Македонија
Јаневска: Ангажираме над 1000 образовни асистенти во основните училишта
Ниту едно дете – ученик не смее да остане дома. Сите ученици со попреченост мора да бидат примени во училиштата. Имаме наставници, инклузивни тимови и стручни служби и истите треба да бидат подготвени да ги примат децата, одговори министерката за образование и наука Весна Јаневска на новинарско прашање околу ангажирањето на образовни асистенти во основните училишта.
– Децата со попреченост имаат и ќе имаат асистенти. Досега се обезбедени 815 образовни асистенти, за останатите 200 асистенти се чекаше на ребалансот на буџетот, за да се обезбедат средства. Министерството за образование и наука ја заврши својата задача, а конкурсите за ангажирање на асистентите е обврска на училиштата со ресурсни центри и нивна задача е да планираат кога да го распишат и објават конкурсот. Зошто поставуваме директори на училишта, ако не си ги знаат своите основни обврски, додаде Јаневска.
Таа напомена дека во тек е потпишувањето на договорите за ангажирање на 815 образовни асистенти, додавајќи дека конкурсот за дополнителните 200 образовни асистенти е отворен за пријавување.
– Годинава бројот на образовни асистенти е значително поголем за разлика од претходните години. Ако има потреба, зависно од барањата на родителите, следната учебна година ќе ангажираме уште поголем број, истакна министерката за образование и наука.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одрони во дебарскиот регион, се препорачува внимателно возење
Дождот, кој со различен интензитет врне деновиве, во дебарскиот регион предизвикува помали одрони на патиштата во ова подрачје, поради што се препорачува внимателно возење.
„Засега има помали но чести одрони од камен и земја. Поради тоа, но и влажните коловози се препорачува внимателно возење и строго почитување на патната сигнализација“, порачуваат од дебарската секција на Јавното претпријатие за одржување на магистрални и регионални патишта.
Екипи на секцијата се постојано на терен, со цел навремено расчистување и безбедно одвивање на сообраќајот.
Македонија
Дождовите не го намалија бројот на пожари на отворено
„И покрај падот на температурата за околу 15 степени и дождовите што заврнаа, бројот на пожари и интервенции на отворен простор воопшто не се намалени. За жал се уште сме сведоци на неодговорно и несовесно однесување на група граѓани“, информираа денеска од ТППЕ Струмица, откако во изминатите три денови гаснеа четири пожари на отворено.
Како што информираа струмичките пожарникари, утрово во 05:20 часот на улицата „Ѓуро Ѓаковиќ“ била запалена помошна просторија.
Спречено е ширење на пожарот на куќата и поголема материјална штета, а денеска во 13:00 часот во атарот на село Вељуса била запалена нискостеблеста шума и сува трева.
Запалена била и нискостеблеста шума и сува трева во атарот на село Рич и нискостеблеста и борова шума во близина на браната „Водоча“.
Македонија
Oпштина Аеродром реагира: Ги унапредуваме условите во училиштата за разлика од времето со СДСМ кога децата немаа учебници
Остро ги отфрламе обвинувањата од СДСМ за тоа дека изминатите години не сме придонеле ништо за модернизација на нашите училишта, затоа што реалноста е сосема различна од нивните тврдења, реагира Општина Аеродром на обвинувањата што претходно денес ги изнесе СДСМ.
Општината нагласува дека додека СДСМ беа на власт, учениците не добиваа ниту учебници, што се основни средства за изведување на наставата, па поради тоа сега немаат никаков кредибилитет да ја критикуваат, ниту централната, ниту локалната власт.
„Ние како Општина, изминатите три години навистина се потрудивме учениците да го добијат најдоброто, а училиштата да ги следат современите текови на образовниот процес. Токму затоа ќе издвоиме дел од проектите и од активностите што се реализирани во училиштата во Општина Аеродром.
– Проект ,,Учиме да пливаме” воведовме бесплатни часови за пливање за секое прваче и за дечињата со посебни образовни потреби;
– Проект – грижа за дечињата со посебни образовни потреби – бесплатни часови по пливање и бесплатни часови за спортување со лиценцирани тренери во ООУ „Александар Македонски“ каде спортуваат и се дружат со останатите дечиња од групата;
-Проект Дигитализација на наставниот процес во училиштата;
– Бесплатен таблет за секој ученик во четврто одделение според концепцијата за дигитализација на основното образование и смарт табли за секое училиште;
– Проект – фотоволтаици на секое училиште – поставени фотоволтаици на сите основни училишта;
– Инвестиравме во енергетско ефикасни фасади на училиштата ( ООУ „Блаже Конески“ и подрачното основно училиште „Гоце Делчев“)
– Реконструкција на внатрешноста на ООУ „Лазо Ангеловски“, „Љубен Лапе“, „Ѓорѓија Пулевски“, „Браќа Миладиновци“, „Гоце Делчев“.
– Промена на санитарните јасли во „Љубен Лапе“, „Лазо Ангеловски“, „Браќа Миладиновци“, централното и подрачното училиште „Гоце Делчев“.
– Реконструкција на велосипедскиот полигон во „Ѓорѓија Пулевски“
– Секоја година учениците добиваат бесплатна училишна униформа;
– А, само оваа година Општината издвои 5 милиони денари за реконструкција и санација на училиштата;
Тука не застануваме, наредните денови ја отпочнуваме градбата и доградбата на ООУ „Блаже Конески“ со што значително ќе се зголеми капацитетот на ова училиште, едно од најстарите училишта во Аеродром, кое конечно ќе добие нов изглед.
Ова се само дел од инвестициите во училиштата во Аеродром, а ние остануваме посветени на унапредување на условите во воспитно-образовниот проецес, како за учениците, така и за наставниците“, се наведува во соопштението на Општина Аеродром.