Хотелот Вила Зора, последниот угостителски објект во Велес, веќе четири месеци стои празен, а главен проблем за неговото нормално функционирање се нерешените сопственички односи.

Хотелот Вила Зора, последниот угостителски објект во Велес, веќе четири месеци стои празен, а главен проблем за неговото нормално функционирање се нерешените сопственички односи.

Откако АД. Киро Ќучук го остави хотелот со кој стопанисуваше 16 години, објектот им беше вратен на поранешните корисници Сојузот на Борци од Велес со 60 отсто и Фондот за пензиско осигурување со 40 отсто.

Старо-новите корисници велат дека немаат средства да го реконструираат хотелот, кој со Законот за сопственост донесен во 1999 година е во државно владение и очекуваат од владата да направат проект за негово реновирање.

Корисниците сметаат дека по реконструкцијата, објектот може да се издава или да се понуди на продажба и велат дека веќе имало заинтересирани страни.

„Со последниот делбен биланс хотелот е државна сопственост. Затоа и тие треба да го реновираат, бидејќи ние сме само корисници на објектот“, вели претседателот на сојузот на борците од Велес Саздо Кицевски.

Според проценка на стручни лица за реконструкција на хотелот ќе бидат потребни околу еден милион евра.

Додека се чека реакција од надлежните хотелот пропаѓа, а корисниците имаат големи проблеми да се справат со крадците кои во текот на вечерните часови ги кршат прозорците, влегуваат во објектот и прават штета, а напуштените простории, преполни со расфрлани шприцови и игли, се вистинско дувло за наркоманите.

„Крадците и наркоманите се голем проблем и ние моравме да воведовме и чуварска служба за да се справиме со нив“, вели Кицевски кој додаде дека веќе неколкупати ја контактирале полицијата, но засега резултати нема.

Хотелот Вила Зора не работи од 7 декември минатата година./крај/лисица/иа