Македонија
Јовески: Трагедиите во српското општество се аларм и за нас, да се мобилизираме за што поефикасна контрола на оружјето

Трагедиите во српското општество се аларм и за нас и нè принудуваат да се мобилизираме за што поефикасна контрола на оружјето и во нашата земја.
Јавниот обвинител на Република Северна Македонија, Љубомир Јовески, изразува длабоко жалење и со загриженост ги следи настаните во соседна Република Србија, каде што во оружени напади во претходните денови беа убиени повеќе лица.
„Трагедиите со кои се соочува српското општество се аларм и за нас како орган на кривичниот прогон и нè принудуваат како институции да се мобилизираме за што поефикасна контрола на оружјето и во нашата земја“, смета Јовески, кој денеска упати порака до јавните обвинители да дејствуваат за зајакнување на казнената политика за недозволено држење оружје и муниција.
„Барам од сите јавни обвинители во државава при постапувањето да инсистираат на построги кривични санкции за кривичното дело недозволено изработување, држење и тргување со оружје или распрскувачки материи. Заострувањето на казнената политика мора да се одразува во постапувањето најпрвин на основните јавни обвинителства, кои треба да внимаваат висината на санкцијата за вакви кривични дела да се движи во рамките на законски определениот распон, без можност за алтернативна мерка. Покрај ова, вишите јавни обвинителства во случаите на определена блага санкција со првостепените пресуди мора да се обидуваат преку постапките во втор степен да издејствуваат повисоки казни“, стои во пораката на Јовески до јавните обвинители.
Ако се имаат предвид огромните штетни последици што може да бидат предизвикани од недозволеното држење оружје, за сторителите на ваквите кривични дела не треба да има ублажување на санкциите. Оружјето е средство за извршување и на многу други кривични дела и неговата употреба надвор од законските рамки не смее да се толерира, им порача Јовески на обвинителите.
Исто така, тој нагласи дека трендот на намалување на возрасната граница на сторители на тешки кривични дела го забележуваме и во постапувањето во нашата земја. Тоа е нешто што загрижува и за што најбргу што може треба да бидат преземени конкретни превентивни активности од сите надлежни институции.
Јовески изрази подготвеност Јавното обвинителство активно да се вклучи со свој придонес во секоја евентуално иницирана јавна расправа со цел измена на законските одредби во таа насока.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Познати победниците на трката „Голак Трејлс“ посветена на херојот Иле Гоцевски

Во чест на херојот Иле Гоцевски, возачот кој за време на несреќата во Кочани остана запаметен по својата храброст и пожртвуваност, денеска во Делчево се одржа првата планинска трка „Голак Трејлс“. Настанот беше организиран постхумно, како симбол на благодарност и почит кон неговото дело, но и како потсетник на човечките вредности што тој ги претставуваше.
На патеката долга 13 километри трчаа околу 200 учесници од повеќе македонски градови и гости од соседството. Атмосферата беше исполнета со спортски дух, силни емоции и порака дека спортот може да биде начин да се зачува споменот на оние кои оставиле трага.
Во машка конкуренција најбрз беше Ибрахим Мамудов од Штип, а во женска категорија победи Марија Пеликон од Скопје. Победниците истакнаа дека трката имала посебна тежина, бидејќи била посветена на човек чиј лик е симбол на храброст и пожртвуваност.
За првото место кај младите се истакна Калин Стефановски, ученик во осмо одделение, кој ја совлада патеката за два часа и ги повика своите врсници активно да се занимаваат со спорт.
Организаторите нагласија дека „Голак Трејлс“ не е само спортски предизвик, туку и почеток на нова традиција во Делчево.
„Со оваа трка ја оддаваме почит на Иле, но и испраќаме порака дека Делчево станува центар на планинскиот туризам и рекреација во источниот регион“, истакнаа тие.
Скопје
Пет лица повредени, една жена во критична состојба во сообраќајка во Скопје

Пет лица се повредени во сериозна сообраќајна несреќа што се случи вчера околу 19:30 часот на улицата Христијан Тодоровски Карпош во Скопје, соопшти СВР Скопје.
Според полицијата, несреќата се случила помеѓу патничкото возило „голф“ со скопски регистарски ознаки, управувано од З.С. (41), и „поло“ управувано од А.Ш. (30). Најтешко повредена е сопатничката од „поло“ возилото, Х.С.Ш., додека возачот А.Ш. и другата сопатничка Ш.Ш. (57) се здобиле со телесни повреди.
Повреди добиле и возачот на „голф“ З.С. и неговиот сопатник Ѓ.Х. (42), кои се згрижени во Градската општа болница „Св. Наум Охридски“ и Комплекс клиники „Мајка Тереза“.
Полицијата презема мерки за целосно расчистување на случајот, а причините за сообраќајката се во тек на истрага.
Македонија
На Табановце чекање и до 40 минути, АМСМ апелира за трпение

Долги колони возила се создаваат на граничниот премин Табановце, каде што за излез и влез во државата се чека и до 40 минути, информира АМСМ.
Од таму додаваат дека зголемената фреквенција на возила е резултат на летните одмори, а интензитетот на сообраќај на патните правци надвор од градските средини е значително зголемен. На останатите гранични премини од македонска страна засега нема подолги задржувања.
Иако сообраќајот на државните патишта се одвива непречено и коловозите се суви, АМСМ апелира до возачите на зголемена претпазливост, особено на делниците низ котлини, речни долини и клисури каде што постои можност од одрони. Како критични делници се посочуваат: Катланово – Велес, Маврово – Дебар – Струга, Виница – Берово и Кочани – Делчево.
„Возачите да ја прилагодат брзината, строго да ја почитуваат сообраќајната сигнализација и да управуваат внимателно, бидејќи условите на патиштата бараат дополнителна претпазливост“, порачуваат од АМСМ.