било партија. Таму каде што советникот на ГРОМ е одлучувачки, советниците на ГРОМ немаат добиено наредба да ги опструираат градоначалниците и нивните одлуки. Ќе продолжиме така, немате потреба од никакво купување, напротив, секаде ќе бидете поддржувани со цел да ги исполните ветувањата коишто ги дадовте на граѓаните во општините во коишто ја добивте власта. Сакам јасно да ви кажам дека вака работам јас и Граѓанската опција за Македонија – ГРОМ. Ние секаде ќе ве поддржуваме, за разлика од вас коишто нè опструирате во општина Карпош и 2025 година, граѓаните ќе можат да направат разлика, меѓу вас, кои сте поддржувани, и мене, којшто во континуитет ме опструирате.
Во исто време, сакам да му порачам на господинот Христијан Мицкоски, за бетонизација на Карпош, не може во мене да најде квалитетен соговорник. Искрен да бидам, тој не е квалитетен соговорник за многу работи. Но, се прашувам, како тој е квалитетен соговорник за градоначалникот на Ѓорче Петров, господинот Александар, и таму се договараат да се изгласа цела населба, со 50 нови станбени згради, од кои и 17-катници. И да му повторам, и советникот од ГРОМ исто така гласаше, со цел да не врши опструкција на градоначалникот на Ѓорче Петров, и ние ќе продолжиме така. Но, во исто време сакам да му порачам на господинот Христијан Мицкоски дека будно ќе следиме каде и во кои општини ќе се носат урбанистички планови за наводна бетонизација на општините, и сето тоа ќе го претставуваме пред граѓаните, со цел да се види неговата лицемерна и лажна политика, зад којашто практично се крие само опструкција и ништо повеќе во општина Карпош. И сакам само да го прашам, чувствува ли одговорност за тоа што се случува во Скопје. Чувствува ли одговорност за неговите неодговорни политики? И чувствува ли одговорност за опструкцијата што ја прави во општините во коишто тој нема градоначалник, вклучувајќи го и градоначалникот на Скопје, којшто очигледно веќе не го чувствува за свој. И очигледно дека ова е негов начин и модел на функционирање, опструкција во општините, опструкција во столицата на Р Македонија, опструкција во Собранието на Р Македонија“, вели Јакимовски.
Додава дека граѓаните јасно ќе препознаат кој е конструктивен и кој нуди решенија за нивните проблеми, „а кој само кенка, како дете пред исфрлање сипаници и сè му пречи и е против сè, а демек кога ќе дојде на власт, тој ќе ги решел сите проблеми“.
„За жал, она како ги демонстрира, како ја води локалната самоуправа и градот Скопје е вистински пример за тоа каков хаос ќе направи ако не дај Боже еден ден, го превеземе водството во РМакедонија“, истакнува Јакимовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.
Македонија
Кривични пријави против двајца угостители од Берово и од Пехчево за бесправно градење

Полицијата поднесе кривични пријави против правно лице – угостителски објект од Пехчево и против С. П. (43) од Пехчево и против правно лице – угостителски објект од Берово и В. К. (32) од Берово поради постоење основи на сомнение за сторени кривични дела бесправно градење.
Пријавениот С.П., сопственик и управител на правното лице од Пехчево, на катастарска парцела во Пехчево во државна соспственост, без одобрение за градење издадено од надлежен орган, изградил тврд објект во кој што е сместен угостителскиот објект и вршел угостителска дејност.
Пријавениот В.К., сопственик и управител на правното лице од Берово, на катастарска парцела, сопственост на Т.К. и М.К., на земјоделско земјиште, надвор од урбанистички план за град Берово, бесправно изградил тврд објект во кој што е сместен угостителскиот објект во кој вршел угостителска дејност.