Македонија победила многумина, Македонија ќе го победи и Заев, доаѓа времето за неговата оставка и подобри денови за македонскиот народ, рече на вечерашниот протест во Велес членот на ИК на ВМРО-ДПМНЕ, Владимир Ѓорчев.

Тој кажжа дека во Велес како цела Македонија народот се кренал да ги одбрани идеалите на револуционерите кои што го кренаа Илинден, на македонските партизани кои извојуваа победа и донесоа слобода за Македонија во Втората светска војна.

„Тука во Велес на овој плоштад е таа симболика која ја гледаме и чувствуваме, тука се Гемиџиите и онаа генерација на Илинденци, но тука со нас со својот паметник е велешанецот Коста Солев Рацин. Тука сме и ние синовите и внуците и внуките на Македонија и затоа не се откажуваме. Знаеме дека темница и не тиштат овие работи, но не заборавајте дека идејата која што почна во 1893 годинапочна од 6 луѓе“, рече Ѓорчев.

Тој додаде дека епопејата на НОБ почна на 11 октовмри 1941 од еден одред во Прилеп и еден во Куманово, а денес околностите се поинакви бидејќи како што кажа, политички се бориме, но сепак не се откажуваме и затоа секој ден ќе се бориме достоинствено против политиките на Зоран Заев.

„Оваа декемвриска темница со нашето достоинство, со нашата љубов кон Македонија ја навестуваме македонската пролет и македонската зора која ќе изгрее. Македонија победила многумина, Македонија ќе го победи и Зоран Заев. Ќе дојде времето за неговата оставка, ќе дојде време кога повторно на овој плоштад со вашите знамиња и нашите прекрасни македонски песни ќе прославиме. Ќе изгрее сонцето на слободата, доаѓа зората и подобро време“, изјави Ѓорчев.

Нема да прифатиме негирање на македонскиот идентитет и јазик, изјави Трајко Славески, на протестот на ВМРО-ДПМНЕ во Битола.

„Тука сме да изразиме несогласување со македонскиот врв, особено со премиерот Заев, кој ја задира сржта на македонскиот идентитет. Оттука, исто така искажуваме несогласување, што и по нашите барања за средба за запознавање за тоа за што се преговара, со кого се преговара, до тоа не дојде и мислам дека тоа е сосема некоректно“, рече тој.

Славески рече дека македонскиот јазик е одамна признат и нема да прифатат никакво негирање.

„Ние сме тука заедно со граѓаните на Битола да кажеме дека ова не смее да помине, ние сме Македонци, македонскиот идентитет е таков со векови, македонскиот јазик е одамна признат и никакво негирање нема да прифатиме, ниту од претставниците на Република Бугарија, најмалку од нашите избраници, затоа што некој ги избрал, кои во овој случај се на границата на предавство“, рече тој.

ВМРО-ДПМНЕ вечерва на протести во Берово, Пехчево и во Кочани побара оставка од премиерот Зоран Заев.

„Народот се буди, бара оставка на Зоран Заев и заминување на оваа криминална мафијашка влада. Нема да дозволиме распродажба на македонските национални интереси и распрачување и урнисување на достоинството на македонскиот народ. Бараме итно прекинување на преговорите со Бугарија, не дозволиво е преговарање за македонскиот јазик, македонскиот идентите и македонската историја, нема да дозволиме национално понижување“, рече Мане Јаковлевски.

Претседателот на УМС, Сергеј Попов, на протестот во Берово ги повика сите малди да излезат на улиците и да побараат оставка од Заев, односно, како што рече, младите сакаат достоинствен живот како сите млади во Европа и светот, а не живот каков што нудат СДСМ и Заев.

„Ги повикувам сите млади во наредниот период да излезат и да ни се придружат на протестите, ние единствено што бараме е достоинствен живот и сигурна иднина, а не ова што ни го нудат власта и Заев – распродажба на македонскиот јазик и историја“, вели Попов.

Пратеникот од ВМРО-ДПМНЕ, Миле Лефков, во Кочани изјави дека нема откажување и сѐ додека Заев не си поднесе оставка, ВМРО-ДПМНЕ ќе протестира.

„Остануваме на улиците, колку сме, толку сме. Бараме оставка од Заев и нема откажување. За нашето минато, нашата македонска историја, нашиот македонски јазик и нашиот идентитет нема право никој да преговара. Не бараме ништо што е туѓо, само бараме да запре ова срамно понижување и на македонскиот народ и на сите граѓани што живеат овде. Зоран Заев мора да си замине за Македонија да оди напред. Доста ни е од поразите и неуспесите. Доста е со виткање ‘рбет, доста е со национално понижување. Оставка сега за да не биде предоцна“, изјави Лефков.

ВМРО-ДПМНЕ вечерва организира протести во 20 града.