На покана од претседателот на Собранието, Талат Џафери, делегација предводена од претседателот на Собранието на Република Албанија, Грамоз Ручи, е во официјална посета на Македонија.

Како што инфорираа од Кабинетот на претседателот на Собранието, Ручи бил дочекан со високи државни почести, а првата средба на оваа официјална посета се оствари со домаќинот, претседателот на Собранието на Република Македонија, Талат Џафери.

Џафери за време на средбата истакнал дека за него претставува особена чест да оствари средба со пријателска земја како што е Албанија, со која, како што стои во соопштението, имаме одлични билатерални и мултилатерални односи и потенцираше дека парламентарното мнозинство се залага за добрососедска политика и евро-атлантска интеграција.

Од Кабинетот на претседателот на Собранието додаваат дека тој исто така ја поздравил и поддршката што Албанија како членка на НАТО ѝ ја дава на Република Македонија и изрази надеж дека оваа поддршка ќе продолжи со зголемен интензитет, особено во претстојните месеци кога се очекува финализирање на евро-атлантската интеграција на Република Македонија со нејзино полноправно членство во НАТО.

Во однос на евроинтеграциските процеси на двете земји, и двајцата претседатели истакнале дека е потребна континуирана заемна поддршка бидејќи иднината на Западниот Балкан е влез во големото европско семејство на сите земји кандидати од овој регион.

Двајцата соговорници разговараа и за актуелните случувања во двата парламента, како и за предвидените парламентарни активности во наредниот период и заеднички констатираа дека двата парламента треба да ја зајакнат соработката на ниво на групи за соработка, комисии и на административно ниво.

Претседателот Ручи на средбата истакнал дека се посветува посебно внимание на малцинствата кои живеат во Албанија, а за тоа добар пример е македонското малцинство во Пустец. Исто така, претседателот Ручи посебен акцент стави на големите предизвици кои Република Македонија ги надмина со успех, како што е референдумот, Законот за јазици, договорот со Грција, кои се пример и патоказ за една земја која умее да покаже дека е подготвена за полноправно членство во Европската Унија.

За време на средбата се истакна дека двете соседни земји споделуваат заеднички интереси во многу области, и во таа насока од големо значење се економските, инфраструктурните и енергетските проекти, како што е изградбата на патот Ќафасан – Елбасан како дел од Коридорот 8, автопатот Елбасан – Дебар, како и железничката врска меѓу двете земји, проекти што се во завршна фаза. Двајцата соговорници се согласија и дека оваа официјална посета е продолжение на одличната соработка на парламентарно ниво, при што ги охрабрија парламентарните групи за соработка на двата парламента да ги интензивираат односите.