Македонија
Џафери: Оставки од утре, нема пречка ВМРО-ДПМНЕ да не биде во техничката влада

Имајќи ја предвид специфичноста на избор на техничка влада како продукт на пржинскиот договор, секако роковите се скратени од редовните за постапување во вакви ситуации, рече денеска претседателот на Собранието, Талат Џафери.
Тој истакна дека во претходна координација и во согласност со премиерот се определени рамковните рокови.
„Договоривме дека од утре настапуваат роковите за поднесување оставки и за отворање пат за одржување седница за констатирање на оставките, известување на претседателот на државата дека Владата е во оставка и со тоа на првата наредна седница, која е закажана за 26 овој месец, се отвораат постапките и процедурите за да може да се влезе во фаза за избор на нов претседател на Собранието и да настапи обврска за поднесување предлог за мандатар до претседателот на државата, добивање мандат и организација на две последователни седници за избор на влада, избори на заменици и дополнителни заменик-министри.
Ова ќе почне утре со оставките, ќе продолжи на 26 со избор на претседател на Собранието, доделување мандати од страна на претседателот на државата, поднесување предлог-програма и предлог-состав на владата на 27 до Собранието и со тоа се отвора пат да се свика нова седница за 28, на која би се избрала техничка влада, би се констатирал престанок на мандатот на пратеникот, да се извести ДИК за престанок на пратенички мандат, врз основа на тој извештај и надлежноста на техничкиот премиер до Собранието да се достави предлог за заменици и дополнителни заменик-министри. Со тоа би се отворил патот за нова седница за 28, исто така за верификација на пратеникот што треба да дојде и за избор на заменици и дополнителни заменик-министри. Двете седници треба да завршат на 28 овој месец. Составот на Владата треба да е целосен за да може да стапи во функција сто дена пред парламентарните избори“, изјави Џафери и додаде дека Владата ќе биде во склад на Уставот и законот.
СДСМ ги соопшти кадровските решенија за техничката влада, се очекува ВМРО-ДПМНЕ тоа да го стори вечерва.
За евентуални кадровски промени на министерските и заменичките места на ДУИ и Алијансата за Албанците, Џафери рече дека тоа е надлежност на партиските органи, кои имаат право да учествуваат во таа влада. Тој рече дека нема причина да коментира ничија одлука и додаде дека тоа не е работа со која тој е оптоварен.
Во однос на тоа дали во составот на техничката влада ќе има министри од ВМРО-ДПМНЕ, тој рече дека ако има предлози од нив, ќе бидат.
„Нема пречка да не бидат, таков е законот“, додаде Џафери.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Лабудовиќ и Котевски го промовираа проектот „Сјајна патека“ за осветлување на Водно

Кандидатот за градоначалник на општина Центар од редовите на Движењето ЗНАМ за наша Македонија, Мирослав Лабудовиќ, заедно со генералот Горанчо Котевски, носител на советничката листа за Град Скопје на Движењето, денес го промовираа проектот „Сјајна патека“ во Дебар Маало, иницијатива од младите активисти и љубители на Водно од Скопје.
„Водно не смее да згасне штом зајде сонцето. ‘Сјајна патека’ не е само инфраструктурен проект, туку визија за град што се грижи за младите, за спортистите, за семејствата, за секој граѓанин. Ова е проект со кој покажуваме дека знаеме да слушаме и знаеме да дејствуваме“, рече Лабудовиќ.
Тој посочи дека недостигот на осветление претставува сериозен урбан предизвик, кој директно влијае врз безбедноста, достапноста и квалитетот на јавниот простор.
„Луѓето го избегнуваат Водно во мрак. Тоа е изгубена можност за рекреација, за здрава навика, за споделено време со најблиските. Со овој проект сакаме да им го вратиме Водно на граѓаните, осветлено, безбедно и достапно“, рече тој.
Лабудовиќ појасни дека проектот предвидува инсталирање енергетски ефикасни, автоматизирани светилки, кои се приспособуваат на природната средина, без да ја нарушат екосистемската рамнотежа на парк-шумата.
На настанот генералот Котевски ја истакна важноста на проектот, како и неговата заложба за создавање безбедни и инспирирани простори за граѓаните, нагласувајќи дека овој проект е симбол на нов, поодговорен пристап кон урбаното планирање и практична грижа за јавниот интерес.
Македонија
Мицкоски: Нека ме наречат заостанат, но формирањето многудентно семејство е највисок патриотски чин

