Македонија
(Видео) Јанчев: Материјали за над 10 закони доставени два дена пред собраниска седница

На две прекршувања од Деловникот се однесуваше денешното процедурално обраќање на пратеникот од Левицата, Сашко Јанчев, и тоа по однос на илегално свиканата собраниска седница од владејачкото мнозинство на ДПМНЕ и ЗНАМ и во однос на доставените материјали за над 10 закони на два дена пред седница, а не – десет дена пред нејзиното одржување, како што е деловнички.
„Моето процедурално обраќање се однесува на две прекршувања на Деловникот. Првото прекршување се однесува на член 73 став 1, кој вели: „Седници на Собранието може да свика само претседателот на Собранието“. Од собраниската веб-страница гледам дека Гаши е во Вашингтон, си има средби со странци. Физички е невозможно тој да го потпише решението за свикување седница, што ја прави седницата нелегална“, потенцира пратеникот Сашко Јанчев на денешната седница на Собранието.
Пратеникот Јанчев во своето процедурално обраќање го образложи и второто прекршување од Деловникот.
„Второто прекршување е според член 74 став 1 којшто вели: ,,Решение за свикување на седница на Собранието со предлог – дневен ред и материјали се доставува до пратениците десет работни дена до одржување на седницата”. Овој рок не е случаен, затоа што со нашето гласање одлучуваме за милиони судбини“, појасни Јанчев.
Пратеникот Јанчев од Левицата истакна дека материјали добиле пред два дена, односно – денес, а не пред десет дена.
„Решение добивме вчера, ново добивме денес. Не пред десет дена, нема ниту еден ден. Последното решение го добивме пред два часа! Ова е ново Собрание, ново мнозинство или народски нова Влада, но стари пракси. Обичај е на секое процедурално да се побара да се почитува Деловникот, но јас не негувам илузии дека тоа ќе се случи“, заклучи Јанчев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Започна изградбата на нов продажен маркет на „Лидл“

Започна изградбата на нов продажен маркет на „Лидл“ во Аеродром.Според премиерот, Христијан Мицкоски, ова е уште една потврда дека сме вистинска дестинација за инвеститорите.
„Новиот малопродажен објект на „Лидл“ ќе се протега на површина од 3.438 квадратни метри, со модерен продажен салон од 1.200 квадратни метри и со 57 паркинг места за удобност и достапност на потрошувачите. Ова не се само бројки, тоа е порака дека компанијата влегува сериозно на македонскиот пазар, со визија за долгорочен раст и развој, што впрочем можевте и да го слушнете“, рече Мицкоски.
Тој додаде дека оваа инвестиција се одолговлекувала и беше заглавена, но токму по изборот на оваа Влада, пред неполни 15 месеци, како што рече, веднаш се фатиле за работа.
„Особено ме радува што менаџментот на „Лидл“ ја прифати нашата забелешка за зголемување на застапеноста на домашното производство и македонските производи на полиците на „Лидл“. Тоа е од исклучителна важност – затоа што со тоа не само што се поддржува локалната економија, туку се гради доверба кај потрошувачите дека македонското е најдобро“, рече Мицкоски.
Тој додаде дека македонски производи се наоѓаат на полиците на „Лидл“ во околните земји.
„Во 2024 година извозот беше околу 5 милиони евра. Очекуваме оваа година, во разговор неформален со менаџментот на „Лидл“, таа бројка да достигне и 10 милиони евра и со време таа бројка да расте. Тоа треба да биде инспирација, поттик и мотив за македонските претприемачи да ги задоволат стандардите на „Лидл“, да произведуваат според стандардите на „Лидл“, а „Лидл“ сигурно дека ќе даде можност и шанса македонските производи да се наоѓаат на полиците на „Лидл“ во околните земји и секаде онаму каде што „Лидл“ ќе има потреба од квалитетни македонски производи“, рече Мицкоски.
Македонија
ВМРО-ДПМНЕ бара итна седница на Комисијата за надзор на АНБ

ВМРО-ДПМНЕ упати јавен повик до претседателот на Комисијата за надзор над работата на Агенцијата за национална безбедност и Агенцијата за разузнавање, Скендер Реџепи од европскиот фронт ДУИ, да закаже итна седница на комисијата.
„Целта е, на седницата да се разгледаат загрижувачките сомнежи за незаконско постапување во АНБ, односно, да утврдиме точен датум за официјална посета во Агенцијата за национална безбедност преку која ќе извршиме директен увид во состојбите и темелно испитување на сите околности поврзани со овие настани. Овие случувања веќе предизвикаа силна вознемиреност во јавноста и ја поткопуваат демократијата и довербата во институциите задолжени за заштита на националната безбедност’, изјави пратеникот Љупчо Пренџов.
Според него, обврска на Комисијата е да делува одговорно и транспарентно, со цел, да се обезбеди отчетност на институциите и заштита на нивниот интегритет и демократијата во државата.
„Граѓаните имаат право да знаат дали и како се злоупотребувале институциите и какви мерки ќе се преземат за тоа никогаш да не се повтори. Остануваме доследни во посветеноста кон вистината, владеењето на правото и заштитата на интересите на сите граѓани“, рече Пренџов.
Македонија
Бесплатни униформи за 6.800 ученици од Општина Гази Баба

Градоначалникот на општина Гази Баба, Бобан Стефковск, денеска беше во посета на ООУ Дане Крапчев каде што на учениците им ги подели бесплатните униформи.
Овој проект за прв пат се реализираше во општина Гази Баба во 2023 година и истиот произлезе од изборната програма на градоначалникот Стефковски.
„Униформите се повеќе од облека. Тие се симбол на еднаквост и заедништво. Со нив сите ученици се дел од една иста заедница, без поделби и разлики. За семејствата ова значи значајна поддршка на домашниот буџет, затоа што знаеме колку е важна секоја заштеда. За нашите ученици пак, останува само една задача, да учат, да сонуваат и да се развиваат без предрасуди и без бариери“, истакна градоначалникот Стефковски.