Македонија
Џафери изрази надеж за надминување на состојбата со Бугарија и почеток на преговорите со ЕУ

Претседателот на Собранието, Талат Џафери, оствари средба со европратеникот Тијс Ројтен, кој престојува во работна посета на Македонија.
Џафери ја констатираше повеќедецениската соработка со Европскиот парламент на различни нивоа и ја поздрави континуираната поддршка на нашите аспирации за членство во Европската Uнија. Тој информираше дека годишната Резолуција на Европскиот парламент и Извештајот на Европската комисија кои даваат балансирана слика на актуелните состојби во земјата, за Собранието и државните институции секогаш претставуваат ориентир за спроведување понатамошни реформи. Беа поздравени и иницијативите на Европскиот парламент како Самитот на претседатели на парламенти од Западен Балкан на pретседателот Сасоли и Дијалогот Жан Моне, со кои суштински се унапредува политичкиот дијалог меѓу парламентите во регионот, но и дијалогот во самите парламенти на земјите аспиранти. Благодарение на овој Жан Моне дијалог, нашето Собрание е повеќе години единственото функционално Собрание во регионот, посочи Џафери. Тој го информираше соговорникот за актуелниот статус на односите со Република Бугарија, изразувајќи надеж дека во најскоро време ќе бидеме сведоци на надмината состојба и ќе ги почнеме преговорите за членство со Унијата.
Европратеникот Ројтен ја поздрави улогата на Џафери во подобрување на демократската култура во земјата, која според него, може да претставува пример и за некои земји членки на ЕУ. Тој нагласи дека политичките чинители треба да го одржуваат фокусот на реформите кои претстојат, а Европската Унија да го заврши својот дел од сложувалката во овој процес. Европскиот парламент смета дека ветувањето дадено кон земјата одамна требаше да се реализира.
Европратениците ќе продолжат низ дијалог и партнерство да му помагаат на Собранието на неговиот евроинтеграциски пат, особено во текот на самите преговори за членство. Во тој контекст, Ројтен покажа интерес за следните заеднички чекори на Собранието и на Европскиот парламент во иднина. Негова порака до претседателот беше да продолжи со својата работа на одржување на политичкиот дијалог и отвореност кон јавноста како и досега.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Улица во Кисела Вода денес без струја

Корисниците на улицата Кумановска во општина Кисела Вода денес ќе останат без електрична енергија во периодот од 12:00 до 15:00 часот, информираат од ЕВН Македонија АД.
Прекинот е најавен поради технички зафати на дистрибутивната мрежа.
Македонија
Денес сончево и топло, од четврток промена на времето

Утрото ќе биде ведро и посвежо, а преку денот се очекува претежно сончево и топло време, со слаб до умерен ветер од јужен правец. Минималните температури ќе се движат од 6 до 14 степени, додека максималните ќе достигнат од 27 до 33.
Во Скопје ќе преовладува сончево време, со утринска температура до 12 и дневна до 33 степени, информира УХМР.
До среда ќе се задржи стабилно и топло време. Од четврток попладне следува период на променливо облачно време со локални врнежи. Во петок се очекуваат и гремежи, како и умерен до засилен југоисточен ветер.
Температурите ќе бидат во постепено опаѓање, особено за време на викендот.
Македонија
Сиљановска-Давкова во Њујорк: Време е кормилото на ОН да му го довериме на жена

Во рамки на учеството на 80. Генерално собрание на Обединетите нации во Њујорк, претседателката Гордана Сиљановска-Давкова се обрати на состанок на високо ниво по повод 30-годишнината од Четвртата светска конференција за жените.
Во своето обраќање, Сиљановска-Давкова истакна дека иако Пекиншката декларација останува темел на борбата за родова еднаквост, напредокот е нееднаков, кревок и често реверзибилен.
„Насилството врз жените останува неказнето, фемицидот ја осквернува светоста на животот, а жените сè уште се соочуваат со бариери во пристапот до ресурси, лидерство и одлучување,“ рече таа.
Претседателката посочи и на кризата во Обединетите нации, институција основана за заштита на мирот, а денес исправена пред бројни конфликти низ светот. Таа апелираше на храбро лидерство од жени, велејќи:„Ако сме сериозни во врска со мирот, време е да го довериме кормилото на ОН на жена.“
Во нејзиниот говор таа подвлече дека родовата еднаквост не е феминистичка привилегија, туку хуманистички императив, потенцирајќи дека жените се носители на исцелување, сочувство и надеж.
Учесниците на состанокот ја потврдија потребата од посветеност, конкретни политики и ресурси за реализација на визијата од Пекинг и за создавање праведни и просперитетни општества.
Пекиншката декларација, како што потсети Сиљановска-Давкова, повикува на еднакви права и пристап за сите – жени и мажи, девојчиња и момчиња – и тој повик, рече таа, останува ургентен и денес.