Македонија
Џафери со групата за пријателство од Косово: билатералните односи одлични и без отворени прашања

Претседателот на Собранието, Талат Џафери, денеска оствари средба со делегација на Групата за пријателство Косово-Северна Македонија на Собранието на Република Косово, во состав Ганимете Муслиу, претседателка и Влора Думоши, членка на Групата за пријателство. На средбата присуствуваше и Африм Гаши, претседател на Пратеничката група на Собранието на Република Северна Македонија за соработка со Парламентот на Косово.
Џафери нагласи дека оваа посета претставува уште една потврда за плодната соработка меѓу Собранието на Република Северна Македонија и Собранието на Република Косово, на ниво на претседатели на парламенти, комисии и групи за соработка и пријателство. Тој оцени дека билатералните односи меѓу Северна Македонија и Косово се одлични, без отворени прашања, а доказ за тоа се бројните средби меѓу високи претставници на двете држави.
Претседателот на Собранието изрази задоволство што во Северна Македонија, Албанија и Косово веќе стапија во сила трите договори потпишани на последниот Самит на Берлинскиот процес за меѓусебно признавање на личните карти, универзитетските дипломи и професионалните квалификации. Овие договори, според Џафери, претставуваат значаен чекор напред во заедничките напори да им се овозможи на граѓаните слобода на движење и интеграција, согласно вредносните и најдобрите практики на ЕУ.
Во врска со состојбата на северот од Косово, претседателот Џафери нагласи дека ги подржуваме сите напори за де-ескалација на тензиите, што треба да се постигне преку дијалог и комуникација, особено со стратешките партнери.
Претседателката на Групата за пријателство Косово-Северна Македонија, Ганимете Муслиу, се заблагодари за севкупната поддршка што Република Северна Македонија ја пружа на Република Косово за сите значајни прашања. Таа изрази надеж дека и во иднина ќе продолжи нашата принципиелна поддршка за евроатланските интеграции и членството во меѓународните организации, особено во меѓународните форуми каде што Косово не е присутно. Муслиу нагласи дека пратениците во Собранието на Република Косово, без оглед на нивната политичка ориентација се залагаат за мир и де-ескалација на состојбата во северниот дел на државата, со оглед дека тензиите не се во корист на граѓаните.
Пратеничките групи за пријателство и соработка од двете собранија, според Муслиу, можат да придонесат за максимално искористување на можностите за олеснување на меѓусебната комуникација и во таа насока предложи организирање на конференција на која ќе се дискутира за конкретни идеи и проекти на овој план.
На средбата стана збор за можностите за подобрување на инфраструктурното поврзување и на капацитетите на граничните премини со воведување на концептот на заеднички контроли, како и унапредување на соработката во полето на културата и туризмот. Соговорниците се осврнаа и на економската соработка, нагласувајќи дека треба да се направат напори да се намали нееднаквоста во трговската размена, која е со суфицит од страна на Република Северна Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Доколку утре има парламентарни избори, ВМРО-ДПМНЕ ќе освои над 60 пратеници, порача Манасиевски

„ВМРО-ДПМНЕ како апсолутен победник на локалните избори со освоени 33 општини во првиот круг и водство во 19, плус градот Скопје, би освоило над 60 пратеника доколку утре има парламентарни избори, додека пак СДС и Филипче би биле трета партија во некои изборни единици“, вели Валентин Манасиевски, член на ЦК на ВМРО-ДПМНЕ.
„ВМРО-ДПМНЕ во однос на минатите локални избори има скок од 12.000 гласа, додека пак СДС е во дебел минус од 111.000 гласа. Во однос на добиени советнички места, ВМРО-ДПМНЕ има 550 места во советите на овие локални избори или во споредба со локалните 2021 скок од 82 места додека од друга страна, СДС има околу 230 советнички места што е за 166 места помалку од 2021 година. Исто така, ВМРО-ДПМНЕ има освоено и најмногу советнички места, во 59 општини и градот Скопје, од кои во најголем дел има апсолутно мнозинство во советите.
Историската победа на овие локални избори на ВМРО-ДПМНЕ се должи на успешната работа на градоначалниците од редовите на ВМРО-ДПМНЕ изминатите четири години, како и работата на Владата предводена од ВМРО-ДПМНЕ и претседателот Христијан Мицкоски, кои ги поддржаа општините како никогаш досега.
Затоа, продолжуваме и понатаму со работа и со реализација на она што е ветено. Граѓаните го направија вистинскиот избор. Избраа работа, избраа проекти, избраа вистински луѓе на вистински места“, изјави Валентин Манасиевски, член на ЦК на ВМРО-ДПМНЕ.
Македонија
„Внимание, стаорците нема да чекаат втор круг избори“, предупредува Никола Пановски