Премиерот, Христијан Мицкоски, упати порака до граѓаните дека формирањето семејство, формирањето многудентно семејство е највисок патриотски чин на еден народ за сопствената татковина.
„Секој оној кој што си игра играчки и кој што ова не го разбира, колку е ова озбилно, не и мисли добро на државата. Нека ме нарекуваат конзервативен, заостанат како сакаат нека ме нарекуваат, но ова мора биде прв приоритет на оваа Влада и на сите следни Влади, а тоа се многудентни семејства. Јас би сакал кон сите македонски граѓани да упатам јасна порака – формирањето семејство, формирањето многудентно семејство е највисок патриотски чин на еден народ за сопствената татковина. Без разлика на верската, на етничката припадност – многудетното семејство значи иднина“, рече Мицкоски.
Тој кажа дека според последниот попис во Македонија има над 1,8 милиони жители, но дека стравува дека за 20 години ќе бидеме држава под 1 милион жители.
„Имаме отприлика над 700 илјади редовно вработени и околу 350 илјади пензионери. Реално присутно население според сите проценки не надминува од 1,5 милиони. За 20 години се плашам дека ќе бидеме држава под 1 милион жители и тогаш ќе имаме на еден пензионер еден вработен“, изјави премиерот.
Според него, тоа значи колапс за пензискиот фонд, тоа значи колапс за здравствениот фонд.
Инаку, Мицкоски денеска ја промовира петгодишната програма која ќе ја спроведуваат Владата и УНФПА.
„Оваа програма не е само документ или формалност, туку е план за дејствување- визија и стратегија која ќе се реализира со конкретни активности, насочени кон иднината на нашата држава и нашите граѓани. Кога зборуваме за ресурси, често споменуваме рудни богатства, финансии, инфраструктура, енергенси, води или природни богатства. Сето тоа е значајно. Но, најважниот ресурс, ресурсот кој ги движи сите други, тоа е човечкиот капитал“, рече Мицкоски.
Тој кажа дека демографската рецесија не е нов феномен и дека таа трае повеќе од 70 години. Како што кажа Мицкоски, од 1950 година па до денес бројот на новородени деца постојано опаѓа.
„Во 1950 година во Македонија имало над 50.000 новородени бебиња. Во 2024 година имаме само околу 16.000 новородени бебиња. Овој пад има две главни причини: прво, иселувањето на младите луѓе и второ, намалениот наталитет и фертилитет. Владата е свесна за сериозноста на ова прашање и веќе работи на неколку линии. Создадовме највисок економски раст на Балканот- тоа значи нови работни места, поголеми плати и поголеми можности за младите. Инвестираме во иднината на семејствата: шест бесплатни обиди за ин витро оплодување, со забрзана процедура, сето тоа на товар на Фондот, зголемивме од три на шест. Бесплатни учебници за учениците- затоа што образованието е темел на демографскиот раст. Нови градинки во повеќе градови- за да им помогнеме на родителите. Поддршка за мајките, за децата и за семејствата, преку нови социјални и економски мерки“, рече Мицкоски и додаде дека овој проблем не е изолиран само кај нас и дека со него се соочува целата Европа и пошироко- Балканот, Европската Унија, САД, Канада, Австралија, Источна Азија. Она што е симптоматично е дека дури и најразвиените и најбогатите земји се најмногу погодени.
Македонија
Од утре дожд и снег на планините и на повисоките места

Од утре попладне до петок, под влијание на влажен бран, ќе има врнежи од дожд, локално пообилни, информира УХМР.
Вкупно од овој бран се очекува на повеќе места да наврнат над 30 литри на квадратен метар, а локално и над 50 литри.
Поради продор на постудена воздушна маса од север и засилен северен ветер, в четврток на повисоките планини врнежите ќе преминуваат во снег, а поради натамошно спуштање студен воздух, в петок ќе има услови да преминуваат во снег и на некои од повисоките места.
На повисоките планини ќе се формира снежна покривка. Температурата на воздухот значително ќе опадне.
Во Скопје од утре кон крајот на денот до петок времето ќе биде претежно облачно со врнежи од дожд, повремено побилни. Ќе дува умерен до засилен северен ветер, а температурата значително ќе опадне.

Извор: УХМР