Македонија
Џафери-Лајчак: Да се направат уставните измени и конечно да се отворат преговорите по поглавја со Европската унија

На денешната средба со Специјалниот претставник на ЕУ задолжен за дијалогот Белград-Приштина, Мирослав Лајчак, претседателот на Собранието на Република Северна Македонија, Талат Џафери, посакувајќи му топло добредојде на гостинот, изрази и задоволство што утрешната средба во насока на тој дијалог ќе се одржи во Охрид.
„За мене, тоа секако претставува симболика која има свое значење и секако, признание за меѓународната позиција на нашата земја,“ нагласи претседателот Џафери. Тој истакна дека Република Северна Македонија има добри и пријателски односи со двете земји и како соседна држава, даваме голема поддршка на напорите на меѓународната заедница во постигнување на успех во намерата конечно да се најде взаемно прифатливо решение за двете страни. Во тој контекст, претседателот Џафери се надоврза на досегашниот успешен меѓународен пат на Република Северна Македонија во рамките на евроатлантските интеграции, пред сѐ, преку примерот на успешно решавање на тешкиот и отворен спор што го имавме со Република Грција и потпишувањето на Договорот за пријателство и соработка со Република Бугарија. Тој продолжи дека очекувањата се да се направат уставните измени и конечно да ги отвориме преговорите по поглавја со Европската унија.
Специјалниот претставник на ЕУ, Мирослав Лајчак се заблагодари за средбата со претседателот на Собранието и го изрази своето задоволство што е повторно во Република Северна Македонија која за него претставува земја во која има многу пријатели и земја која прва во регионот го потпиша Договорот за стабилизација и асоцијација за членство во ЕУ. Тој во потполност се согласи со претседателот Џафери дека утрешните преговори во Охрид претставуваат убава симболика за една страна која е домаќин на оваа средба и која претставува фактор на стабилноста во регионот со досегашните резултати кои ги покажа на меѓународен план. Воедно г. Лајчак нагласи дека ова е прва средба во рамките на дијалогот Белград-Приштина која се одржува вон границите на Брисел и од тој аспект ова е признание за нашата земја. Тој го запозна подетално претседателот Џафери со досегашниот тек на преговорите меѓу Србија и Косово, со сите досегашни фази и забелешки во рамките на овие преговори како и чекорите на имплементација и изрази надеж дека утрешниот ден ќе донесе значително придвижување на овој процес.
Специјалниот пратеник на ЕУ задолжен за дијалогот Белград-Приштина, Мирослав Лајчак, меѓу другото, изрази интерес и за прашањата околу нашиот почеток на преговори со ЕУ и изрази лично уверување дека политичките актери во нашата земја ќе бидат свесни за моментумот и спремноста на ЕУ да ги почнеме преговорите по завршувањето на обврските околу правењето на уставните измени.
На крај на средбата, претседателот Џафери му посака на Лајчак успешна работа на утрешната средба во Охрид.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Табановце за излез од државата се чека по 20 минути

Сообраќајот на државните патишта се одвива непречено, по суви коловози, информира АМСМ.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 20 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Притвор за уште едно лице од групата која е под истрага за злосторничко здружување, даночно затајување и перење пари

Управата за финансиска полиција информира дека во текот на вчерашниот ден, 28.08.2025 година, на граничниот премин „Долно Блаце“, при обид за влез во РСМ, е лишен од слобода С.А., државјанин на Р.Косово, за кој постои основано сомнение дека сторил кривично дело „Злосторничко здружување“ (чл.394 ст.2) и кривично дело „Даночно затајување“ (чл.279 ст.3).
Од страна на овластени службени лица од Управата за финансиска полиција, лицето веднаш било превземено и изведено пред судија на претходна постапка од каде му била определена мерка притвор во времетраење од 30 дена, по што истиот е спроведен во КПУ Куманово.
Притворањето, појаснуваат надлежните, е продолжение на акцијата од 25 август, кога беа притворени седум лица, како резултат на сложена предистражна постапка спроведена од страна на Управата за финансиска полиција, под раководство и во координација со надлежен јавен обвинител од ОЈО ГОКК, во рамки на која беа превземени низа мерки и активности и беше обезбеден обемен доказен материјал, што резултираше со поднесување на кривична пријава против 13 физички лица и 10 правни лица, за сторени кривични дела: злосторничко здружување, даночно затајување, даночна измама и перење пари и други приноси од казниво дело, со што е предизвикана огромна штета на државниот буџет во висина од над 430 милиони денари.
Македонија
Обвинение за насилство за таткото кој повреди 15-годишни деца на фудбалскиот натпревар во Штип

Основното јавно обвинителство Штип поднесе Обвинителен предлог против едно лице за кривично дело – Насилство од член 386 став 4 во врска со став 3 и став 1 од Кривичниот законик.
На 24 август, на фудбалскиот стадион “Бело Брдо“ во Штип, за време на фудбалскиот натпревар помеѓу пионерските екипи на фудбалските клубови “Брегалница“ од Штип и “Шкупи“ од Скопје, обвинетиот со грубо насилство ја загрозил сигурноста на оштетените две 15-годишни деца, кои биле играчи во тимот на ФК “Брегалница“.
На децата им нанел телесни повреди, а кај оштетените, останатата присутна публика и во јавноста предизвикал чувство на несигурност, загрозување и страв.
Настанот се случил во 89-тата минута од натпреварот, која судијата поради прекршок (фаул) доделил втор жолт картон со што го исклучил од игра синот на обвинетиот, кој играл за „Шкупи“. Незадоволен од одлуката, најпрво синот се однесувал неспортски и со тупаници и со удар со нога се обидел да се пресмета со еден од фудбалерите на „Брегалница“. Тогаш на теренот влегол таткото и со тупаници и клоци започнал да ги удира двете деца, нанесувајќи им телесни повреди. На игралиштето влегле и други лица од публиката, кои спречиле натамошна ескалација на настанот.
Јавниот обвинител до Основниот суд во Штип достави и предлог за продолжување на претходно определената мерка притвор за обвинетиот.