Македонија
Џафери-О`Брајан: Стратешкото партнерство меѓу двете земји се заснова на заеднички вредности и интереси

Помошник државниот секретар на САД за европски и евроазиски прашања, Џемс О` Брајан, кој е во посета на Република Северна Македонија по повод состанокот на лидерите на земјите од Западен Балкан и ЕУ што се одржува во Скопје, во придружба на амбасадорката на САД, Ангела Агелер, помошник администраторот за Европа и Евроазија во УСАИД, Ерин Е. Мекки и шефот на политичката и економска секција во Амбасадата на САД во Скопје, Дејвид Мејерс, остварија средба со претседателот на Собранието на Република Северна Македонија, Талат Џафери.
Џафери истакна дека, стратешкото партнерство меѓу двете земји се заснова на заеднички вредности и интереси, а Северна Македонија е посветена на тесна соработка со САД за низа прашања, вклучувајќи безбедност, економски развој и демократско владеење. Стратешкото партнерство меѓу Северна Македонија и Соединетите Американски Држави е камен-темелник на односите меѓу двете земји, бидејќи двете држави работат заедно на низа прашања, вклучувајќи ја безбедноста, економскиот развој и културната размена. Потврди дека и натаму остануваме посветени да продолжиме да работиме заедно за промовирање на демократијата, доброто владеење, борбата против корупцијата, човековите права и безбедноста во нашите земји, регионот и во светот. Особен аспект на заедничкото партнерство е остварувањето на преостанатата наша стратешка цел-членството во Европската Унија, за што, покрај преземените реформски чекори и имплементирањето на постигнатото од скрининг процесот, многу ни значи и поддршката од меѓународните пријатели.
Џафери го информираше соговорникот за постигнатите придобивки во парламентарното работење и обезбедувањето на буџетската самостојност на Собранието, на посебниот статус на собраниската Служба, донесувањето на новиот Деловник во рамки на процесот “Жан Моне Дијалог”, а го запозна и со тековната агенда во Собранието во пресрет на изборот на техничката Влада и другите активности во однос на претстојните претседателски и парламентарни избори.
Помошник државниот секретарот О`Брајан, упати честитки до претседателот Џафери за сето тоа што е постигнато во Собранието и за севкупните политички процеси кои резултираа со полноправното членство на земјава во НАТО и за новата фаза на напреднати и партнерски процеси со Европската Унија. Воедно, ја истакна спремноста на американската Влада да пружи натамошна поддршка на земјата на планот на интеграцијата во ЕУ, како и во рамките на Планот за раст, иницијативата на ЕУ за раст на регионот на Западен Балкан. Потврди дека САД се секогаш подготвени да помогнат на земјите и политичките лидери кои имаат визија да направат добро за земјата и за своите граѓани и кои посветено работат во таа насока. Планот за раст предвидува секоја земја од Западен Балкан да спроведува реформи и со тоа да влезе на единствениот пазар на Унијата. Идентификувани се два проекти со динамика на реализација во наредните месеци, за што О`Брајан изрази очекување дека Џафери, како иден технички премиер ќе даде поддршка за истите да можат непречено да се реализираат. Тоа се проектот за намалување на трошоците при трансфер на финансиски средства и проектот за олеснување на трансферот на карго-сообраќајот. Тоа ќе биде голем стимул за бизнисот и прекуграничните инвестиции, а следствено ќе доведе до значително подобрување на севкупната економска состојба во земјата.
Соговорниците споделија очекувања дека во Република Северна Македонија, по изборите ќе продолжат започнатите активности кон финализирање на односите со ЕУ и ќе се покаже спремност и визија сите политички фактори во земјата да придонесат во светлата иднина на граѓаните на оваа земја, на сегашните и идните генерации.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Посебен режим на сообраќај во Скопје поради протест

