Македонија
Џафери-Белен: Австрија има цврст став за местото на Северна Македонија во ЕУ кое е одамна заслужено

Претседателот на Собранието, Талат Џафери, оствари средба со претседателот на Република Австрија, Александар ван дер Белен, кој во придружба на австриската министерка за правда и 23-члена бизнис делегација, престојува во официјална посета на Република Северна Македонија. Џафери се осврна на исклучително добрите билатерални односи, интензивната соработка на парламентарен план и традиционално силна трговија која ја позиционира Австрија како прв инвеститор во земјава. Тој го запозна високиот гостин со актуелната политичка состојба, особено на евроинтеграциски план, со следните активности во процесот на скрининг и следната фаза на пристапување кон ЕУ, со предизвиците кои стојат пред државата на внатрешен план во однос на процесот на уставни измени, како и на надворешно-политички план, како земја-членка на НАТО и аспирант кон ЕУ.
Ги истакна претседавањето со ОБСЕ и парламентарната димензија на ПСЈИЕ како клучни меѓународни активности на државата, кои ќе придонесат кон јакнење на нејзиното место во надворешната политика како кредибилен партнер и земја чии државни приоритети се регионалната соработка и безбедност, високата солидарност со украинскиот народ, следење на безбедносните политики на ЕУ и придржување кон ЕУ и НАТО политиките во однос на војната во Украина. Ја поздрави одличната економска соработка меѓу двете држави, како и динамичната соработка меѓу двата парламента, преку групите за соработка, комисиите и други парламентарни проекти. Изрази очекување за натамошна поддршка на пријателска Австрија на мултилатерален и билатерален план.
Претседателот Александер ван дер Белен, се заблагодари на можноста за средба и за обраќање пред пратениците во Собранието на Република Северна Македонија и го истакна високото мислење за Република Северна Македонија за претседавањето со ОБСЕ, за кое изрази благодарност што истото се одвива во овие исклучително тешки времиња кога ОБСЕ е без Русија, а војната беснее на европско тло. Ја повтори натамошната цврста поддршка на Австрија на евроинтеграцискиот пат на земјите од целиот Западен Балкан и подвлече дека Австрија има цврст став за местото на Република Северна Македонија во ЕУ кое е одамна заслужено. Токму поради тоа, Австрија смета и укажува на своите ЕУ партнери дека не смее да се дозволи одредени актуелни безбедносни предизвици да го земаат приоритетот на проширувањето на Република Северна Македонија и другите држави-аспиранти од овој регион.
Во однос на економската соработка, ван дер Белен, поучен од историјата на традиционално позитивни и продуктивни односи на Австрија со земјите од регионот на Балканот, поентираше дека Австрија никогаш не била заинтересирана за брз профит, туку за долгорочни инвестиции што овозможуваат трајни вредности и највисоко место меѓу другите инвеститори.
Соговорниците разменија мислења за натамошно унапредување на соработката меѓу двата парламента како важен и вокален дел на целокупната билатерална соработка, натамошни активности на групите за пријателство и соработка и користењето на сите предности на парламентарната дипломатија, како алатка за градење на цврсти врски на билатерален и мултилатерален план.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: Филипче тргнал по стапките на Заев, на Македонија не ѝ требаат нови предавства

Владејачката ВМРО-ДПМНЕ жестоко реагираше на денешното интервју на лидерот на СДСМ, Венко Филипче, во кое тој зборуваше со гордост за поранешниот премиер Зоран Заев.
Според ВМРО-ДПМНЕ, Филипче покажал „безрезервна лојалност“ кон Заев, кого го нарече пример од кого треба да се учи.
Од партијата обвинуваат дека Филипче го велича човекот кој, според нив, извршил најголемо предавство на националните интереси.
„За какво искуство и учење зборува Филипче? Единственото наследство на Заев е предавството и распродавањето на националните интереси“, стои во реакцијата.
ВМРО-ДПМНЕ тврди дека со вакви ставови, Филипче покажува дека е „верна сенка и продолжена рака на Заев“, и оти тргнал по истиот пат, барајќи попустливост во односите со Бугарија.
Реакцијата уследи по изјавите на Филипче во кои тој повика на продолжување на преговорите со Бугарија, додека истовремено, поранешниот министер за надворешни работи, Бујар Османи, призна дека во минатото преговарал со Бугарија за етнички прашања со дозвола на СДСМ.
„Дали за Филипче храброст значи прифаќање на сите барања што водат кон распродажба и нарушување на националниот идентитет?“, прашуваат од ВМРО-ДПМНЕ.
Од партијата потенцираат дека вистинска храброст и државничко однесување е заштита на етничките, културните, историските и јазичните интереси на Македонија, а не попуштање под странски притисоци.
Македонија
Филипче: ВМРО-ДПМНЕ ја носи државата во економска и општествена бездна! СДСМ ќе се бори за враќање на довербата

