Македонија
Јаневска во Штип: 130 психолози обезбедуваат дополнителна психосоцијална поддршка за учениците, наставниците и за родителите по трагедијата во Кочани

Постојано се зголемува бројот на психолози што се вклучуваат во давањето психосоцијална поддршка за учениците, нивните родители и за наставниците по трагедијата во Кочани. Минатата недела имавме 100-ина, оваа недела во мрежата на училишни психолози имаме 130. Сите тие поминаа специјализирана обука за постапување во оваа кризна ситуација и се активни на терен.
Ова го истакна министерката за образование и наука, проф. д-р Весна Јаневска, за време на денешната посета на неколку училишта во Штип информирајќи дека на територијата на оваа општина ангажирани се дополнителни 10-ина психолози во рамките на образовните установи.
„Министерството за образование и наука заедно со повеќе други страни – УНИЦЕФ, Институтот за психологија при УКИМ, Комората на психолозите и Црвениот крст – прави напори за да обезбеди соодветна психолошка помош и психосоцијална поддршка за оние на кои им е потребна, а особено на најмладите. Веднаш по трагедијата подготвивме насоки за училиштата, за наставниците и за родителите. Споделивме и лични контакти за телефонски совети и разговори. Беа отворени и наменски линии достапни 24/7“, рече Јаневска.
Додаде дека настанот предизвика траума кај целата јавност, а особено кај децата, кои, како што рече, не смееме да ги препуштиме сами на себе.
„Во рамките на Универзитетот „Гоце Делчев“ заедно со Комората на психолозите отворивме и Центар за младинско советување и тоа е всушност збирното место на психолозите од каде што потоа тие заминуваат да работат во училиштата во Штип, а секако работат и со студентите во градот, кои ценат дека во оваа ситуација добро ќе им дојдат разговор и насока како полесно да се справат со предизвиците“, рече министерката посочувајќи дека претстои долг период на рехабилитација и многу работа со младите.
Министерката напомена дека важен аспект на кој МОН ќе се посвети заедно со локалните самоуправи е одржувањето на безбедносните стандарди во училиштата во целата територија.
„Минатата недела се обративме до општините за проверка во сите училишта дали постои процена на ризици од кризни состојби, план за справување со кризни состојби, дали има соодветна и функционална опрема, како ПП-апарати, хидранти и слично. Според информациите што ги добивме од ЗЕЛС, сите проверени училишта досега, а тоа се некаде над 90 % од објектите, се безбедни и мора да се погрижиме така и да остане“, рече Јаневска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„СДС и Филипче да одговорат дали Заев на поранешен премиер на Бугарија му понудил продажба на македонска телевизија и прислушкувани материјали“, прашува ВМРО-ДПМНЕ

„СДС лидерот го менува, но навиките не. Прислушкуваните материјали и купопродажбата на имоти, како и на државните интереси, продолжуваат да му бидат навика и на Венко Филипче, како на неговиот претходник и ментор, Зоран Заев. Затоа го прашуваме Филипче да каже дали Зоран Заев му понудил стик со прислушкувани материјали на поранешен бугарски премиер, како и една шема за купување на две големи фирми, од кои едната била телевизија“, прашува ВМРО-ДПМНЕ
„Венко Филипче да не молчи, туку да одговори што содржел стикот со прислушкувани материјали, кое неговиот, ментор Зоран Заев го дал на поранешен премиер на Бугарија, која сега ги злоупотребува механизмите на членка во ЕУ за да ја блокира државата.
Освен за стикот, СДС и Филипче, исто така, треба да кажат дали и зошто Зоран Заев понудил шема за купување на две големи фирми во Македонија од страна на фирми од Бугарија блиски до тој поранешен премиер и дали една од тие фирми е една голема телевизија, преку која требало да се врши бугарска пропаганда во државата?
Оттука произлегува уште едно прашање, на кое СДС и Филипче должат одговор, дали ова е подарокот кој Заев го дал во замена за логистичка и финансиска поддршка од Бугарија би им ја давала на партија и сега и во иднина и дали зад кампањата на СДС стои тој поранешен бугарски премиер со кој Заев е во контакт?
Од се ова можеме да видиме дека Венко Филипче не е ништи друго, освен алатка за реализација на планот на Заев и неговата таканаречена резолуција е само продолжеток на тој план за потчинување на државата во однос на Бугарија.
Овој нивен план е откриен, Филипче и неговиот ментор и гуру се фатени на дело.
Нивните планови нема да успеат, затоа што на претстојните избори народот жестоко ќе ги казни и со заокружување на број 9 ќе го направат вистинскиот избор, за твојот човек, за твоето место, за твојата иднина“, соопшти ВМРО-ДПМНЕ.
Македонија
Без вода делови од Центар и Аеродром

Од ЈП Водовод и Канализација известуваат дека денеска поради уличен дефект на улицата Питу Гули бб, општина Центар (во близина на Тинекс), прекинато водоснабдување ќе имаат следниве улици: Питу Гули, дел од Загребска, Ганчо Хаџипанзов, Капештец, Димитар Пандилов, Караорман, висока зона Козле и Ловќенска-крак 1,3,5 и 7.
Водоснабдувањето ќе биде прекинато од 08:30 часот до завршување со санација на дефектот.
Денеска поради уличен дефект на 3-та Македонска Бригада бб, прекинато водоснабдување ќе имаат објектите на Вива, Метро, Центро, Спорт М и Форд, во општина Аеродром.
Водоснабдувањето ќе биде прекинато од 08:00 часот до завршување со санација на дефектот.
Македонија
Делови од Аеродром, Центар и Ѓорче Петров денеска без струја

Од ЕВН Македонија АД известуваат дека денеска без електрична енергија ќе останат:
· во периодот од 08.10 до 15.00 часот, корисниците на дел од село Долно Лисиче.(општина Аеродром)
· во периодот од 08.10 до 15.00 часот, корисниците на објектите спроти Ист Гејт населба Крњево.(општина Центар)
· во периодот од 08.10 до 12.00 часот, корисниците од улица Божидар Рајковиќ, дел од ул. Горноврановска и дел од улицата Горно Лисиче (општина Аеродром)
· во периодот од 08.10 до 16.00 часот, корисниците на улиците Ибе Паликуќа, Воин Драшкоци, Веле Марков (општина Ѓорче Петров)