Премиерот Зоран Заев упати телеграма со сочувство до семејството на првоборецот и носител на партизанска споменица 1941 Раде Гогов.

„Во овие моменти на семејна тага дозволете ми од мое име, и од име на Владата на Република Северна Македонија, да Ви изразам искрено сочувство за смртта на првоборецот и носител на партизанска споменица 1941 Раде Гогов. Првоборецот на НОВ Раде Гогов, кој како млад 18 годишен партизан го обезбедуваше првото заседание на АСНОМ, останува во нашите срца и сеќавања како борец кој остави своја неизбришлива трага во македонската историја, како првоборец за нејзиното ослободување, самобитност, државност и независност. Неговата посветеност кон стратешките цели на државата и кон борбата за поубаво, слободно и напредно општество, го прават неговиот животен пат судбински испреплетен со патот на нашата татковина.Како борец на НОБ, ќе остане запаметен по храброста и неговите преданија за македонската борба за слобода“, се вели во телеграмата.

На денешниот протест за оставка на Зоран Заев и слобода на народот, претседателот на ВМРО-ДПМНЕ, Христијан Мицкоски ги повика граѓаните на масовни протести, бидејќи има информација дека деновиве Заев ја продава Македонија.

„Излезете браќа и сестри и помогнете и на Македонија. Имам информација дека овој викенд се распарчува Македонија во Софија и се преговара за иднината на нашиот идентитет, да не дозволиме и од утре внимателно да ја блокираме Македонија секој нареден ден и да не дозволиме овие луѓе да ни ја продадат верата, нацијата и кожата, тие одамна си го продале својот ген на ѓаволот“, истакна Мицкоски.

Мицкоски додаде дека Зоран Заев подготвува национален пораз, но од секој од нас зависи дали тоа ќе го промениме.
„Јас како човек и поединец можам да направам многу работи, но сите заедно, сплотени еден до друг можеме да направиме се. И за оваа битка драги пријатели потребен е народ. Младо и старо, машко и женско треба да се одважи и да се спротивстави“, порача Мицкоски.

Мицкоски посочи дека ако сега во овие часови, денови не излеземе и не се спротивставиме ќе биде предоцна.

„Ако сега не излеземе и дадеме отпор подоцна ќе немаме право да велиме зошто не ги променивме работите. Сега можеме а за тоа е потребен секој еден од вас. Сега за да не биде предоцна. Сите кои имаме разлики и забелешки едни кон други мораме да ги заборавиме, за да спречиме ново бришење и ново виткање на кичма“, рече Мицкоски.

Либерално-демократската партија и Демократскиот сојуз, денес во Пустец, Албанија донираа учебници на македонски јазик за Македонците, ученици во заедничкото основно и средно училиште „Трајан Ѓорѓиовски и Митре Колевски“.

Донацијата од 540 книги и учебни материјали поточно комплети учебници, работни тетратки и збирки задачи по предметите Математика и Природни науки за учениците од прво до петто одделение, беше врачена од страна на претседателот на Либерално-демократската партија, Горан Милевски и претседателот на Демократскиот сојуз, Павле Трајанов.

Директорот на училиштето во Пустец, Трајан Вангеловски, градоначалникот на Пустец, Пали Колефски и пратеникот во парламентот на Република Албанија, Васил Стерјовски се заблагодарија на донацијата на книги која ќе им овозможи на учениците полесно совладување на наставната програма.

Според одлуката на Владата во Тирана, Македонците во Албанија имаат право на настава на македонски јазик во основното образование, но се соочуваат со недостиг на учебници по соодветните предмети на македонски јазик.

Во училиштето во Пустец учат 125 ученици во основното образование, и 30 ученици во средно. Во општината Пустец која опфаќа 9 населени места живеат 6000 жители, кои се Македонци по националност.