Македонија
Јаневска: Образовниот систем ќе има клучна улога во остварувањето на целите од Стратегијата за соработка со СЗО

Националната стратегија за соработка со Светската здравствена организација во следните пет години ги утврдува здравствените приоритети на државата, кои ќе се реализираат во соработка со СЗО и агенциите на ОН, како УНИЦЕФ и УНФПА, преку клучните владини министерства, институции и граѓанското општество. Ова го нагласи министерката за образование и наука Весна Јаневска на презентацијата на Првата стратегија за соработка на СЗО со Македонија 2026–2030.
„Здравјето е основа на одржлив развој на секоја држава. Наша цел е да изградиме отпорен здравствен систем, заснован на еднаков пристап, превенција, дигитална трансформација и компетентни човечки ресурси. Неопходно е да ги унапредиме јавните политики за да можат да одговорат на комплексните здравствени предизвици со кои се соочува Македонија. Во реализацијата на оваа важна и одговорна задача Министерството за здравство не е само“, нагласи министерката Јаневска.
Преку подобрување на наставните програми, модернизација на лабораториите и практичните обука, поддршка за континуирана едукација на здравствените работници и соработка со универзитети и здравствени установи, Јаневска укажа дека воспитно-образовниот систем подготвува генерации со знаење, вештини и ставови потребни за препознавање, разбирање и ефективно справување со здравствените предизвици.
„Образованието има суштинска улога во развојот на систем што се грижи за сите и не остава никого зад себе. Училиштето формира вредности на еднаквост, развива чувство за грижа кон ранливите и создава капацитет за препознавање и спречување на насилство, занемарување и повреди, што е еден од приоритетите во Стратегијата“, рече Јаневска.
Таа се заблагодари на Светската здравствена организација за помошта во изготвувањето на Протоколот за реализација на настава во услови на топлотен бран, како и за обуките на околу 700 стручни соработници од основните и средните училишта за психосоцијална помош и поддршка во унапредување на добросостојбата и менталното здравје на децата и младите во образовните, здравствените и загрижувачките институции и средини.
Стратегијата за соработка со СЗО е петгодишен документ дизајниран да ги поддржи нашите национални здравствени цели, обврските поврзани со пристапувањето кон ЕУ, како и глобалните Цели за одржлив развој. Мултиресорскиот пристап кон нејзината реализација е услов за градење здравствен систем што ги следи протоколите, истовремено темелејќи се на вредности како човечност, правичност и грижа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: ВМРО-ДПМНЕ ги закочи реформите во правосудството и го партизираше со баџанаци и сопружници на нивни функционери

„Христијан Мицкоски и ВМРО-ДПМНЕ ги блокираа реформите во судството а со тоа и правдата во Македонија. Мицкоски одби да ги донесе неопходните реформски закони и покажа дека нема никаква намера за независно судство туку само едно, заробено и послушно судство, под диктат на ВМРО-ДПМНЕ“, велат од СДСМ.
„За 2025 година беа предвидени вкупно 12 закони, од нив, во Собранието не е поднесен ниту еден.
Наместо реформи и независно судство, Мицкоски судството го претвори во партиска филијала, со судии кои се сопружници на негови градоначалници и роднини на неговите коалициски партнери.
Без вистински реформи во судството и независни институции нема правда. Затоа Мицкокси треба да молчи и да не го обвинува СДСМ за реформи кои самиот не ги прави.
СДСМ подаде рака, понуди помош за реофрмите, понуди заеднички групи, ВМРО-ДПМНЕ одби се. Тоа е јасен показател дека ниту имаат интерес ниту сакаат независно и ефикасно судство.
За крај им порачуваме да прекинат да глумат опозциција, за секоја своја неспособност крив им е СДСМ. Ова е веќе дегутантно и граѓаните се смеат на нивните оправдувања“, соопшти СДСМ.
Македонија
Герасимовски: Општина Центар обезбеди дополнителна механизација за чистење на улиците и сметот

