Македонија
Џафери: Северна Македонија е пример во регионот за имплементирање родова рамноправност

Претседателот на Владата на Република Северна Македонија, Талат Џафери, денеска учествуваше и се обрати на Меѓународниот форум за жени, мир и безбедност, што се одржува во Приштина, Република Косово.
„Денеска сме тука поради еден значаен повод и би рекол големо достигнување за регионот. За мене е чест да сум дел од овој настан, кој ќе придонесе за реализација на оваа одлична иницијатива, односно Регионалниот центар за извонредност за жени, мир и безбедност.
И ние во Република Северна Македонија сме силно посветени на имплементирањето на агендата „Жени, мир и безбедност“. Како активна земја членка на НАТО го поддржуваме имплементирањето на оваа политика преку трите основни цели на алијансата и за таа цел го усогласивме и нашиот национален акциски план со сродните иницијативи“, истакна Џафери.
Уште поважно, како што додаде, ние и суштински ги имплементираме трите принципи на интеграција, инклузивност и интегритет во нашата секојдневна работа и во политиките што ги носиме. Бидејќи суштината е она што секојдневно нè води при носењето на политичките одлуки, кои имаат една единствена цел, а тоа е да ги исполнуваат стандардите за постигнување на родова еднаквост.
Потсети дека агендата за жени, мир и безбедност беше исто така еден од приоритетите за време на нашето претседавање со ОБСЕ минатата година.
„Со ова сакам да истакнам дека сме на одличен пат. Иако имаме уште многу за одење на тој пат, траекторијата на движење е утврдена и моја заложба е и ќе биде да останеме на неа.
Војната во Украина е силен потсетник за неопходноста од активното вклучување на жените во сите области за спречување конфликти и во заложбите за градење на мир, стабилност и безбедност. Нивниот придонес е неопходен и во адаптирањето на политиките кон новата реалност.
Токму затоа ние како кредибилна членка на НАТО го поддржуваме пристапот на алијансата да се даде поголемо значење на политиката за жени, мир и безбедност. Тоа значи поголемо претставување и учество на жените во цивилните и воените операции и во мисиите на НАТО, но и поголема промоција на родовата еднаквост како израз на нашите заеднички демократски вредности“, посочи Џафери.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Обраќање на Муцунски: Членството во Франкофонијата го гледаме како можност за афирмација на македонскиот идентитет, јазик, историја и богато културно наследство

Министерството за надворешни работи и надворешна трговија беше организатор и домаќин на панел-дискусијата на тема „Улогата на Франкофонијата во светот и регионот“, организирана по повод Месецот на Франкофонијата. Настанот беше отворен со обраќање на министерот за надворешни работи и надворешна трговија, Н.Е. Тимчо Муцунски.
На панел-дискусијата учествуваа амбасадорите на неколку франкофонски земји акредитирани во Република Северна Македонија, меѓу кои Франција, Швајцарија, Романија и Грција, кои преку свои излагања ја истакнаа важноста на Франкофонијата како платформа за мултилатерализам и културна разновидност.
Темата на панелот беше фокусирана на значењето на Франкофонијата како заедница на вредности, културен дијалог и солидарност, со посебен осврт на нејзината улога во современиот геополитички и регионален контекст.
„Франкофонијата не е само заедница на јазик, туку пред сè заедница на вредности – дијалог, еднаквост, почит и соработка. Во време на глобални предизвици, овие вредности се поважни од кога било и претставуваат патоказ за стабилност и развој во нашиот регион и пошироко,“ истакна министерот Тимчо Муцунски.
„Членството во Франкофонијата го гледаме како можност за афирмација на македонскиот идентитет, јазик, историја и богато културно наследство, но и на сите вредности на современото македонско општество – мирот, демократијата, толеранцијата и солидарноста“, додаде тој, нагласувајќи дека францускиот јазик е дел од нашата историја, но исто така и нераскинлив дел од нашата европска иднина.
Во своите обраќања, дипломатските претставници на франкофонските земји нагласија дека Франкофонијата претставува силна основа за градење мостови меѓу културите, поддршка на мирот и демократијата, како и промоција на образованието, младинските перспективи и родовата еднаквост. Тие ја подвлекоа и важноста од продлабочување на регионалната соработка во духот на франкофонските вредности.
Македонија
Голема полициска акција на повеќе локации: сомнение за кривични дела на штета на Фондот за здравство

Под раководство на јавен обвинител од ОЈО ГОКК, МВР спроведува координирана акција на повеќе локации низ државата.
Како што извести Обвинителството, станува збор за основано сомнение за сторени повеќе кривични дела со кои е сторена штета на Фондот за здравство.
„Со оглед на обемот на акцијата повеќе информации ќе бидат споделени по нејзиното завршување“, додаваат од ОЈО ГОКК.
Македонија
„СДС може да дефокусира колку сака, ќе продолжат да растат сите плати“, велат од ВМРО-ДПМНЕ

„Платите и пензиите растат, економијата заживува, а СДС безделничи. СДС седум години власт се грижење единствено за богатење на неговата партиска елита, а народот го остави во длабока сиромаштија, каде пола милион граѓани денот мораа да го поминуваат со по 150 денари на ден“, реагираат од ВМРО-ДПМНЕ на соопштението на СДСМ.
„СДС може да пишува што сака, да дефокусира колку сака, но едно е сигурно, за само десет месеци власт на ВМРО-ДПМНЕ, линеарно се зголемија пензиите за сите пензионери за пет илјади денари.
Се постигна историски договор за раст на платите на вработени во јавното здравство, каде што освен на лекарите и медицинските сестри, значително се покачија платите и на техничкиот персонал, кои СДС ги заборави за време на нивното седумгодишно владеење. Зголемувањето на платите ќе продолжи и понатаму, така што до крајот на мандатот предвидено е да достигне и до 50%.
Покачување на платите добија и сите вработени во образованието, кои исто така, етапно ќе продолжат да се зголемуваат, при што до крајот на мандатот предвидено е нивните плати да се зголемат за 46%.
Зголемување на плати имаше и за вработените во безбедносниот сектор, каде околу 12.000 вработени службени лица добија повисока плата за 10 проценти.
Исто така, согласно закон, со мартовската плата следуваше и покачување на минималната плата.
Откако се сопре слободниот пад на економијата кој СДС го остави, сега веќе се работи на нејзино заживување преку вложување во капитални инвестиции, странски директни инвестиции кои 2024 година достигнаа историски највисоко ниво од над една милијарда евра.
Во однос на цените на производите, во изминатиот период постојано се преземаа мерки за нивно намалување, како ограничување на профитната маржа, замрзнување на цените. А веќе стапи на сила законската обврска со која маркетите треба јавно на нивните веб страници да ги објават цените на производите, мерка која е позитивен пример на успешност која се применува во земји како Израел.
И сето ова влијае за граѓаните да имаат квалитетен и достоинствен животен стандард.
Постепено и сигурно, преку вложување во капитални проекти, раст на економијата, директни странски инвестиции, на одржлив начин ќе продолжат да се зголемуваат платите во сите сектори“, се наведува во соопштението на ВМРО-ДПМНЕ.