Претседателот на Собранието Талат Џафери и државно – црковната делегација во состав: Арбер Адеми, координатор на ДУИ; Соња Мираковска, заменик координатор на СДСМ; Дафина Стојаноска, заменик координатор на ВМРО – ДПМНЕ; Цветанка Иванова, генерална секретарка на Собранието; Елена Јовановска Грујовска, директорка на Институтот за македонски јазик; Даријан Сотировски, претседател на Комисијата за односи со верските заедници и религиозни групи; г. Пимен, митрополит европски; отец д-р Зоран Стојанов имаа аудиенција кај папата Франциско.

Џафери, честитајќи му ја 10-годишнината од Понтификатот на папата Франциско, подвлече дека односите меѓу Република Северна Македонија и Светата Столица се нераскинливо поврзани преку историски врски на важните личности од заедничкото минато и се темелат на заедничките историски, културни и верски традиции. Постои широк потенцијал за понатамошно унапредување на тоа партнерство, како на билатерален, така и на меѓународен план, особено преку Националната библиотека “Св. Климент Охридски“-Скопје и Ватиканската библиотека, како и меѓу тајниот Архив на Ватикан и Државниот архив на МК; меѓу Институтот за национална историја на Северна Македонија и Ватиканската библиотека и Архив во размената на научно – истражувачки работници, како и преку потпишување на меѓудржавен договор за регулирање на надлежностите во сферата на високото образование меѓу двете држави, по моделот на вакви слични договори што ги има Светата Столица со земји од Регионот.

Џафери истакна дека „Република Северна Македонија е мултиетничка, мултикултурна и мултиконфесионална држава во која има длабока традиција на меѓурелигиска толеранција, се почитуваат различните верски чувства и се негуваат конфесионалните слободи; Верските заедници и религиозните групи имаат висок степен на взаемна соработка и црквите дејствуваат непречено во реализацијата на своите цели. Постои плодна соработка со Католичката црква во Република Северна Македонија и нејзината конструктивна улога покрај другите религии е дополнителен вредносен фундамент на религиска коегзистенција.“

Основната порака што ја упати папата Франциско на средбата беше единството за обезбедување мир во Европа и единството во напорите за евроинтегративните процеси.

Претседателот Џафери му подари на папата графичка икона – Богородица Несвенлива Роза од XIX век и примерок од долгометражниот документарен филм „Јанѕа“. По повод 10 години од Понтификатот на папата, Џафери му подари уникатен примерок – кутија во длаборез.

По аудиенцијата кај папата Џафери оствари средба и со кардиналот Паролин и монсињор Галагер. На средбата Џафери ја истакна официјалната посета на кардиналот Паролин во 2016 година и првата посета воопшто на секретар за односи со државите на Римокатоличката црква во Република Северна Македонија, искажувајќи надеж дека по овие посети ќе следат идни посети на високо ниво во насока на динамизирање на билатералната соработка со Светата Столица. „Верувам дека билатералните дипломатски односи кои идната година се заокружуваат на 30 години, дополнително би добиле на интензитет и би се отвориле нови можности за соработка доколку во Скопје се отвори Нунцијатура на Светата Столица во Република Северна Македонија“, рече Џафери.

Кардиналот Паролин во својето излагање нагласокот го стави на билатералната соработка и односите на Република Северна Македонија и Светата Столица и прашањата кои се од взаемен интерес за двете страни а се во процес на регулирање.

По официјалните средби, делегацијата присуствуваше на Молебен во Базиликата Сан Клементе, која ја водеше митрополитот европски, г. Пимен.