Македонија
Јамалов: Во 2025 година очекуваме раст на економијата од 3,7 отсто преку реализација на капитални инвестиции во износ од 50,5 милијарди денари

Денес во Собранието на Комисијата за финансирање и буџет на која што се расправа предлог буџетот за 2025 година се обрати пратеникот од ВМРО-ДПМНЕ, Александар Јамалов кој потенцираше дека во 2025 година се очекува економијата на Република Македонија да забележи раст од 3,7% и тоа би претставувало значително подобрување во споредба со изминатите години.
Јамалов додаде дека предвидениот раст од 8,1% на бруто-инвестициите ќе биде поттикнат од засилената реализација на големите инфраструктурни проекти, вложувања во патна и железничка инфраструктура, како и инвестиции во енергетиката, земјоделството, здравството и образованието.
„Дополнително, растот ќе биде поддржан преку поддршката на општините за реализација на капитални инвестиции со цел по рамномерен регионален развој и унапредување на животот на граѓаните во износ од нови 250 милиони евра, покрај овогодинешните 100 милиони евра. Значителен придонес се очекува и од инвестициската активност на домашните компании, како резултат на исклучително поволните финансиски средства обезбедени преку заемот од Унгарија“, рече Јамалов.
Пратеникот посочи дека капиталните инвестиции се централниот елемент на предлог буџетот за 2025 година кои ќе изнесуваат околу 50,5 милијарди денари.
„Со износ од 50,5 милијарди денари, или 5% од БДП, овие инвестиции ќе бидат насочени кон проекти кои ќе имаат долгорочен економски и социјален импакт. Ова создава предуслови за нов циклус на економски раст, обезбедување значително ниво на јавни инвестиции коишто се основа за подобрување на економските перспективи, како и подобар живот на граѓаните“, истакна Јамалов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Убедлива победа на локалните избори, нашите кандидати ќе бидат слуги на народот, а не негови господари

Претседателот на ВМРО-ДПМНЕ, Христијан Мицкоски, на денешниот настан „Саем – Отчет, четири години работа за тебе“ испрати силни пораки поврзани со претстојните локални избори.
Тој изрази уверување дека ВМРО-ДПМНЕ ќе оствари убедлива победа и дека во најголемиот дел изборната трка ќе биде решена уште во првиот круг.
„Тоа го покажуваат анкетите, но и нашето чувство кое произлегува од искуството во комуникација со граѓаните. Но секоја победа мора да се заслужи со работа и чесност. Нема простор за опуштеност, ниту за неоправдана ароганција“, изјави Мицкоски.
Тој нагласи дека кандидатите за градоначалници на ВМРО-ДПМНЕ ќе бидат луѓе од народот, посветени на секојдневните проблеми на граѓаните.
„Секој кандидат мора да се држи до вредностите и принципите. Мора да кревате телефон, да решавате проблеми и да градите подобра иднина“, истакна тој.
Мицкоски се осврна и на тоа каков треба да биде идеалниот градоначалник: работлив, чесен и одговорен.
„Градоначалникот мора да биде прв меѓу еднаквите – слуга на народот, а не негов господар. Мора да биде транспарентен, прв да дојде на работа и последен да замине. Секоја негова одлука ја менува иднината на илјадници луѓе“, посочи лидерот на ВМРО-ДПМНЕ.
Тој додаде дека граѓаните очекуваат луѓе што не размислуваат за следниот изборен циклус, туку за идните генерации.
„Ни требаат градоначалници кои исполнуваат, а не политичари кои ветуваат“, порача Мицкоски.
Македонија
Шејн: Четири години разочарувања во Охрид, нула реализирани проекти на Пецаков и ВМРО-ДПМНЕ

Во Охрид, локалната власт предводена од градоначалникот Кирил Пецаков и ВМРО-ДПМНЕ во последните четири години не успеа да ги реализира ветените проекти за развој на градот, рече кандидатот за градоначалник на Општина Охрид од редовите на СДСМ, Асен Шејн.
Според него, наместо подобрување на инфраструктурата, туризмот и урбанистичкиот ред, охриѓани останале со разочарувања и урбанистички хаос.
„Во Охрид времето помина како да не постоела локална власт. Нема ниту еден нов крупен проект, нема урбанистички ред, нема туристички развој“, вели Шејн, истакнувајќи дека четиригодишната работа на Пецаков и неговиот тим се сведува на празни зборови и неизвршени ветувања.
На листата на нереализирани проекти се наоѓаат плоштадот „Крушевска Република“, катните гаражи на повеќе локации, пречистителната станица во Трпејца и велосипедската патека „Св. Стефан“. Покрај тоа, според кандидатот Шејн, ветените активности во туризмот, како формирање стратешки партнерства, еко туризам, адаптација на капацитети за лица со посебни потреби и развој на алпинизмот, не се започнати, ниту пак реализирани.
„Наместо развој, единствено што видовме е реконструкција на улицата Македонски Просветители, која 80% беше завршена од претходната власт и е најголемиот успех на оваа локална самоуправа. Охриѓани живеат во урбанистички хаос, дишат најзагаден воздух досега, а градот станува мета на потсмев кај туристите“, рече Шејн.
Од тој додаде дека Охрид заслужува сериозна, одговорна и способна локална власт и повикуваат граѓаните да ја искористат можноста за промени.
„Време е за нова енергија, за реални проекти. Охрид не смее да изгуби уште четири години“, истакна Шејн.
Македонија
СДСМ: ВМРО-ДПМНЕ за 4 години локална власт ги разочара граѓаните со хаосот и корупцијата во општините

Почетокот на четиригодишниот мандат на ВМРО-ДПМНЕ на локално ниво се оцени како период на разочарувања, нечисти општини, урбанистички хаос и раст на трошоците за граѓаните, велат од СДСМ.
„Четири години локална власт на ВМРО-ДПМНЕ се четири години разочарувања за граѓаните. Наместо развој и проекти, донесоа само тендерски скандали и партиски злоупотреби на народните пари“, истакнаа од СДСМ.
Според партијата, низ општините предводени од ВМРО-ДПМНЕ се испумпувале пари преку фирми блиски до власта, додека јавноста добила сведоштва за неприродни тендерски процедури каде што едни исти компании редовно се јавуваат како единствени понудувачи.
„Наместо да се подобри животот на граѓаните, тие воведоа поскапи сметки за вода, канализација и смет, како и повисок данок на промет. Општините Прилеп, Штип, Охрид, Битола, Гевгелија, Велес и други бележат значително поскапување на трошоците за граѓаните“, посочуваат од СДСМ.
Главниот град Скопје, според СДСМ, е симбол на урбана деградација: нечисти улици, хаос во јавниот превоз, нефункционални јавни претпријатија, над 150 незаконски дивоградби и узурпиран јавен простор.
„Клучното ветување за бесплатен градски превоз никогаш не се реализираше. Нема ниту 250 еколошки автобуси, ниту модерен транспорт“, велат од партијата.
СДСМ ја оцени локалната власт на ВМРО-ДПМНЕ како неспособна, корумпирана и целосно оддалечена од потребите на граѓаните, додека локалните избори ги сметаат за шанса за „враќање на општините во служба на народот“.
„Локалните избори се шанса да се стави крај на четиригодишното разочарување, хаосот, нереализираните ветувања и криминалот“, велат од партијата.