Ексминистерот Миле Јанакиески смета дека обвинителката Вилма Русковска не приложила ниту еден материјален доказ за да го докаже сведочењето на Александар Василевски-Нинџа, а со кој го поткрепува обивнителниот акт за „Организатори на 27 април“.

Јанакиески повтори дека не можел да прави некаков план за што го товари Русковска бидејќи нема комуникација со обвинетите, а бегалецот Никола Бошковски не го ни познавал. За комуникацијата со Спиро Ристовски и Никола Груевски, обвинетиот Јанакиески рече дека со нив не разговарал за никаков план. Говорот го заврши со цитат од изјава на премиерот Зоран Заев, во која кажува дека не смета дека тој е организатор на упадот во Собранието.

„За Обвинителството е најлесно да се каже: ‘Кој ако не Миле, Миле за сѐ е крив’. Како може да направиш план со лица што воопшто не ги познаваш. Во мојот исказ пред овој суд истакнав и тврдам дека лицето Никола Бошковски воопшто не го познавам. Како изгледа Бошковски, видов од телевизија. Со Трајко Вељановски не сум имал никаква комуникација во текот на 2017 година, а тоа се потврдува и со доказите на Обвинителството. Како може со некого да сум правел и координирал план ако во критичниот период февруари-април 2017 година од неговите 30.000 изведени пораки, ниту една не е со мене. Ниту една! Со Спиро Ристовски имавме комуникација додека бевме министри. Исто така, и покрај тоа што постои детаљна анализа од комуникацијата помеѓу мене и Спиро Ристовски, за критичниот период се потврди дека не постои никаков разговор – доказ меѓу нас за некаков наводен план, а најмалку за дејствто што ми се става на товар. Со Владимир Атанасовски сум немал комуникација. Со Никола Груевски никогаш, ама баш никогаш не сме зборувале за некаков си план за настаните. Исто така, не постои запис, ниту беше изведен доказ во оваа постапка дека со Груевски сум правел план. Во периодот од 22.4 до 1.5.2017 година, период за кој Обвинителството има обезбедено листинзи од мојата комуникација, јас имам разменето, единствено една СМС-порака, што Груевски ја праќа до мене“, рече Јанакиески за комуникацијата со другите обвинети.

Тој рече дека сведокот Александар Василевски-Нинџа е лице без кредибилитет, со криминално минато, повеќепати осудуван и осуден за настаните од 27 април. Тој праша дали нему или на сведоци на државни функции со пристап до безбедносни информации релеватни на настанот треба да им се верува.

„Исказот на сведокот, кој е основата во обвинителниот акт, Александар Василевски-Нинџа, не е потврден од ниеден друг изведен материјален и вербален доказ. Со измените на обвинителниот акт, а поради немање докази, не сум обвинет за организирање на партиската структура – општинските и месните комитети и организаторите на протестите, а се става ново дејство – организирање протести. Во пресудата по првиот предмет е констатирано дека во период од 60 дена имало ненајавени, односно непријавени собири на граѓани во МВР, но тие не биле организирани од ниедна политичка партија, а се одржувале под името ‘За заедничка Македонија’. Како организатори на протестите, во согласност со извештајот што е прифатен како релевантен доказ во првата постапка, ‘се јавувале Борис Дамовски, Богдан Илиевски, Владо Јовановски и Игор Дурловски’. Не е доставен доказ дека Никола Груевски ми дал или дека јас сум примил негова наредба“, додаде Јанакиески.

Обвинетиот Јанакиески рече дека не постои комуникација со кој било пратеник, која би придонела да се случат дејствата во обвинителниот акт.

„Во однос на мојата порака испратена до Крсто Мукоски: ‘качете се дел во прес-салата’. Во согласност со доставените докази на одбраната докажавме дека ништо не презел во врска со неа. Дај боже да постапел во согласност со мојата порака и да се качел во прес-салата, немаше да ги отвори вратите и масата народ немаше да влезе во Собранието. Сакам да потсетам дека тројца пратеници од ВМРО-ДПМНЕ, кои се најдоа во прес-салата, со жив штит ги бранеа колегите од СДСМ, кои беа нападнати“, додаде Јанакиески.

Јанакиески цитира изјава на Заев во која вели дека многумина од организаторите се во затвор, а за обвинетиот вели дека ќе биде осуден за други предмети.

„Имено, во својата изјава премиерот наведува, цитирам: ‘Нема правда ако не ја зборувате вистината од почеток до крај. Трајко Вељановски, Миле Јанакиески и Спиро Ристовски ниту се ниту ќе бидат повеќе политичари. Што имам јас интерес да правам калкулации. Миле Јанакиески, веројатно, ќе биде осуден за некој предмет, 7-8 има. Но, за ова, моја должност е да ја кажам вистината. Делото за кое се товари тој е над 10 години затвор. И сега те прашуваат во суд и треба да дадеш исказ и треба да ја дадеш вистината. За мене, политички, ако ги осудат на 15-20 години, е аргумент плус. Меѓутоа, правда ли е ако знаеш нешто, а не го кажеш. Многумина од организаторите се во затвор, Чавков, Нинџи, минџи и сите што беа внатре што даваа инструкции. Правда не е само ако се водите како ви одговара на вашата политичка гарнитура, туку ќе се исправите пред судот и ќе кажете сè што мислите за да може и на тој суд да му стане јасно да носи мерливи податоци. Многу често нашата болка е судиите гледаат да ѝ учинат на власта, не бе, не треба никому да му учинат’, рече Јанакиески цитирајќи ја изјавата од Заев.