Македонија
Јанев: Го враќаме достоинството и интегритетот на полицаецот – столбот на јавниот ред и безбедност

Вчера во просториите на Министерството за внатрешни работи се одржа состанок на раководните структури од Секторите за внатрешни работи при Бирото за јавна безбедност, посветен на темата за враќање на достоинството и интегритетот на полицаецот – столбот на јавниот ред и безбедност.
На состанокот учествуваа началниците на униформираната полиција, раководителите на одделенијата/ отсеците за превенција и раководителите на ЦИК/ЕИК. Главен акцент беше ставен на преземањето на конкретни мерки за подобрување на условите за работа, зголемување на професионалните стандарди, како и заштита на правата и угледот на секој припадник на униформираната полиција.
Притоа, беше истакната важноста на меѓусебната доверба, транспарентноста и ефикасната комуникација помеѓу полициските службеници и граѓаните. Беше нагласено дека само преку континуирано унапредување на стручната подготовка, етичкото однесување и поддршката за полициските службеници, како и грижата за нивното физичко и ментално здравје, може да се обезбеди целосна посветеност, мотивација и гордост во извршување на задачите и подигнување на угледот на полицијата во јавноста.
На состанокот, директорот на БЈБ Александар Јанев истакна дека достоинството на полицаецот започнува со систем кој го вреднува неговиот труд и обезбедува заштита на неговиот личен и професионален интегритет.
Началниците се согласија за потребата од имплементирање на програми за професионален развој и поддршка, како и за создавање на позитивна работна атмосфера во рамките на полициските единици и унифицираност во начинот на работата. Дополнително, беа усогласени чекори за јакнење на дисциплината и залагање за фер и правично третирање на секој припадник на полицијата.
Министерството за внатрешни работи останува цврсто определено да ги зајакне капацитетите на униформираната полиција и да создаде систем каде секој полицаец ќе го чувствува сопствениот придонес вреднуван, а својата улога – почитувана, а сѐ со цел враќање на довербата кај граѓаните и зајакнување на улогата на полицаецот како чувар на јавниот ред и мир.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.