Претседателот на СДСМ, Венко Филипче, во гостувањето во „Тема на денот“ на Сител Телевизија порача дека судот за тоа дали тој ќе успее да ја направи СДСМ повторно победничка партија ќе го дадат граѓаните. Тој нагласи дека неговата задача е да ја консолидира партијата и да продолжи по започнатиот пат на обнова.
„Сè уште има многу простор за работа, а ние сме решени да продолжиме, не само во пресрет на локалните избори, туку и во следните години“, истакна Филипче.
Тој потенцира дека СДСМ никогаш не се борела за власт по секоја цена, туку за доверба што ќе им овозможи да работат во интерес на граѓаните.
Филипче упати сериозни критики кон актуелната власт предводена од ВМРО-ДПМНЕ, укажувајќи на неконтролираниот раст на цените, стагнацијата на платите, намалениот животен стандард и доцнењата во исплатата на плати и ДДВ за компаниите.
„Живееме во време на тешка економска и општествена криза. Владата е неспособна да ги реши проблемите што граѓаните секојдневно ги чувствуваат. Платите не се зголемуваат, а во многу институции дури и не се исплаќаат навреме“, рече Филипче.
Дополнително, тој ја обвини власта за груба партизација на институциите, каде, како што тврди, неподобните кадри се казнуваат со прераспоредување на работни места далеку од своите домови.
„Ако не сте член на ВМРО-ДПМНЕ или партија од владејачката коалиција, бидете сигурни дека ќе ве преместат да работите 100 километри подалеку“, предупреди лидерот на СДСМ.
Според него, владата ја прикрива тешката состојба преку силна пропаганда, но реалноста на граѓаните е сурова.
„Од плата до плата се живее максимум до 10–15-ти во месецот, потоа почнува вистинската борба за опстанок“, подвлече Филипче.
Тој порача дека токму поради оваа состојба, СДСМ има уште поголема обврска да работи, да ја зацврсти својата структура и да ја врати довербата на граѓаните.
Како што истакна Филипче во интервјуто, општините под раководство на СДСМ се запоседнати од инспекции.
„Ние имаме 17 градоначалници и сите можни инспекции се во општините во пресрет на локалните избори. Од Управата за јавни приходи, организиран криминал, различни други институции коишто се под Министерството за внатрешни работи”, потенцира Филипче.
Како што додаде тој, тоа се случува исклучиво во општините кои се раководени од луѓе од СДСМ, а не и во другите општини каде што има градоначалници на ВМРО-ДПМНЕ.
Македонија
УХМР предупредува на пороен дожд, грмежи и можна појава на град

Попладневниот развој на нестабилна облачност донесе пороен дожд, грмежи и засилен ветер во западните планински предели, Охридско-Преспанскиот регион и Пелагонија. Локално имаше и услови за појава на град, информираат од Управата за хидрометеоролошки работи (УХМР).
До крајот на денот, нестабилното време ќе продолжи со променлива облачност, пороен дожд и грмежи на повеќе места низ државата, а ќе дува и засилен ветер.
Според прогнозите на УХМР, и утре времето ќе биде слично – променливо облачно со повремени врнежи од дожд и грмежи. На одредени места се очекуваат и поинтензивни процеси во форма на невреме, со обилен дожд, силен ветер и можност за изолирана појава на град. Минималните утрински температури ќе се движат меѓу 4 и 10 степени, а максималните дневни ќе достигнат од 15 до 23 степени.
Во Скопје, попладнето ќе донесе нестабилност со локални поројни врнежи и грмежи, проследени со засилен ветер и услови за појава на град. Температурите во главниот град ќе се движат од 9 до 23 степени.
Од УХМР најавуваат дека променливото и посвежо време ќе продолжи и во следните денови, со повремен локален дожд. Сепак, од вторник се очекува стабилизирање на временските услови, претежно сончево време со пониски утрински температури, а дневните ќе бидат во постепен пораст.