„Центар веќе подолго време се соочува со хаос во хигиената поради неработењето на ЈП „Комунална хигиена“ кое е под надлежност на Град Скопје. Илјадници граѓани секојдневно сведочат на преполни контејнери и нечисти улици, иако одржувањето на јавната чистота е законска обврска на градските институции“, велат од Општината.
„Во вакви услови, Општина Центар со сопствени капацитети и преку локалното јавно претпријатие „Паркинзи на Општина Центар“ веќе со денови интервенира и ја презема работата што други ја запоставиле – собирање смет, миење и чистење на улиците.
Вчера, градоначалникот Горан Герасимовски заедно со директорот на ЈП „Паркинзи на Општина Центар“ Душко Коцевски, потпишаа договор за изнајмување на дополнителна механизација и опрема. Овој договор значи значително засилување на теренските активности“, известува Општината.
„Граѓаните на Центар не смеат да бидат заложници на нечија негрижа. Наша должност е да им обезбедиме чисти улици и достоинствено урбано живеење. Затоа обезбедивме дополнителна механизација за поефикасно справување со отпадот и одржување на јавната хигиена“, вели Герасимовски.
„Со договорот се обезбедени следниве услуги и машини:
– Ѓубретарки со капацитет од минимум 18 м³ и 10 м³ за собирање и транспорт до депонија,
– Мала цистерна (0,5 м³) за перење на прометни површини,
– Специјализирана метларка со капацитет од минимум 1,5 м³,
– Изнајмување метални контејнери од 5 м³ на територија на Општина Центар,
– Возило-цистерна со капацитет од минимум 7 м³ за миење и перење улици,
– Возило-подигнувач за подигање и транспорт на метални контејнери,
– Машина за бележење на хоризонтална сигнализација.
Со ова зајакнување на капацитетите, Општина Центар покажува дека и во услови на институционална блокада, интересот на граѓаните е на прво место.
Герасимовски најави дека со новата механизација се почнува веднаш и дека ќе се ангажираат сериозни акции за чистење за да се спречи хаосот кој го создава Комунална хигиена и Градот Скопје“, се додава во соопштението на Општината.
Македонија
ВМРО-ДПМНЕ: По примерот на Апасиев, Мециновиќ, Мојсоска и Крмов, и Реџеп Исмаил си инкасирал во свој џеб 300.000 денари од партиската каса

„Раководството на Левица конечно си го откри сопственото лице. Партијата која инаку се самопрогласува за револуционерна сила, сега е јасно дека е сведена само на приватна сопственост на Апасиев и раководството на Левица“, велат од ВМРО-ДПМНЕ.
„Апасиев со својата самобендисаност, ја претвори партијата во алатка за лична промоција. Освен што пишува статуси кои вриштат од суетност и се приказни за собирање дневно политички поени, правење збрки во јавноста не прави ништо друго.
Така е и со раководството на партијата. Од 2021 година досега, Апасиев и Мециновиќ инкасирале во свој џеб повеќе од 1 милион денари од партиската каса. Јована Мојсоска, примила околу 600.000 денари во истиот период, додека пак Крмов 270.000 денари, а Исмаил над 300.000 денари.
Како се прави распределбата во Левица, дали постои некаков транспарентен критериум и како ова се вклопува во реториката на партијата?
Оттука, јасно е дека Левица воопшто не се занимаваат со вистинските проблеми на граѓаните, нивната политика е сведена да бројат кој пратеник колку земал за патни трошоци, кое инаку на пратениците им е законско загарантирано право.
Во меѓувреме, додека полемичарат за патните трошоци, тие самите земаат стотици илјади денари од партиската каса.
Партиска каса која инаку се полни од буџетот на државата, односно парите на граѓаните. Истите граѓани кои ги убедуваат да донираат за Левица.
Додека членството им верува, раководството ја користи партијата како банкомат. Комплетно се изгубија во сопствената хипокризија, која не само што го предаде сопственото членство, граѓаните , туку си ја предаде и сопствената идеологија.
Како овие интелектуалци и борци за еднаквост ќе им објаснат на сопствените членови и гласачи, додека тие им веруваат и донираат раководството си дели стотици илјади денари. Дали Левица воопшто ги слуша граѓаните, или само постои за одржување на моќта на неколкумина?“, прашуваат од ВМРО-ДПМНЕ преку писмено соопштение.