„Вториот круг, заедно со рокот на жалби, предавањето на функцијата, нема да заврши пред 9.11.2025. За 18 дена, стаорците, па и глувците, може енормно да се размножат. Скопје веќе 20 дена е елдорадо за глодачите. Имаат достапна храна во изобилство. Излегуваат од подрумите, канализацијата и се хранат, се оплодуваат и за еден месец од секое животно ќе се создадат во просек по 10 младенчиња“, пишува на социјалните мрежи микробиологот Никола Пановски.
„Значи, и по евентуално чистење на градот за 72 часа по 20 дена, ќе имаме илјадници гравидни глодачи, кои на свет ќе донесат десетици илјади младенчиња. Можеби ќе имаме исчистен град, но глодачите ќе бидат многубројни и барајќи храна, ќе бидат крајно агресивни. Храната ќе ја бараат во нашите подруми и гаражи, а ако не ја најдат, ќе ни влезат дома“, вели Пановски.
Тој апелира до Владата веднаш да се прогласи вонредна состојба и да се почне со чистење на сметот.
„Министерство за здравство, Центар за јавно здравје, Институт за јавно здравје, Агенција за храна и ветеринарство, што правите, па вие сте платени да апелирате, да наредувате, да превенирате, не е тоа моја работа. Десетици платени специјалисти по хигиена, епидемиологија, микробиологија, ветеринари, каде сте? Воопшто не е важно дали сега е опортуно да молчите, да чекаме да се исполни ветувањето за 72 часа, аман веќе, побарајте итна акција од Владата, ако не ве слушаат, излезете на улица“, додава Пановски.
Македонија
Зоран Димитровски: Не размислуваме, ниту поддржуваме идеи за отворање кампови за враќање одбиени баратели на азил

Заменик-министерот за надворешни работи и надворешна трговија, Зоран Димитровски, вчера и денес (21-22 октомври 2025) учествува на годишната конференција за миграции во Виена (Vienna Migration Conference), во организација на Меѓународниот центар за развој на миграциските политики – ИЦМПД.
На десеттата виенска конференција за миграции присуствуваат повеќе од 250 носители на одлуки, владини претставници, експерти од областа на миграцијата, меѓународни организации, академската заедница и цивилното општеството, кои прават напори за поврзување на миграциските текови со најсоодветните стратешки политики и решенија.
Во рамките на конференцијата „Западен Балкан: Регионални перспективи за миграцијата и партнерствата“, заменик-министерот Димитровски учествуваше во разговор еден на еден со генералниот директор на ИЦМПД, Михаел Шпенделегер, посветен на предизвиците и можностите што ги носи променливата миграциска слика во регионот.
За време на разговорот беше нагласено дека Западен Балкан се наоѓа на уникатна пресвртница во управувањето со миграциите како регион што истовремено е место на потекло, транзит и сè повеќе дестинација за мигрантите. Овој динамичен контекст отвора нови предизвици, но и можности за економски развој, особено во услови на зголемена побарувачка за работна сила и недостиг на работници во клучни сектори.
Заменик-министерот Димитровски посочи дека нашата земја активно се приспособува на новата реалност преку развивање политики за управување со легалната миграција, кои одговараат на демографските и на економските потреби на земјата. Притоа беше истакната и важноста од градење партнерства со земјите на потекло за развој на одржливи модели на работна мобилност, подобрување на системите за враќање и намалување на нерегуларната миграција.
Во разговорот беше истакнато дека овие процеси се во согласност со европските иницијативи, како што се пактот за миграција и азил, како и акцискиот план на ЕУ за Западен Балкан, кои го потенцираат значењето на соработката со земјите на потекло во делот на мобилноста, развојот на вештини и управувањето со враќањето на мигрантите.
Беше нагласено дека Северна Македонија, како и земјите од Западен Балкан, е дел од Европа и нејзините политики, а не простор надвор од нејзините граници. Во таа насока, нашата држава ниту размислува ниту поддржува идеи за отворање кампови за враќање одбиени баратели на азил.
На маргините на конференцијата заменик-министерот Зоран Димитровски оствари повеќе средби и разговори со истакнати владини претставници и министри, кои учествуваат на конференцијата.