СВР Скопје ги известува граѓаните дека утре со почеток во 11.00 часот поради одржување на протест, Единицата за безбедност на патниот сообраќај ќе преземе мерки за посебен режим на сообраќајот.
Протестот предвидено е да започне пред зградата на ССМ на улицата „Мирче Ацев“ со движење лево по улицата „Филип Втори Македонски“, десно по улицата „11-ти Октомври“, право по улицата „Димитрие Чуповски“, десно по улицата „Васил Главинов“, право по булеварот „ВМРО“, лево по булеварот „Илинден“ до пред Влада на Република Северна Македонија.
СВР Скопје апелира до сите граѓани учесници во сообраќајот да се почитуваат наредбите кои ќе ги даваат полициските службеници.
Македонија
Љутков во Кјото: Напредок во културната соработка со Јапонија

Министерот за култура и туризам, Зоран Љутков, кој е дел од владината делегација која е во посета на македонскиот павилјон во рамките на „ЕКСПО 2025“ во Осака, Јапонија, денеска во Кјото, заедно со Игор Јанушев, генерален секретар на Владата на Македонија, и Андријана Цветковиќ, прв амбасадор на Македонија во Јапонија, оствари работна средба со комесарот за културни врски на Јапонија, Шуничи Токура.
На средбата беа разгледани можностите за унапредување на соработката во областа на културата и туризмот меѓу двете земји.
Од Министерството соопштија дека Љутков и Токура изразија подготвеност за дефинирање конкретни идни активности што ќе придонесат за зближување на македонскиот и јапонскиот народ преку културна размена и туристичка промоција.
Во тој контекст, министерот Љутков потсети дека минатата година во Скопје беше потпишан билатерален документ кој, како што истакна, претставува значаен импулс во продлабочувањето на културните врски меѓу Македонија и Јапонија.
„Меморандумот претставува прв билатерален договор во оваа сфера меѓу нашите држави и има цел да овозможи поблиско запознавање и соработка на двете култури и чекор што отвора нови хоризонти за креативна размена, заеднички проекти и долгорочно пријателство“, потенцираше Љутков.
На средбата Љутков подвлече дека меѓународната соработка и презентација на вредностите на македонската култура се приоритет во културната политика на Владата и на Министерството за култура и туризам. Во таа смисла, тој укажа дека нашата држава и во иднина ќе настојува континуирано да биде присутна на големите настани во Јапонија, вклучително и да организира и комплексни манифестации преку кои ќе ѝ се овозможи на јапонската јавност да се запознае со нашите автори, репродуктивни уметници, нашето творештво и културно наследство.
Македонија
Перински во Шуто Оризари: Со поддршка од над еден милион евра го подобруваме животот на локалното население

Министерот за локална самоуправа, Златко Перински, и неговиот заменик, Ерџан Селими, денеска ја посетија Општина Шуто Оризари, каде што одржаа средба со градоначалникот Курто Дудуш и членовите на општинскиот Совет.
При посетата, која се реализираше во рамки на иницијативата „Каде што срцето е дома“, се разговараше за клучните прашања кои се однесуваат на локалниот развој, со посебен фокус на инфраструктурата и животната средина. Присутните едногласно констатираа дека атмосферската канализација е едно од најгорливите проблеми со кои се соочува општината, а во насока на надминување на овој проблем, Општината со владина поддршка веќе презема конкретни мерки.
Се имплементираат четири проекти за подобрување на атмосферската канализација, кои се дел од 24 одобрени на Шуто Оризари на првиот владин повик за поддршка на инфраструктурни општински проекти со вкупна вредност од над 1 милион евра.
Меѓу значајните теми на средбата беше и претстојната измена и дополнување на Законот за локална самоуправа, со кои ќе се овозможи унапредување на отчетноста на градоначалниците и зголемување на транспарентноста во работењето на општините.
Министерот Перински при посетата на Шуто Оризари истакна дека таа е пример за мултиетничка заедница на Македонци, Роми, Албанци и Турци, и токму таа разновидност е нејзината најголема сила. Притоа, ја истакна и важноста на продолжување на активната соработка помеѓу локалната и централната власт, за да се обезбеди одржлив развој и напредок на локалната самоуправа во сите сфери.
Министерството и Владата, порача министерот, ќе продолжат со континуирана поддршка на Шуто Оризари како еден од главните чекори кон зајакнување на локалната самоуправа и подигнување на стандардот на живот на сите граѓани во неа.